12 mamyr – Alash qozǵalysynyń kórnekti qairatkeri, qazaqtan shyqqan alǵashqy temir jol injeneri, tarihshy, memleket jáne qoǵam qairatkeri Múhamedjan Tynyshbaiúlynyń tuǵan kúni.
Osy atauly kúnge orai M. Tynyshbaiúly atyndaǵy oblystyq tarihi-ólketanu muzeii men «Múhamedjan Tynyshbaiúly múrasy» qorynyń úiymdastyruymen «Múhamedjan Tynyshbaiúly jáne Alash memleketi: últtyq qazyna men tarihi múra» atty jiyn ótti. Oǵan tarihshylar, ólketanushylar, ziyaly qauym ókilderi, Taldyqorǵan qalasyndaǵy orta mektep múǵalimderi, Iliyas Jansúgirov atyndaǵy Jetisu universitetiniń bilimgerleri qatysty.
Basqosuda Halyqaralyq «Alash» ádebi syilyǵynyń laureaty Jomart Igiman, tarih ǵylymdarynyń kandidaty Kúlimkóz Santaeva, jurnalist, «Jetisu ólketanushylar ortalyǵy» qoǵamdyq birlestiginiń tóraǵasy Qajet Andas mazmúndy bayandama jasady. Olar Múhamedjan Tynyshbaiúlynyń últ múraty jolyndaǵy eleuli eńbekterine, Alash ideyasyna adaldyǵyna, qazaq jeriniń tútastyǵy men el bolashaǵy jolyndaǵy azamattyq ústanymyna keńinen toqtaldy.
Qajet Andas óz bayandamasynda Múhamedjan Tynyshbaiúly múrasynyń óziniń shyǵarmashylyq jáne zertteushilik jolyna tigizgen yqpaly turaly aitty. Ol «Jerúiyq meken», «Qazaq jurnalistikasynyń jampozy», «SHalǵai auyl shyraǵy», «Úly dala shejiresi», «Jetisu óńiriniń quǵyn-súrgin qasireti», sondai-aq qazaqsha-oryssha jaryq kórgen «1916 jylǵy kóterilistiń baspasózdegi kórinisi» eńbekterin jazu barysynda Alash qairatkeriniń tarihi múrasy baǵyt-baǵdar bolǵanyn atap ótti. Sonymen qatar, Sayasi quǵyn-súrgin qúrbandaryn aqtau jónindegi komissiya qúramynda zertteu júmysyn júrgizgen kezde de Múhamedjan Tynyshbaiúly eńbekteriniń yqpaly erekshe bolǵanyn jetkizdi. Bayandama barysynda Abai oblystyq memlekettik arhivinde saqtalǵan «Saryarqa» gazetindegi Múhamedjan Tynyshbaiúlyna qatysty múraǵattyq derekterdi tanystyrdy. Sondai-aq, Jetisu oblystyq tarihi-mádeni múrany qorǵau ortalyǵy, M. Tynyshbaiúly atyndaǵy oblystyq tarihi-ólketanu muzeii, Sarqan audandyq tarihi-ólketanu muzeii jáne «Jetisu» ólketanushylar ortalyǵy qoǵamdyq birlestigi birlese otyryp, qairatker tuǵan óńirdegi tarihi eskertkishter men qasietti nysandardy tizimge alyp, olardyń tarihyn túgendeu júmysyn qolǵa alu turaly úsynys bildirdi.
Jiynda Alash qairatkeriniń nemeresi Elena Eskendirqyzy Tynyshbaeva sóz sóilep, áulet jadynda saqtalǵan estelikterimen bólisti. Múndai derekter tarihi túlǵanyń qoǵamdyq qyzmetimen qatar, adami bolmysyn, otbasylyq tárbiesin, úrpaq aldyndaǵy jauapkershiligin tereńirek tanuǵa múmkindik berdi. «Múhamedjan Tynyshbaev múrasy» qoǵamdyq qorynyń tóraǵasy, kásipker Sayat Esimhanov, Jetisu oblystyq M. Tynyshbaev qorynyń tóraǵasy, Iliyas Jansúgirov atyndaǵy Jetisu universitetiniń professory Bolat Moldabekov, muzei ardageri Tóleuhan Bitimbiev taǵylymy mol estelikterin aityp, tarihi derekterge toqtaldy. Olar túlǵanyń múrasyn zertteu, saqtau jáne keiingi úrpaqqa jetkizu máselesine erekshe nazar audardy.
Jiyn sońynda qatysushylar Múhamedjan Tynyshbaiúlynyń esimin úlyqtau, ǵylymi múrasyn júieli zertteu, jastar arasynda Alash qairatkerleriniń ómiri men eńbegin keńinen nasihattau baǵytyndaǵy júmystardy jalǵastyru qajettigin atap ótti.
Últ tarihyn úlyqtaǵan búl basqosu ótkendi eske alumen ǵana shektelmei, eldik sanany jańǵyrtatyn, jas úrpaqqa taǵylym beretin mańyzdy ruhani shara boldy.
«Q-Andas» aqparat agenttigi
