Әке-шешесі, бауырлары және отбасымен 2010 жылдары Қытай елінен атажұртқа қоныс аударған Жұманұр елге келген соң бірден Сырымбет ауылына орналасыпты.
– Алғаш келген жылдары елге, жерге үйренісіп, құжаттарымызды реттеп, толық орналасып алған соң кәсіптенуге ниет ауды. Арғы бетте жүргенде бала күнімізден әкемізден ағаш шабудың қыры мен сырын көріп өстік. Әкеміз де, атамыз да, арғы аталарымыз да ағаш шабуды кәсіп еткен екен. Олар көбіне ер шауып, қазақ үй, үйге керекті тұрмыстық бұйымдарды жасайтын. Бірақ ол жақта ағаш ыдыстарға сұраныс аз болатын.Бұл жерде қазақы оюланған ыдысқа деген сұраныстың көптігін көрген соң осы кәсіпті қолға алдым. Басында қолмен тегене ойып, табақ шауып, кесе жонып жүрдім. Кейін келе Қытайдан ағашты өрнектеп жонатын станок алдырғалы жұмысым жүріп, өнім молая түсті, – дейді жас шебер.
Жұманұр ағаш ыдыстарды қарағаштан жасайды. Оның айтуынша, қарағаштан ойылған ыдыстар сапалы, шыдамды және әдемі болып шығады екен. Материалды ауылдастарынан сатып алады.
– Менің қымыз құятын тегенем өтімді ыдыс қатарында. Өйткені оның жасалуы өте нәзік және шыдамдылық пен шеберлікті талап етеді. Оюлы ағаш ыдыс жасайтындардың көбі қымыз құятын тегененің жұмысының көптігіне бола көп жоламайды. Алматыдағы біраз азамат мен жасаған тегенелерімді сатып алып, көтерме бағада сатып жүр, – дейді ол.
Жұманұрдың ыдыстарына сұраныс көп. Жұмысын арғы бетке танымал ағаш шебері әкесі Шамен Каметұлы қадағалап отырады. Жас күнінен тұрмыстық бұйымдар, киіз үйдің ағаш материалдарын, ертоқымның түр-түрін жасап, оны кәсіпке айналдырғандықтан білетіні мол. Сол тәжірибесі бойынша ұлына үнемі ақыл-кеңес беріп тұрады.
– Үш ұл, бір қызымыз бар. Құдайға шүкір, бәрі ержетіп, өз алдына отау құрды. Өз кәсібі, мамандығы бойынша жұмысы бар. Менің жолымды ұстанған Жұманұр ғана. Бала кезінен осы кәсіпке қызықты. Қасымнан қалмай ағаш ою өнерінің қыры-сырына көз жүгіртіп өсті. Қазір жасымыз ұлғайып қалды. Сонда да Жұманұр оюлап берген ыдыстардың өрнегін әрлеп, іші-сыртын майлап, қолдан келгенше көмектесіп тұрамын, – дейді Шамен ақсақал.
«Ерінбегеннің өзегі талмайды» деген рас. Сырымбет ауылы облыс, аудан орталығынан шалғай орналасқан елді мекен. Бірақ Жұманұрдың өніміне деген сұраныс еліміздің әр өңірінен түсіп тұрады.
Расында, қазіргі нарық заманында тұтынушылар алатын затының сапасы мен қолайлылығына мән береді. Қаладасыз ба, ауылдасыз ба тұтынушының көңілінен шығатын өнім ұсынсаңыз іздеп тауып алады. Ал тауарды жеткізудің де жолы жеңілдей түсті. Бұл мүмкіндік Жұманұрды ынталандырып отыр.
Қажет АНДАС
