Qalanyń tynysy men kórkin qamtamasyz etip júrgen tazalyq saqshylary – qoǵamnyń kórinbeitin qaharmandary. Tań syz bere júmysqa kirisip, túrǵyndar oyanǵansha shahardy tazartyp úlgeretin jandardyń bir kúnine úńilip kórdik.
Saǵat alty shamasynda Taldyqorǵannyń kóshelerinde tirshilik bastalady. Kópshilik áli úiqyda bolǵanymen, kommunaldyq mekemelerdiń qyzmetkerleri qala tazalyǵyn saqtauǵa kirisip ketken. Biri jol jiegin sypyryp, biri arnaiy tehnikany aidap, shahardyń ár búryshyn tazartyp júredi.
– Biz úshin ár tań – jańa bastama. Qala taza bolsa, adamdardyń kóńil kúii de jaqsy bolady, – deidi eńbek ardageri Aiman apai kúlimdep.
Qala tazalyǵy – mádeniettiń ainasy. Kópshilik búl júmysty baiqamaidy, biraq dál osy eńbektiń arqasynda qala taza, jaily jáne kórikti bolyp túrady. Qalalyq tazalyq saqtau mekemelerinde júzdegen adam eńbek etedi. Olar kún saiyn kóshelerdi, aulalardy, sayabaqtardy, jaǵalaulardy tazartady. Arnaiy tehnika da úzdiksiz júmys isteidi.
– Bizdiń mindet – tek tazalyq emes, tártipti saqtau. Árbir aumaqqa jauapty brigada bar, josparly keste boiynsha júmys atqarylady, – deidi sheber Núrsúltan Jaqyp.
Tazalyq saqshylary úshin aua raiy mańyzdy emes. Qar, jańbyr, jel – bári de olardyń kúndelikti serigi. Olar qala túrǵyndarynyń qauipsizdigi úshin tún demei, kún demei eńbektenedi.
– Qatty ayazda da júmys toqtamaidy. Sebebi erteń adamdar taza kóshede júrui kerek, – deidi júmysshy Erlan.
Qala mádenieti tek ákimdikke nemese júmysshylarǵa emes, ár túrǵynǵa bailanysty. Qoqysty arnaiy jáshikke tastau, aulany taza ústau – kishkentai, biraq mańyzdy áreket. Sońǵy jyldary qalada ekologiyalyq aktsiyalar jii ótip, eriktiler men jastardyń belsendiligi artty. Búl – jańa ekosananyń qalyptasyp kele jatqanynyń belgisi.
Tazalyq saqshylary – kózge kórinbeitin, biraq qoǵamnyń tynysyn saqtaityn naǵyz eńbek adamdary. Olardyń tabandylyǵy men qarapaiym eńbegi – qalanyń kórki men túrǵyndardyń jailylyǵynyń kepili.
Qala kórki – eńbekte. Al sol eńbektiń iesi – osy qarapaiym, biraq abyroily jandar.
Avtor: Qajet ANDAS
Foto: Q-andas.kz
