Qaratal audanynda ruhaniyat pen ólketanu qúndylyqtaryn úlyqtaǵan taǵylymdy basqosu ótti. Audandyq mádeniet úii qyzmetkerleri men Qaratal audanynyń ortalyq kitaphanasy birlese úiymdastyrǵan «Bolmysy biik qalamger» atty kezdesu keshi oqyrman men qalamgerdi, tarih pen búgingi úrpaqty toǵystyrǵan mazmúndy sharaǵa ainaldy. Ruhani keshtiń qadirli qonaǵy qalamger, ólketanushy, jurnalist-zertteushi Qajet Andas boldy.
Kezdesuge audandyq ardagerler alqasynyń músheleri, analar keńesiniń tóraiymdary, kitaphana salasynyń qyzmetkerleri, ústazdar men oqyrmandar qatysty. Mazmúndy kesh el tarihyn, ruhaniyatty, ólketanu isin qúrmetteitin kópshilik úshin taǵylymdy áńgimege, oily pikirge toly boldy.
Qajet Andas – kórkem ádebiet, publitsistika jáne tarihi-ólketanu baǵytynda 37 kitaptyń avtory ári qúrastyrushysy. Ol úzaq jyldar boiy últtyq ruhaniyatty nasihattap, Jetisu óńiriniń tarihi múrasyn zertteu, úmyt qalǵan túlǵalardy tanytu, el jadyndaǵy qúndy derekterdi jinaqtau baǵytynda júieli eńbek etip keledi. Qalamgerdiń shyǵarmashylyq joly jurnalistik izdenispen, tarihi derekke adaldyqpen jáne tuǵan jerge degen perzenttik qúrmetpen úshtasyp jatyr.
Keshtiń shymyldyǵy ónermen ashylyp, kúishi Ershat Baiqadanúly qazaqtyń áigili kompozitory Núrǵisa Tilendievtiń «Jekpe-jek» kúiin oryndady. Kúidiń quatty saryny ruhani keshtiń mazmúnyn tereńdetip, jinalǵan kópshilikke erekshe áser syilady.
«Qajet Andas – ruhaniyat shyraqshysy» atty bólimde qalamger ortaǵa shaqyrylyp, óziniń shyǵarmashylyq jáne zertteushilik joly turaly keńinen áńgimeledi. Kezdesu barysynda «Jetisu» ólketanushylar ortalyǵy qoǵamdyq birlestiginiń maqsaty, mindeti jáne atqarǵan júmystary turaly beine tanystyrylym kórsetildi. Tanystyrylymda qoǵamdyq birlestiktiń tuǵan ólke tarihyn zertteu, tarihi-mádeni múralardy nasihattau, el ishindegi derekterdi jinaqtau, jas úrpaqtyń tarihi tanymyn arttyru baǵytyndaǵy júmystary qamtyldy.
Посмотреть эту публикацию в Instagram
Sonymen qatar «Jetisu» ólketanushylar ortalyǵy QB ólketanushylary baspadan shyǵaryp, elektrondy kitap qoryna engizgen eńbekter turaly arnaiy tanystyrylym jasaldy. Búl eńbekterdiń árqaisysy óńir tarihyn tanuǵa, tarihi túlǵalardy úlyqtauǵa, el jadynda saqtalǵan qúndy derekterdi kópshilikke jetkizuge baǵyttalǵany aityldy. Qalamger oqyrmandarǵa onlain kitaptaryna sholu jasap, elektrondy kitap qorynyń qoljetimdiligi men onyń bolashaq úrpaq úshin mańyzyn túsindirdi.
SHara ayasynda «Q-Andas» aqparat agenttiginiń resmi saity turaly da tanystyrylym ótti. Atalǵan aqparat alańynyń negizgi maqsaty – el tarihy, ólketanu, túlǵatanu, ruhaniyat, mádeniet jáne qoǵamdyq ómir taqyryptaryndaǵy tanymdyq materialdardy oqyrmanǵa úsynu ekeni aityldy. Sait arqyly óńir tarihyna qatysty maqalalar, zertteu eńbekteri, súhbattar men derekti materialdar keńinen nasihattalyp keledi.
Kezdesu barysynda Qaratal audany analar keńesiniń tóraǵasy Dosmaldanova Ulbolsyn Toilybaiqyzy sóz sóilep, qalamgerdiń ruhaniyatqa sińirip júrgen eńbegine rizashylyǵyn bildirdi. Ol múndai kezdesulerdiń jas úrpaqqa bereri mol ekenin, kitap pen qalamgerge qúrmet kórsetu eldik tárbieniń mańyzdy bir bóligi ekenin atap ótti.
Sondai-aq audan aqsaqaly Rahymqaly Ótegenúly jyly lebizin bildirip, Qajet Andastyń ólke tarihyn túgendeudegi eńbegine joǵary baǵa berdi. Aqsaqal qalamgerdiń el ishindegi eski áńgimelerdi, tarihi derekterdi, úmyt bola bastaǵan túlǵalar jaily málimetterdi jinaqtap, kitapqa ainaldyruy úlken jauapkershilik pen tabandylyqty qajet etetin eńbek ekenin jetkizdi.
Kezdesu sońynda Qajet Andas kitaphana qoryna 15 kitap syiǵa tartty. Búl kitaptar audan oqyrmandary úshin qúndy ruhani múra bolmaq. Kitaphana qyzmetkerleri úiymdastyrǵan «Jurnalist – shyndyqtyń shyraqshysy» atty kitap kórmesine bibliografiyalyq sholu jasalyp, kórme kópshilik nazaryna úsynyldy.
Kezdesuden keiin qalamger Qaratal audandyq tarihi-ólketanu muzeiinde bolyp, ondaǵy qúndy jádigerlermen tanysty. Muzei qoryndaǵy tarihi múralarmen júzdesu ólketanushy úshin erekshe áserli sátterdiń biri boldy. Sondai-aq Qúdainazar batyrdyń úrpaqtary Qajet Andas, Imash jáne Dohdyrbek Abdyrahman tauyp, saqtap, muzei qoryna tapsyrǵan túrki dáuirinen qalǵan balbal tastyń janynda estelik suretke tústi. Búl sát úrpaq sabaqtastyǵynyń, tarihi múraǵa degen qúrmettiń jáne tuǵan jer shejiresin saqtauǵa baǵyttalǵan ólketanushylyq eńbektiń aiqyn kórinisindei áser qaldyrdy.
«Bolmysy biik qalamger» atty kezdesu keshi tek bir avtordyń shyǵarmashylyǵyn tanystyrumen shektelmei, tuǵan jer tarihyn qúrmetteu, ruhani múrany saqtau, kitap oqu mádenietin dáripteu baǵytyndaǵy mańyzdy sharaǵa ainaldy. Qalamger men oqyrman arasyndaǵy ashyq áńgime, el tarihyna qatysty oily pikirler, muzeidegi tarihi jádigerlermen tanysu jáne ruhaniyatqa degen qúrmet búl kúnniń taǵylymyn arttyra tústi.
«Q-Andas» aqparattyq agenttigi
