قاراتال اۋدانىندا رۋحانيات پەن ولكەتانۋ قۇندىلىقتارىن ۇلىقتاعان تاعىلىمدى باسقوسۋ ءوتتى. اۋداندىق مادەنيەت ءۇيى قىزمەتكەرلەرى مەن قاراتال اۋدانىنىڭ ورتالىق كىتاپحاناسى بىرلەسە ۇيىمداستىرعان «بولمىسى بيىك قالامگەر» اتتى كەزدەسۋ كەشى وقىرمان مەن قالامگەردى، تاريح پەن بۇگىنگى ۇرپاقتى توعىستىرعان مازمۇندى شاراعا اينالدى. رۋحاني كەشتىڭ قادىرلى قوناعى قالامگەر، ولكەتانۋشى، جۋرناليست-زەرتتەۋشى قاجەت انداس بولدى.
كەزدەسۋگە اۋداندىق ارداگەرلەر القاسىنىڭ مۇشەلەرى، انالار كەڭەسىنىڭ ءتورايىمدارى، كىتاپحانا سالاسىنىڭ قىزمەتكەرلەرى، ۇستازدار مەن وقىرماندار قاتىستى. مازمۇندى كەش ەل تاريحىن، رۋحانياتتى، ولكەتانۋ ءىسىن قۇرمەتتەيتىن كوپشىلىك ءۇشىن تاعىلىمدى اڭگىمەگە، ويلى پىكىرگە تولى بولدى.
قاجەت انداس – كوركەم ادەبيەت، پۋبليتسيستيكا جانە تاريحي-ولكەتانۋ باعىتىندا 37 كىتاپتىڭ اۆتورى ءارى قۇراستىرۋشىسى. ول ۇزاق جىلدار بويى ۇلتتىق رۋحانياتتى ناسيحاتتاپ، جەتىسۋ ءوڭىرىنىڭ تاريحي مۇراسىن زەرتتەۋ، ۇمىت قالعان تۇلعالاردى تانىتۋ، ەل جادىنداعى قۇندى دەرەكتەردى جيناقتاۋ باعىتىندا جۇيەلى ەڭبەك ەتىپ كەلەدى. قالامگەردىڭ شىعارماشىلىق جولى جۋرناليستىك ىزدەنىسپەن، تاريحي دەرەككە ادالدىقپەن جانە تۋعان جەرگە دەگەن پەرزەنتتىك قۇرمەتپەن ۇشتاسىپ جاتىر.
كەشتىڭ شىمىلدىعى ونەرمەن اشىلىپ، كۇيشى ەرشات بايقادانۇلى قازاقتىڭ ايگىلى كومپوزيتورى نۇرعيسا تىلەنديەۆتىڭ «جەكپە-جەك» كۇيىن ورىندادى. كۇيدىڭ قۋاتتى سارىنى رۋحاني كەشتىڭ مازمۇنىن تەرەڭدەتىپ، جينالعان كوپشىلىككە ەرەكشە اسەر سىيلادى.
«قاجەت انداس – رۋحانيات شىراقشىسى» اتتى بولىمدە قالامگەر ورتاعا شاقىرىلىپ، ءوزىنىڭ شىعارماشىلىق جانە زەرتتەۋشىلىك جولى تۋرالى كەڭىنەن اڭگىمەلەدى. كەزدەسۋ بارىسىندا «جەتىسۋ» ولكەتانۋشىلار ورتالىعى قوعامدىق بىرلەستىگىنىڭ ماقساتى، مىندەتى جانە اتقارعان جۇمىستارى تۋرالى بەينە تانىستىرىلىم كورسەتىلدى. تانىستىرىلىمدا قوعامدىق بىرلەستىكتىڭ تۋعان ولكە تاريحىن زەرتتەۋ، تاريحي-مادەني مۇرالاردى ناسيحاتتاۋ، ەل ىشىندەگى دەرەكتەردى جيناقتاۋ، جاس ۇرپاقتىڭ تاريحي تانىمىن ارتتىرۋ باعىتىنداعى جۇمىستارى قامتىلدى.
Посмотреть эту публикацию в Instagram
سونىمەن قاتار «جەتىسۋ» ولكەتانۋشىلار ورتالىعى قب ولكەتانۋشىلارى باسپادان شىعارىپ، ەلەكتروندى كىتاپ قورىنا ەنگىزگەن ەڭبەكتەر تۋرالى ارنايى تانىستىرىلىم جاسالدى. بۇل ەڭبەكتەردىڭ ارقايسىسى ءوڭىر تاريحىن تانۋعا، تاريحي تۇلعالاردى ۇلىقتاۋعا، ەل جادىندا ساقتالعان قۇندى دەرەكتەردى كوپشىلىككە جەتكىزۋگە باعىتتالعانى ايتىلدى. قالامگەر وقىرماندارعا ونلاين كىتاپتارىنا شولۋ جاساپ، ەلەكتروندى كىتاپ قورىنىڭ قولجەتىمدىلىگى مەن ونىڭ بولاشاق ۇرپاق ءۇشىن ماڭىزىن ءتۇسىندىردى.
شارا اياسىندا «Q-Andas» اقپارات اگەنتتىگىنىڭ رەسمي سايتى تۋرالى دا تانىستىرىلىم ءوتتى. اتالعان اقپارات الاڭىنىڭ نەگىزگى ماقساتى – ەل تاريحى، ولكەتانۋ، تۇلعاتانۋ، رۋحانيات، مادەنيەت جانە قوعامدىق ءومىر تاقىرىپتارىنداعى تانىمدىق ماتەريالداردى وقىرمانعا ۇسىنۋ ەكەنى ايتىلدى. سايت ارقىلى ءوڭىر تاريحىنا قاتىستى ماقالالار، زەرتتەۋ ەڭبەكتەرى، سۇحباتتار مەن دەرەكتى ماتەريالدار كەڭىنەن ناسيحاتتالىپ كەلەدى.
كەزدەسۋ بارىسىندا قاراتال اۋدانى انالار كەڭەسىنىڭ توراعاسى دوسمالدانوۆا ۋلبولسىن تويلىبايقىزى ءسوز سويلەپ، قالامگەردىڭ رۋحانياتقا ءسىڭىرىپ جۇرگەن ەڭبەگىنە ريزاشىلىعىن ءبىلدىردى. ول مۇنداي كەزدەسۋلەردىڭ جاس ۇرپاققا بەرەرى مول ەكەنىن، كىتاپ پەن قالامگەرگە قۇرمەت كورسەتۋ ەلدىك تاربيەنىڭ ماڭىزدى ءبىر بولىگى ەكەنىن اتاپ ءوتتى.
سونداي-اق اۋدان اقساقالى راحىمقالى وتەگەنۇلى جىلى لەبىزىن ءبىلدىرىپ، قاجەت انداستىڭ ولكە تاريحىن تۇگەندەۋدەگى ەڭبەگىنە جوعارى باعا بەردى. اقساقال قالامگەردىڭ ەل ىشىندەگى ەسكى اڭگىمەلەردى، تاريحي دەرەكتەردى، ۇمىت بولا باستاعان تۇلعالار جايلى مالىمەتتەردى جيناقتاپ، كىتاپقا اينالدىرۋى ۇلكەن جاۋاپكەرشىلىك پەن تاباندىلىقتى قاجەت ەتەتىن ەڭبەك ەكەنىن جەتكىزدى.
كەزدەسۋ سوڭىندا قاجەت انداس كىتاپحانا قورىنا 15 كىتاپ سىيعا تارتتى. بۇل كىتاپتار اۋدان وقىرماندارى ءۇشىن قۇندى رۋحاني مۇرا بولماق. كىتاپحانا قىزمەتكەرلەرى ۇيىمداستىرعان «جۋرناليست – شىندىقتىڭ شىراقشىسى» اتتى كىتاپ كورمەسىنە بيبليوگرافيالىق شولۋ جاسالىپ، كورمە كوپشىلىك نازارىنا ۇسىنىلدى.
كەزدەسۋدەن كەيىن قالامگەر قاراتال اۋداندىق تاريحي-ولكەتانۋ مۋزەيىندە بولىپ، ونداعى قۇندى جادىگەرلەرمەن تانىستى. مۋزەي قورىنداعى تاريحي مۇرالارمەن جۇزدەسۋ ولكەتانۋشى ءۇشىن ەرەكشە اسەرلى ساتتەردىڭ ءبىرى بولدى. سونداي-اق قۇداينازار باتىردىڭ ۇرپاقتارى قاجەت انداس، يماش جانە دوحدىربەك ابدىراحمان تاۋىپ، ساقتاپ، مۋزەي قورىنا تاپسىرعان تۇركى داۋىرىنەن قالعان بالبال تاستىڭ جانىندا ەستەلىك سۋرەتكە ءتۇستى. بۇل ءسات ۇرپاق ساباقتاستىعىنىڭ، تاريحي مۇراعا دەگەن قۇرمەتتىڭ جانە تۋعان جەر شەجىرەسىن ساقتاۋعا باعىتتالعان ولكەتانۋشىلىق ەڭبەكتىڭ ايقىن كورىنىسىندەي اسەر قالدىردى.
«بولمىسى بيىك قالامگەر» اتتى كەزدەسۋ كەشى تەك ءبىر اۆتوردىڭ شىعارماشىلىعىن تانىستىرۋمەن شەكتەلمەي، تۋعان جەر تاريحىن قۇرمەتتەۋ، رۋحاني مۇرانى ساقتاۋ، كىتاپ وقۋ مادەنيەتىن دارىپتەۋ باعىتىنداعى ماڭىزدى شاراعا اينالدى. قالامگەر مەن وقىرمان اراسىنداعى اشىق اڭگىمە، ەل تاريحىنا قاتىستى ويلى پىكىرلەر، مۋزەيدەگى تاريحي جادىگەرلەرمەن تانىسۋ جانە رۋحانياتقا دەگەن قۇرمەت بۇل كۇننىڭ تاعىلىمىن ارتتىرا ءتۇستى.
«Q-Andas» اقپاراتتىق اگەنتتىگى
