Bala kezimizde ájemizdiń ádemi ertegilerin estip óstik. Onyń ishinde kúlkige qaryq qylatyn hikayalar da, qorqynysh úyalatatyny da, názik sezimińdi alys armanǵa jetekteitini de kezdesetin.
Patshanyń júkti bolǵan kishi áieli jolbarystyń júregine jerik bolypty.
– Osyny tauyp ákelgen adamǵa súlu qyzymdy jáne patshalyǵymnyń teń jartysyn bólip beremin! – dep jarlyq etipti han.
Búl jolda talai adam mert bolyp, sońynda hanshaiymǵa búrynnan ǵashyq bolyp júrgen tazsha bala sansyz qiyndyqty basynan keshire júrip tapsyrmany tolyǵymen oryndap múratyna jetken eken. Osy ertegini estigende ájeptáuir oilanyp qalushy edik. Bizge de sondai bir baqyt búiyrsa dep armandaǵan kezderimizde bolǵan.
Al mektep tabaldyryǵyn attaǵannan keiingi jaǵdai múlde basqasha boldy. Iá, mektep-bilim ordasy. Dei túrǵanmen, ol bir kezderi qyzyl ókimettiń qúraly retinde júmys atqaryp keldi. Biz sol atyshúly biliktiń qany jerge tambai túrǵan jyldary erjetken túlektermiz, alǵan tárbiemiz de sol taptyń belgilep bergen syzyǵynan shyǵyp ketken joq. Ol kezde álginde aitylǵan ertegini bizge ústem taptyń eńbekshi búqarany ezip-qanǵanynyń sipaty retinde túsindirip, ózge últtyń jyltyraǵyn sanamyzǵa tyqpalady. Sonyń áserinen qasterli taǵylymdarymyzdan bezinip, ózimizdi keremet qaiyrymyy mol qoǵamda tuylǵan úrpaqpyz-au dep óstik.
Ótkenge salauat. Táuelsiz el boldyq, ótken tarihymyzdy, ondaǵy múramyzdy qaitadan zerdeleitin kez keldi. Rasynda, biz kóp nársege basqalardyń kózimen qarap kelippiz. Asyldarymyzdy jasyq etip, bar bailyǵymyzdyń baǵasyna jete qoimappyz. “Jolbarystyń júregine jerik bolǵan” deitin termindi eshbir últtyń múrasynan kezdestirmedim. Qysqasy, osy bir auyz sóz bizdiń qaisar halqymyzdyń kir shalmas qasieti sekildi. Múnda últtyń úlandaryn jaryq dúniege ákeletin analarǵa degen qúrmet, ayalau, asqaq úmit, júkti analarǵa qoldan keler barlyq jaqsy jaǵdaidy jasau kerek deitin mindet, últ keleshegine arqalatar auyr jauapkershilik jatyr eken-au. Búl – bárinen ana múratyn biik sanaityn halyqtyń hatqa túspegen pálsapasy, ol – “jatyry jamannyń jatysy nashar bolady” dep keletin úǵymnyń tórkini. Onyń arǵy astarynda qaljaǵa erkek toqty soyu syndy qazaq halqyna ǵana tán dástúr bar, múnyń bári sabaqtasa kelip úrpaqty bárinen úlyq kóretin últtyq úǵym shyǵady. Jolbarystan da júrekti úldy tek jolbarystyń júregine jerik bolǵan halyq tudyra alady degen oi. Tól tarihymyzdyń tek batyrlardyń atymen qosa jyrlanatyndyǵy osy jaǵdaiǵa bailanysty shyǵar.
Qajet Andas
«Q-andas» aqparattyq agenttigi.











