بالا كەزىمىزدە اجەمىزدىڭ ادەمى ەرتەگىلەرىن ەستىپ وستىك. ونىڭ ىشىندە كۇلكىگە قارىق قىلاتىن حيكايالار دا، قورقىنىش ۇيالاتاتىنى دا، نازىك سەزىمىڭدى الىس ارمانعا جەتەكتەيتىنى دە كەزدەسەتىن.
پاتشانىڭ جۇكتى بولعان كىشى ايەلى جولبارىستىڭ جۇرەگىنە جەرىك بولىپتى.
– وسىنى تاۋىپ اكەلگەن ادامعا سۇلۋ قىزىمدى جانە پاتشالىعىمنىڭ تەڭ جارتىسىن ءبولىپ بەرەمىن! – دەپ جارلىق ەتىپتى حان.
بۇل جولدا تالاي ادام مەرت بولىپ، سوڭىندا حانشايىمعا بۇرىننان عاشىق بولىپ جۇرگەن تازشا بالا سانسىز قيىندىقتى باسىنان كەشىرە ءجۇرىپ تاپسىرمانى تولىعىمەن ورىنداپ مۇراتىنا جەتكەن ەكەن. وسى ەرتەگىنى ەستىگەندە اجەپتاۋىر ويلانىپ قالۋشى ەدىك. بىزگە دە سونداي ءبىر باقىت بۇيىرسا دەپ ارمانداعان كەزدەرىمىزدە بولعان.
ال مەكتەپ تابالدىرىعىن اتتاعاننان كەيىنگى جاعداي مۇلدە باسقاشا بولدى. ءيا، مەكتەپ-ءبىلىم ورداسى. دەي تۇرعانمەن، ول ءبىر كەزدەرى قىزىل وكىمەتتىڭ قۇرالى رەتىندە جۇمىس اتقارىپ كەلدى. ءبىز سول اتىشۇلى بيلىكتىڭ قانى جەرگە تامباي تۇرعان جىلدارى ەرجەتكەن تۇلەكتەرمىز، العان تاربيەمىز دە سول تاپتىڭ بەلگىلەپ بەرگەن سىزىعىنان شىعىپ كەتكەن جوق. ول كەزدە الگىندە ايتىلعان ەرتەگىنى بىزگە ۇستەم تاپتىڭ ەڭبەكشى بۇقارانى ەزىپ-قانعانىنىڭ سيپاتى رەتىندە ءتۇسىندىرىپ، وزگە ۇلتتىڭ جىلتىراعىن سانامىزعا تىقپالادى. سونىڭ اسەرىنەن قاستەرلى تاعىلىمدارىمىزدان بەزىنىپ، ءوزىمىزدى كەرەمەت قايىرىمىى مول قوعامدا تۋىلعان ۇرپاقپىز-اۋ دەپ وستىك.
وتكەنگە سالاۋات. تاۋەلسىز ەل بولدىق، وتكەن تاريحىمىزدى، ونداعى مۇرامىزدى قايتادان زەردەلەيتىن كەز كەلدى. راسىندا، ءبىز كوپ نارسەگە باسقالاردىڭ كوزىمەن قاراپ كەلىپپىز. اسىلدارىمىزدى جاسىق ەتىپ، بار بايلىعىمىزدىڭ باعاسىنا جەتە قويماپپىز. “جولبارىستىڭ جۇرەگىنە جەرىك بولعان” دەيتىن تەرميندى ەشبىر ۇلتتىڭ مۇراسىنان كەزدەستىرمەدىم. قىسقاسى، وسى ءبىر اۋىز ءسوز ءبىزدىڭ قايسار حالقىمىزدىڭ كىر شالماس قاسيەتى سەكىلدى. مۇندا ۇلتتىڭ ۇلاندارىن جارىق دۇنيەگە اكەلەتىن انالارعا دەگەن قۇرمەت، ايالاۋ، اسقاق ءۇمىت، جۇكتى انالارعا قولدان كەلەر بارلىق جاقسى جاعدايدى جاساۋ كەرەك دەيتىن مىندەت، ۇلت كەلەشەگىنە ارقالاتار اۋىر جاۋاپكەرشىلىك جاتىر ەكەن-اۋ. بۇل – بارىنەن انا مۇراتىن بيىك سانايتىن حالىقتىڭ حاتقا تۇسپەگەن ءپالساپاسى، ول – “جاتىرى جاماننىڭ جاتىسى ناشار بولادى” دەپ كەلەتىن ۇعىمنىڭ توركىنى. ونىڭ ارعى استارىندا قالجاعا ەركەك توقتى سويۋ سىندى قازاق حالقىنا عانا ءتان ءداستۇر بار، مۇنىڭ ءبارى ساباقتاسا كەلىپ ۇرپاقتى بارىنەن ۇلىق كورەتىن ۇلتتىق ۇعىم شىعادى. جولبارىستان دا جۇرەكتى ۇلدى تەك جولبارىستىڭ جۇرەگىنە جەرىك بولعان حالىق تۋدىرا الادى دەگەن وي. ءتول تاريحىمىزدىڭ تەك باتىرلاردىڭ اتىمەن قوسا جىرلاناتىندىعى وسى جاعدايعا بايلانىستى شىعار.
قاجەت انداس
«Q-andas» اقپاراتتىق اگەنتتىگى.











