تۇرسىناجى:
جينالىپ كۇنەستىڭ بار جىرشىلارى،
كوڭىل كۇيىن بۇركەۋسىز ءبىر شىعاردى.
المالىدان كەلىپسىڭ اقىن بولىپ،
ءبىراز ولەڭ ايتايىق، تۇرسىناجى.
ۇرپاعىمىز جالىندى كوركەم ەلدىڭ،
ءبىرىمىز عوي حالىق ءۇشىن تەر توگەردىڭ.
باستاۋىندا جەڭىستىڭ قولعا كەلگەن،
جەتىستىگىن اۋلىڭنىڭ شەرتە بەرگىن.
جاڭا ءداۋىر بىزدەرگە ەرىك بەردى،
اقتارىلسىن اۋزىڭنان ەركە ولەڭىڭ.
انداس:
ءۇنىن اشتى بۇل ءداۋىر تىيىلعاننىڭ،
باسىمىزدان ايىقتى جيىلعان مۇڭ.
بۇگىن بارلىق دۇنيە قولىمىزدا،
بۇرىن يەسى بولدىق تەك بۇيىرعاننىڭ.
باي مەن ماناپ ءبۇلدىرىپ سانات ەلدى،
ۋلى ءزارىن حالقىما تاراتتى ەزدى.
ەلدىڭ قامىن كوكسەگەن تالايلاردى،
تۇنشىقتىردى جاۋىنگەر تالاپكەردى.
تۇرسىناجى:
ارىندادى كۇرەستىڭ دابىلدى ءۇنى،
شامشىراعى باقىتتىڭ جاعىلدى ۇلى.
شەتتە جۇرگەن كەشەگى جارلىلاردىڭ،
تىڭ جورىقتىڭ تورىنەن تابىلدى ۇلى.
كوپشىلىكتىڭ كوڭىلىن نۇرلاندىردى،
موينىمىزدان شاقتى دا اجىرعىنى.
انداس:
قادامىمىز كەلىستى بولا السا نىق،
قيىندارعا جاسقانباي قول ارتالىق.
مىنا كوپتىڭ كوڭىلىن تاباتۇعىن،
بۇل جولى ءبىراز جاقسى وي ايتالىق.
تاعى دا ولەڭ ايتارمىز تولىقتانىپ،
بولاشاققا بارامىز جورىق انىق.
وڭالتۋعا ەلىمنىڭ بولاشاعىن،
بىرگە كۇرەس جاسايىق قول ۇستاسىپ.
تۇرسىناجى:
انداس اقىن شىن جاقسى مىنا ولەڭىڭ،
ايتۋىڭدى تاعى دا تىلەر ەدىم.
قانا بەرسىن، قۇمارىم قانا بەرسىن،
قالقي بەرشى جىرىڭنىڭ كىلەگەيىن.
تىلەيمىن مەن قۇلاشتى سەرمەۋىڭدى،
ولەڭمەنەن اسقارعا ورلەۋىڭدى.
ايتىپ بەرشى ەلىڭدى وركەندەتەر،
كىلتى نەدە ءتۇبىرلى ەڭ نەگىزگى.
انداس:
بويىمىزدا بار جىگەر ەرىكتىلىك،
جۇگىمىز مول وتىرمىز كورىپ، ءبىلىپ.
جاقسى اپارۋ ءۇش ۇلى زور كۇرەستى،
كۇرەسەيىك ءبىر مايداندا بەرىك تۇرىپ.
ەلىمىزگە نۇر قۇيدى ارايلى اسپان،
بولىپ جاتىر ءبىر كۇنىم تالاي داستان.
جاڭا ءداۋىر مىندەتى وتان قۇرۋ،
وسى ءومىر عوي مەنىڭ دە سانامدى اشقان.
تۇرسىناجى:
تانىستىرشى تاعى دا دۇيلەرىڭدى (بولىمشە)،
قالاي قانات جايدىردى ۇيرەنۋدى.
سەگىز تارماق بەلگىلەمە نەگە شىقتى،
ايتا كەتشى بۇل جايلى بىلگەنىڭدى.
تەڭىزىندە ءومىردىڭ تالماي ءجۇزۋ،
اقىن جانعا كەرەك قوي سامعاي ءبىلۋ.
نەشە ءتۇرلى ايتا كەت بىردەن تەرىپ،
ولشەمدەرىن مادەنيەتتى اۋدان قۇرۋ.
انداس:
ءوزىڭ ايتقان ىرىستى كۇنەسىمە،
قاراي قالساڭ شاتتانىپ كۇلەسىڭ دە.
از-اق جىلدا كوپ تابىس جاراتىلدى،
قۇلدىق قامىتىن لاقتىرىپ كۇرەسىنگە.
حالقىم، مىنە، تاي-تاستى جايناتۋدا،
كۇندىز-ءتۇنى بەل شەشپەي كۇرەسۋدە.
كەشەگى قيىن كۇندەر راسىمەن،
مەنىڭداعى وشپەستەي تۇر ەسىمدە.
جاڭا زاڭنان جانعا كۇش تاپتىم بەكىم،
تابىسىپەنەن تاريحتىڭ اشتىم بەتىن.
العا قويعان ماقساتىم وسى مەنىڭ،
جالعاستىرۋ ەلىمىزدىڭ باس مىندەتىن.
دەرەككوز: دودا: (ايتىستار مەن تاريحي-ەتنوگرافيالىق جىرلارى) / ا. وماراقىن ؛ [قۇراستىرعان: ءا. ماجاي [ج. ب.] .- تالدىقورعان : [ب. ج.]. https://kazneb.kz/kk/catalogue/view/1657687
“Q-Andas” اقپاراتتىق اگەنتتىگى











