كورمەدە قاتىسۋشىلارعا ەلىمىزدەگى ءتۇرلى ەتنوستاردىڭ تاريحى مەن تۇرمىس-تىرشىلىگىن بەينەلەيتىن ۇلتتىق كيىمدەر، قولونەر بۇيىمدارى، مۋزىكالىق اسپاپتار، تاريحي فوتوسۋرەتتەر مەن سيرەك كەزدەسەتىن جادىگەرلەر ۇسىنىلدى.
ءىس-شارانى وبلىستىق «قوعامدىق كەلىسىم» كمم ديرەكتورى ەركەبۇلان ەشمۇحامبەتۇلى اشىپ، ەل بىرلىگى مەن كەلىسىمنىڭ ماڭىزى تۋرالى قۇتتىقتاۋ ءسوز سويلەدى. سونىمەن قاتار، قازاقستان حالقى اسسامبلەياسى جانىنداعى ەتنوجۋرناليستەر كلۋبتىڭ توراعاسى اتساليم يديگوۆ، الماتى وبلىستىق ازەربايجان ۇلتتىق-مادەني ورتالىعىنىڭ توراعاسى فاحرەدين ماگەرراموۆ، جانە وبلىستىق ورىس ورتالىعىنىڭ ءتورايىمى لاريسا كوتەلنيكوۆا قاتىسۋشىلارعا ءوز تىلەكتەرىن ءبىلدىردى.
كورمە اياسىندا قازاقستان حالقى اسسامبلەياسىنىڭ مۇشەسى، جەتىسۋ وبلىستىق ۇيعىر ەتنومادەني ورتالىعىنىڭ توراعاسى تۇرعان زايتوۆپەن سۇحباتتاسىپ ەدىك.
– ماقساتىمىز – جەتىسۋ جەرىندە تۇرىپ جاتقان ءتۇرلى ەتنوستار اراسىنداعى تاتۋلىق پەن بىرلىكتى، مادەنيەت پەن ءداستۇردىڭ بايلىعىن كورسەتۋ. ءار ۇلتتىڭ ءوز ونەرى مەن سالت-ءداستۇرى بار. ءبىز سولاردى ورتاق الاڭدا تانىستىرىپ، دوستىق كوپىرىن نىعايتقىمىز كەلەدى. كورمەگە جەتىسۋ وبلىسىنان جيىرما ءتورت ەتنومادەني بىرلەستىك قاتىسىپ وتىر. وسىنداي شارالار ەلدەگى تۇراقتىلىق پەن ىنتىماقتىڭ ايقىن كورىنىسى، – دەدى ول.
سوڭىندا قاتىسۋشىلار ەتنومادەني كورمەنى ارالاپ، ۇلتتىق ناقىشتاعى بۇيىمدار مەن ونەر تۋىندىلارىن تاماشالادى.
