باققوجا مۇقايدىڭ بىرنەشە شىعارماسىنىڭ ساحنا تورىندە ءوز كورەرمەندەرىن تاۋىپ جۇرگەنىن ءبارىمىز بىلەمىز. ارينە، ويى ورامدى، شىعارماشىلىعى سۇڭعاق اۆتوردىڭ اتالعان تۋىندىسىن قاي قىرىنان قاراپ باعالاساڭ دا ۇلكەن ويعا جۇك بولارى انىق. مۇندا قازاقتىڭ جومارتتىعى جانىنا جاراسقان ءبىر وتباسىنىڭ تىرلىگى ءسوز بولادى. قولى اشىق، پەيىلى دارحان وتاعاسى تاستاندى بالا، ءزابىر شەككەن انا، جۇرەگى جارالى ايەل، تاعى باسقا تىرلىكتىڭ تەپەرىشىن كورىپ جۇرگەن ادامدارعا كومەكتەسۋدى ادەتىنە اينالدىرعان. بۇل سول وتاعاسىنىڭ بويىنان كورىنىس تاپقان قازاق حالقىنا عانا ءتان ۇلتتىق قاسيەت ەدى. الايدا، بۇگىنگى مىناۋ الماعايىپ زامان سول كەڭپەيىل جانداردىڭ دا ساناسىن لايلاي باستاعانى انىق. جومارت كوڭىلدىڭ كومەسكىدەگى جاۋى – بايلىقتىڭ ازدىرۋىمەن، ءازازىل بولىپ شىعا كەلەتىن دۇنيەقوڭىزدىق ەكەنىن اۆتور اشىنا جازادى. بىراق، زامان قالاي قۇبىلسا دا، ادام قالاي وزگەرسە دە ومىردە بىرعانا وزگەرمەيتىن شىندىق بار. ول “ارىم جانىمنىڭ ساداعاسى” دەيتىن قازاق دەگەن حالىقتىڭ “اردى” زاڭنان دا بيىك سانايتىن فيلوسوفيالىق قاعيدانى انىقتاپ بەرەدى. جاراسىمدى وتباسى مەن تەرەڭ سۇيىسپەنشىلىكتە ءبىزدىڭ ازاماتتار مەن ارۋلارعا ءتان ەكەنىن ساناعا سىنالاپ سىڭىرۋمەن دە قۇندى.
اۆتورى – باققوجا مۇقاي
قويۋشى رەجيسسەرى – مۇرات احمانوۆ، قر ەڭبەك سىڭىرگەن ءارتيسى
قويۋشى سۋرەتشى – قامزا قايىرباەۆ، قر مادەنيەت قايراتكەرى
مۋزىكامەن كوركەمدەگەن – ءا. ءتىنالى، قر ەڭبەك سىڭىرگەن قايراتكەرى
قالاي ايتساق تا، قويىلىم ساحناعا تىلەنىپ تۇر. سوندىقتان دا كورەرمەندەردىڭ كوڭىلىنەن شىقتى. كۇلىپ وتىرىپ ۇيالعان، جىلاپ وتىرىپ ويلانعاندار كوپ بولدى. وعان قويۋشى رەجيسسەر مۇرات احمانوۆ پەن قويۋشى سۋرەتشى قامزا قايىرباەۆتىڭ كوپ تەر توككەنى انىق. ەندى ءبىر جاعىنان سپەكتاكلدەگى رولدەردى بىرىنەن ءبىرىن ءبولىپ نەمەسە باس، قوسىمشا كەيىپكەر دەپ اجىراتىپ جاتۋدىڭ كەرەگى جوق، بارلىعىنىڭ ومىردە ءوز ورنى بار. بىراق اكتەرلەردىڭ شەبەرلىگىنە ءتانتى بولاسىڭ. اق كوڭىل زاڭعار ءرولىن جەڭىس جولدىباەۆ، اياۋلى جار نازگۇلدى حازيما نۇعىمانوۆا سۇمدادى. ساندۋعاش نۇعىمانوۆا – گۇلناز، مۇراتجان ماحمۇتۇلى – قامبار، ءاليحان ىدىرىشەۆا – گۇلشارا اجەي، نۇرلان ءالبوسىنوۆ – شوراباي اقساقال بولىپ شىعا كەلدى. قارا سومقەسىن قىسىپ ۇستاپ كەلە جاتاتىن قالي رولىندە اباي نۇعىمانوۆ، قاتەلىگىن كەيىندەپ تانىعان كەلىنشەكتى روزا قاپەشەۆا ادەمى ورىنداپ شىقتى. مىنە، وسى اكتەرلار ەڭبەگى قازاق ۇلتىنا ءتان اسقان جومارتتىقتىڭ بۇگىنگى تاڭداعى كۇردەلى قايشىلىقتارعا ۇيلەسە بەرمەيتىن اڭقاۋلىق جاعىن اشىپ بەرەدى. بۇل رولدەردى ءالى تالاي اكتەرلەر قايتالايتىن شىعار، دەسە دە، بۇگىنگى قويىلىم ءوز قۇندىلىعىمەن كورەرمەننىڭ كوڭىلىندە قالعانى انىق.
ءبىزدىڭ حالقىمىزدىڭ سان عاسىرلىق الاپاتتان امان-ەسەن ءوتىپ، بۇگىنگى ەڭسەلى ەل بولىپ وتىرۋىنىڭ ءبىرى، حالقىمىزدىڭ ۇلتتىق ونەرىن قاستەر تۇتقاندىعى. تەاتردىڭ قويۋشى رەجيسسەرى مۇرات احمانوۆتىڭ سوزىنە سۇيەنسەك، قازىر قازاق جاستارىنىڭ ونەرگە دەگەن قىزىعۋشىلىعى ارتىپ كەلەدى. وعان سەبەپ، سوڭعى جىلدارى تەاتر ۇجىمى بىرنەشە تىڭ دۇنيەنى ساحنالاعان. الداعى جوسپارلارى دا از ەمەس، دەسە دە، تەاتر ساحناسىنا كەرەگى “تويى كوپ ءۇي” سياقتى ويى مەن ورامى جاراسقان كوركەم شىعارما. ءبىزدىڭ قوعامعا كەرەگى دە وسى.
قاجەت انداس
دەرەككوز: “جەتىسۋ” گازەتى، №20، بەاسەنبى، 24 اقپان 2009 جىل.
