مەن اتاقتى تانەكە باتىردىڭ تىكەلەي ۇرپاعى ەسىمبەك قاجىنىڭ نەمەرەسى راقىمقازى 1928 جىلى قاپال كەنتىندە دۇنيەگە كەلدىم. بۇل ستاليندىك رەپرەسسيا حالىقتىڭ باسىنا كەشىرىلمەس ىلاڭ سالعان تۇس ەدى.
مەنىڭ اكەم جۇمابەك ۇستالىپ، جامبىل قالاسىندا تۇرمەگە جابىلدى. ال اكەمنىڭ اعاسى قوجابەك الماتىدا اتىلدى. جۇمابەك تە، قوجابەك تە ەشقانداي «حالىق جاۋى» ەمەس ەدى. بار جازىعى تانەكە-ەسىمبەكتەردىڭ ۇرپاعى بولعاندىعى. ولار بۇيرىقتى داۋلەتىن اعايىن مەن جارلى-جاقىبايدان اياماي، ورتاعا سالىپ جۇرەتىن ەر ازاماتتار ەدى. كەزىندە ەل اراسىندا قوجابەكتىڭ اشارشىلىقتا حالقىنا پانا بولعانى، ونى قايىرشىلىق پەن اشتىقتان ساقتاۋ ءۇشىن كوپ قايىرىم كورسەتكەن ازاماتتىعى تۋرالى ولەڭ، جىرلار شىعارىلعان.
1932 جىلى اكەم جۇمابەك تۇرمەدەن قاشىپ شىعىپ، ءبىر تۇندە وزىنە قاراستى اعايىنىن قىتايعا الىپ وتەدى. ول قايتسە دە، ءوز ۇرپاعىن اشتىق پەن قياناتتان اۋلاق ۇستاۋدى عانا ماقسات ەتكەن ەدى. الايدا جات جەردە دە جاعداي ءماز بولمادى. وندا دا جوقشىلىق، اڭدۋ، ىزگە ءتۇسۋ، تۇرمەگە جابۋ، اتۋ-ساتۋ ورلەپ تۇردى. تانەكە باتىر مەن ەسىمبەك بي ەسىمدەرىن اۋىزعا الۋعا تىيىم سالىندى. ول كۇندەردى ەسكە الۋ مەن ءۇشىنت وتە اۋىر.
اكەم دە، انام دا تۋعان ەلگە، جەرگە ورالۋدى ارمان ەتپەگەن كۇن بولعان ەمەس. «قايران جەتىسۋدىڭ تاۋلارى مەن جايلاۋىن كورىپ، تازا سۋىن تاتاتىن كۇن بولا ما؟» – دەپ اھ ۇراتىن.
تەك 1955 جىلى عانا كوپتەگەن قيىندىقتارمەن كىندىك كەسىپ، كىر جۋعان جەرىمىزگە ورالدىق. كەيىننەن تاۋەلسىزدىك ارقاسىندا بىرتە-بىرتە تاريحىمىز قايتا جاندانىپ، وشكەنىمىز جانىپ، ولگەنىمىز تىرىلگەندەي بولدى.
قاپال كەنتىندە ولكەتانۋ مۇراجايىن ۇيىمداستىرىپ، وندا تانەكە باتىردىڭ، ەسكەلدى ءبيدىڭ ەسىمدەرىن قايتا تىرىلتكەن. الىباەۆ مارات دەگەن ازاماتقا العىسىمىزدى ايتىپ جەتكىزە الماسپىز. اسىرەسە ەسكەلدى ءبيدىڭ 300 جىلدىعىنا ارناپ بەرىلگەن اسقا جينالعان ەل الىباەۆ ماراتقا ۇشان-تەڭىز ريزاشىلىعىن ءبىلدىردى. سول قارساڭداعى اۋدان اكىمى ت. مەدەتبەكوۆ تە كوپ ەڭبەك ەتىپ، ەسكەلدى-تانەكە سىندى بابالار رۋحىن پاش ەتتى.
مەن ءوزىمنىڭ تانەكەدەي ۇلىلاردىڭ جالعاسى ەكەنىمدى ماقتان تۇتامىن. مەنىڭ ۇلى بابام تانەكە بولعاندا، ۇلى اجەم ۇلباي – ەسكەلدى ءبيدىڭ ۇرپاعى.
راقىمقازى ەسىمبەكوۆ
ۇرپاعى.
جاريالاندى. تانەكە باتىر (تاريحي-كوپشىلىك جيناق). – الماتى: 2002. -158 ب. -96-97 ب.











