جەتىسۋ وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتى وڭىردەگى ينفەكتسيالىق جاعدايعا قاتىستى ءباسپاسوز ءماسليحاتىن وتكىزىپ، 2025 جىلدىڭ 10 ايىنداعى كورسەتكىشتەردى جاريالادى. مامانداردىڭ ايتۋىنشا، جالپى ەپيدەميولوگيالىق احۋال تۇراقتى، كوپتەگەن ينفەكتسيالار بويىنشا تومەندەۋ بايقالادى، ال جرۆي مەن تۇماۋ ماۋسىمدىق دەڭگەيدە ءوسىپ وتىر.
دەپارتامەنت باسشىسىنىڭ ورىنباسارى ينديرa كۇنباسوۆا مەن وبلىس ەپيدەميولوگى راندير ساحاريەۆ جرۆي مەن تۇماۋدىڭ ماۋسىمدىق ءوسۋىن اتاپ ءوتتى. وتكەن جىلدىڭ سايكەس كەزەڭىمەن سالىستىرعاندا اۋرۋشاڭدىق 1،6 ەسە ارتقان، دەگەنمەن باقىلاۋدا.
سونداي-اق ءماسليحات بارىسىندا جۋرناليستەر تاراپىنان قازىرگى الەۋمەتتىك جەلىدە ءجيى تالقىلانىپ جاتقان «گونكونگ تۇماۋىنا» قاتىستى ناقتى سۇراقتار قويىلدى. سۇراقتارعا جاۋاپ بەرگەن ينديرا كۇنباسوۆا بۇل ۆيرۋستىڭ جاڭا شتامم ەمەستىگىن، جىل سايىن تىركەلەتىن ماۋسىمدىق ا(H3N2) تۇماۋى ەكەنىن اتاپ ءوتتى.
ونىڭ ايتۋىنشا، «گونكونگ تۇماۋى» اتاۋى 1968 جىلى العاش رەت گونكونگ قالاسىندا انىقتالعاندىقتان عانا قالىپتاسقان. بۇل شتامم بيىل دا الەمدە ءجيى كەزدەسىپ وتىر، ونى ددۇ ەپيدماۋسىم ءۇشىن بولجامعا ەنگىزگەن. وبلىستا زەرتحانالىق راستالعان 156 جاعداي تىركەلىپ، بارلىعى ا(H3N2) ەكەنىن حابارلادى.
سونىمەن قاتار ءباسپاسوز جيىنىندا تۇماۋعا قارسى ۆاكتسيناتسيا، جرۆي بويىنشا مونيتورينگ، مەكتەپتەردەگى سىرقاتتانۋشىلىق، اسا قاۋىپتى ينفەكتسيالار، قۇتىرما مەن ءسىبىر جاراسىنىڭ وشاقتارىنداعى جاعدايلار دا كەڭىنەن باياندالدى.
وبلىس حالقىن قورعاۋ ماقساتىندا 82 مىڭ دوزا ۆاكتسينا ساتىپ الىنعان، قاۋىپتى توپتار تولىق قامتىلعان. ماماندار تۇرعىنداردى ماۋسىمدىق ۆيرۋستار كەزىندە ءوزىن-ءوزى قورعاۋ شارالارىن ۇستانۋعا جانە اۋرۋ بەلگىلەرى بايقالعان جاعدايدا ۋاقىتىلى دارىگەرگە قارالۋعا شاقىردى.
لياززات مۋحامەدجان
“Q-andas” اقپاراتتىق اگەنتتىگى.
