Jetisu oblysynyń Sanitariyalyq-epidemiologiyalyq baqylau departamenti óńirdegi infektsiyalyq jaǵdaiǵa qatysty baspasóz máslihatyn ótkizip, 2025 jyldyń 10 aiyndaǵy kórsetkishterdi jariyalady. Mamandardyń aituynsha, jalpy epidemiologiyalyq ahual túraqty, kóptegen infektsiyalar boiynsha tómendeu baiqalady, al JRVI men túmau mausymdyq deńgeide ósip otyr.
Departament basshysynyń orynbasary Indira Kúnbasova men oblys epidemiology Randir Sahariev JRVI men túmaudyń mausymdyq ósuin atap ótti. Ótken jyldyń sáikes kezeńimen salystyrǵanda aurushańdyq 1,6 ese artqan, degenmen baqylauda.
Sondai-aq Máslihat barysynda jurnalister tarapynan qazirgi áleumettik jelide jii talqylanyp jatqan «Gonkong túmauyna» qatysty naqty súraqtar qoiyldy. Súraqtarǵa jauap bergen Indira Kúnbasova búl virustyń jańa shtamm emestigin, jyl saiyn tirkeletin mausymdyq A(H3N2) túmauy ekenin atap ótti.
Onyń aituynsha, «Gonkong túmauy» atauy 1968 jyly alǵash ret Gonkong qalasynda anyqtalǵandyqtan ǵana qalyptasqan. Búl shtamm biyl da álemde jii kezdesip otyr, ony DDÚ epidmausym úshin boljamǵa engizgen. Oblysta zerthanalyq rastalǵan 156 jaǵdai tirkelip, barlyǵy A(H3N2) ekenin habarlady.
Sonymen qatar baspasóz jiynynda túmauǵa qarsy vaktsinatsiya, JRVI boiynsha monitoring, mektepterdegi syrqattanushylyq, asa qauipti infektsiyalar, qútyrma men sibir jarasynyń oshaqtaryndaǵy jaǵdailar da keńinen bayandaldy.
Oblys halqyn qorǵau maqsatynda 82 myń doza vaktsina satyp alynǵan, qauipti toptar tolyq qamtylǵan. Mamandar túrǵyndardy mausymdyq virustar kezinde ózin-ózi qorǵau sharalaryn ústanuǵa jáne auru belgileri baiqalǵan jaǵdaida uaqytyly dárigerge qaraluǵa shaqyrdy.
Lyazzat MUHAMEDJAN
“Q-andas” aqparattyq agenttigi.
