Жетісу облысының Санитариялық-эпидемиологиялық бақылау департаменті өңірдегі инфекциялық жағдайға қатысты баспасөз мәслихатын өткізіп, 2025 жылдың 10 айындағы көрсеткіштерді жариялады. Мамандардың айтуынша, жалпы эпидемиологиялық ахуал тұрақты, көптеген инфекциялар бойынша төмендеу байқалады, ал ЖРВИ мен тұмау маусымдық деңгейде өсіп отыр.
Департамент басшысының орынбасары Индирa Күнбасова мен облыс эпидемиологы Рандир Сахариев ЖРВИ мен тұмаудың маусымдық өсуін атап өтті. Өткен жылдың сәйкес кезеңімен салыстырғанда аурушаңдық 1,6 есе артқан, дегенмен бақылауда.
Сондай-ақ Мәслихат барысында журналистер тарапынан қазіргі әлеуметтік желіде жиі талқыланып жатқан «Гонконг тұмауына» қатысты нақты сұрақтар қойылды. Сұрақтарға жауап берген Индира Күнбасова бұл вирустың жаңа штамм еместігін, жыл сайын тіркелетін маусымдық А(H3N2) тұмауы екенін атап өтті.
Оның айтуынша, «Гонконг тұмауы» атауы 1968 жылы алғаш рет Гонконг қаласында анықталғандықтан ғана қалыптасқан. Бұл штамм биыл да әлемде жиі кездесіп отыр, оны ДДҰ эпидмаусым үшін болжамға енгізген. Облыста зертханалық расталған 156 жағдай тіркеліп, барлығы А(H3N2) екенін хабарлады.
Сонымен қатар баспасөз жиынында тұмауға қарсы вакцинация, ЖРВИ бойынша мониторинг, мектептердегі сырқаттанушылық, аса қауіпті инфекциялар, құтырма мен сібір жарасының ошақтарындағы жағдайлар да кеңінен баяндалды.
Облыс халқын қорғау мақсатында 82 мың доза вакцина сатып алынған, қауіпті топтар толық қамтылған. Мамандар тұрғындарды маусымдық вирустар кезінде өзін-өзі қорғау шараларын ұстануға және ауру белгілері байқалған жағдайда уақытылы дәрігерге қаралуға шақырды.
Ляззат МУХАМЕДЖАН
“Q-andas” ақпараттық агенттігі.
