«Jetisu» ólketanushylar ortalyǵy qoǵamdyq birlestigi «Kitap oqityn últ» jobasy ayasynda «Ólketanu – úrpaq tárbiesiniń altyn arqauy» atty oblystyq seminar-trening ótkizdi. Taǵylymdy sharanyń basty maqsaty tuǵan ólke tarihyn nasihattau, bilim beru úiymdaryndaǵy ólketanu baǵytyndaǵy júmysty jandandyru, oqushylardyń tarihi tanymyn arttyru jáne ústazdar arasynda tájiribe almasu alańyn qalyptastyru boldy.
Mańyzdy sharaǵa oblystyq Ádistemelik ortalyq qoldau bildirdi. Búl bastama óńirdegi ólketanu júmystaryn júieleuge, bilim beru salasyndaǵy tarihi-tanymdyq baǵytty kúsheituge arnalǵan mańyzdy qadamdardyń biri retinde baǵalandy.
Seminar-treningke Taldyqorǵan qalasyndaǵy jalpy bilim beretin úiymdardyń tarih jáne geografiya páni múǵalimderi qatysty. Basqosu barysynda óńir tarihyn zertteu, tarihi sanany jańǵyrtu, últtyq qúndylyqtardy dáripteu baǵytyndaǵy ózekti máseleler keńinen talqylandy.
Jiynda ólketanu pánin bilim beru júiesine júieli túrde engizu jáne ony oqytudyń qajettiligine erekshe nazar audaryldy. Búginde mektep baǵdarlamasynda tuǵan ólke tarihyna qatysty derekter kóbine qosymsha material retinde ǵana qarastyrylady. Sonyń saldarynan oqushylar óz auylynyń, qalasynyń, óńiriniń tarihi túlǵalaryn, kóne qonystaryn, kieli jerlerin, jer-su ataularynyń mánin tolyq bile bermeidi. Búl tarihi jadtyń álsireuine, tuǵan jerge degen tanymdyq bailanystyń úziluine ákelui múmkin.
Ólketanu jeke pán nemese túraqty fakulьtativtik kurs retinde oqytylsa, oqushy tuǵan jer tarihyn tek oqulyqtaǵy jalpy málimet arqyly emes, naqty derek, jergilikti múra, arhiv qújaty, tarihi oryn, el ishindegi áńgime arqyly tanyr edi. Múndai baǵyt balanyń zertteushilik qabiletin damytyp, tuǵan ólkege degen jauapkershiligin arttyrady. Ásirese tarih, geografiya, ádebiet, biologiya pánderimen sabaqtastyra oqytu arqyly ólketanudy keshendi bilim beru qúralyna ainaldyruǵa bolady.
Seminarda osy baǵyttaǵy olqylyqtar da ashyq aityldy. Búginde bilim beru úiymdarynda ólketanu júmystary júiesiz júrgiziledi, jergilikti material jetkiliksiz, daiyn ádistemelik qúral az, múǵalimderdiń arhivtik derektermen júmys isteu tájiribesi birdei emes. Sonymen birge, óńirdegi tarihi-mádeni nysandardy mektep baǵdarlamasymen bailanystyru, oqushylardy muzei, arhiv, ekspeditsiya, dala zertteui siyaqty tájiribelik júmystarǵa tartu máselesi de áli tolyq jolǵa qoiylmaǵan.
Kezdesude ayasynda «Jetisu» ólketanushylar ortalyǵy qoǵamdyq birlestiginiń maqsaty, mindeti jáne osy uaqytqa deiin atqarǵan júmystary turaly arnaiy beine tanystyrylym kórsetildi. Qatysushylarǵa birlestiktiń óńirdegi tarihi-mádeni múralardy zertteu, kieli oryndardy nasihattau, arhiv derekterin jinaqtau, kitap shyǵaru jáne ruhani qúndylyqtardy dáripteu baǵytyndaǵy eńbekteri jan-jaqty tanystyryldy.
Sonymen qatar birlestik janyndaǵy ólketanushylardyń baspadan jaryq kórip, elektrondy kitap qoryna engen ólke tariyn túgendeitin 37 kitaptyń arnaiy tanystyrylym úiymdastyryldy. Tarihi-tanymdyq baǵyttaǵy kitaptardyń jas úrpaq tárbiesindegi róline erekshe toqtalyp, tuǵan jer tarihyn oqytuda múndai eńbekterdiń mańyzy zor ekeni aityldy. Sondai-aq, «Q-ANDAS» aqparat agenttiginiń resmi saity tanystyrylyp, ondaǵy tarihi-tanymdyq maqalalar, arhivtik derekter, ruhani-mádeni jobalar men elektrondy materialdardyń mazmúny túsindirildi. Qatysushylarǵa saittyń aqparattyq múmkindigi, qúrylymy jáne bilim beru úderisinde paidalanu joldary jóninde keńinen málimet berildi.
Seminar-trening ayasynda ústazdar ólketanu baǵytyndaǵy óz tájiribelerimen bólisip, mektepterde júzege asyp jatqan jobalar turaly pikir almasty. Ásirese tuǵan jer tarihyn oqushylarǵa zamanaui formatta jetkizu, arhiv materialdaryn oqu úderisine engizu jáne tarihi-tanymdyq jobalardy kóbeitu máseleleri keńinen qozǵaldy.
Úiymdastyrushylardyń aituynsha, múndai basqosular jas úrpaqtyń tuǵan jerge degen súiispenshiligin arttyryp, últtyq tarih pen ruhani múraǵa degen qyzyǵushylyǵyn kúsheituge yqpal etedi. Óitkeni ólketanu últtyń tarihi jadyn saqtap, óskeleń buyn sanasyna eldik qúndylyqtardy sińiretin mańyzdy ruhani negizderdiń biri.
Birlestik júrgizgen zerdeleu nátijesinde ólketanu pániniń mektepterde oqu jylynyń sońyna qarai bir saǵatpen ǵana shekteletinin, ári búl baǵytty oqytu isi ólketanu salasyn jetik meńgergen múǵalimderge únemi tapsyryla bermeitinine kóz jetkizdi. Búl jaǵdai tuǵan ólke tarihyn júieli oqytuǵa, oqushylardyń jergilikti tarihi-mádeni múraǵa degen qyzyǵushylyǵyn arttyruǵa keri áserin tigizui múmkin. Sondyqtan atalǵan másele aldaǵy uaqytta «Jetisu» ólketanushylar ortalyǵy qoǵamdyq birlestiginiń jiti nazarynda bolady.
Seminar-trening sońynda qatysushylar ózara pikir almasyp, ólketanu baǵytyndaǵy jańa jobalar men birlesken bastamalardy júzege asyru máselelerin talqylady. Sońynda oblystyq seminar-treningke belsendi qatysqan tarih jáne geografiya páni múǵalimderine arnaiy sertifikat tabystaldy.
«Q-Andas»aqparattyq agenttigi
