ءومىر ءوزىنىڭ وتكەنىمەن قىزىقتى، ناتيجەلى. دەسەك تە، ول اعىن سۋ سياقتى وتەدى، وزگەرەدى. الايدا، سول وزگەرىستىڭ استارىندا انىقتاپ قارا- ماساڭ جەتە تۇسىنە المايتىن اقيقاتتار جاتادى. وسى تۇرعىدان كەلگەندە قازاق ءباسپاسوزى تالاي وزگەرىس پەن وڭدەۋدىڭ جولىنان ءوتىپ، بۇگىنگى الەمدىك وركەنيەتكە ىقپال ەتە الاتىن دەڭگەيگە شىقتى. بۇل ايتۋعا جەڭىل بولعانىمەن وسى جولدا قان- شاما ادام ءتۇن ۇيقىسىن ءتورت ءبولىپ، تىنىمسىز ەڭبەك ەتكەنىن ءدال قازىر ساناپ بەرە المايمىز. دەي تۇرعانمەن، وتكەن كۇننىڭ سارعايعان ەستەلىك- تەرىن پاراقتاپ وتىرىپ، كوپ ويدى كوڭىلگە تۇيەمىز. تۇيەمىز دە سول جاندارعا ەرىكسىز باسىمىزدى يە- ءمىز. ولاردىڭ تاعدىر تالايى ءبىر-بىرىنە ۇقساس بول- ماسا دا، ماقساتى، مۇراتى، ارمانى ءبىر ارناعا توعىسىپ جاتقانىن اڭعارامىز. سونداي جانداردىڭ ءبىرى، قازاق باسپاسوزىنە جارق ەتىپ كەلىپ، ارتىنا ءبىرتالاي قۇندى مۇرا قالدىرىپ كەلە جاتقان بولاتبەك بيسۇلتانۇلى اعامىز ەدى.
جۋرناليستيكاسىنىڭ ارداگەرى بولاتبەك بيسۇلتانۇلى بيىل 75 جاسقا كەلدى. ارينە، جەتپىس بەسكە كەلۋ بار دا، وعان ۇلى مۇرات، بيىك پاراسات، يگى جەتىستىكپەن جەتۋ ەكىنىڭ-ءبىرىنىڭ قولىنان كەلە بەرمەيدى. دەمەك، ەلدىڭ قۇرمەتىنە بولەنگەن، اعايىننىڭ العىسىن ارقالاعان، جەرلەستەرىنىڭ ماقتانىشى بولعان اعا- مىزدىڭ ءومىر جولى ءوز الدىنا بولەك اڭگىمە، تاعى- لىمدى تاعدىرى تەرەڭنەن سىر تارتار تاربيەمەن وزەكتەسىپ جاتاتىنى بەلگىلى. ەندەشە، وسى رەتتە سول جايلى وي وربىتپەكپىز. «ارىندى مەنىڭ اقسۋىم، ارقىراپ ءالى اعار- سىڭ»، – دەپ تۋعان جەرى جايلى قۇلاگەر اقىن ءىلياس جانسۇگىروۆ تەگىن ايتپاعان شىعار. مۇمكىن، تاستان-تاسقا سوعىلىپ، اعىنىمەن اينالاسىنا ومىرگە قۇشتارلىق تامشىسىن سەۋىپ وتەتىن اقسۋ وزەنى تالاي-تالاي اسىل ازاماتىنىڭ ءشولىن باسىپ، ءومى- رىنە وزەك جالعادى. وزەن بويىن جاعالاپ، جالاڭ اياعىن شوگىرگە تىلگىزگەن سول ءبىر قارا دومالاق با- لالار بۇگىندە ەلدىڭ ابىروي اقساقالىنا اينالعانىن كورەمىز. قاسيەت قونعان دالانىڭ قاستەرلى تۇسىنىڭ ءبىرى دە سول ەمەس پە؟ سول جەتپىس بەس جىل بۇرىنعى اۋىل بالاسىنىڭ بۇگىنگى تاڭدا تۇتاس جەتىسۋدىڭ تاريحىن جازىپ، ەلىمىزگە تانىمال ءتىلشى اتانارىن ول كەزدە ەشكىم بىلگەن جوق.
اعامىزدىڭ اكەسى بيسۇلتان بايىسوۆ اقسۋ اۋدانى جايىلما اۋىلدىق كەڭەسىنىڭ توراعاسى قىزمەتىن اتقارا ءجۇرىپ، ەل ومىرىنە وزىندىك ۇلەسىن قوستى. سوندىقتان بالالارىم دا قوعامدىق ومىرگە بەيىم بولادى دەپ ويلاۋشى ەدى. اۋىل جۇرتىنا بەدەلدى ازامات 1942 جىلى 27 مامىردا مايدانعا اتتانادى. سوڭىندا وۆەتبەك اتتى ۇلى مەن جۇكتى ايەلى قاميلا قالادى.
ەرىن مايدانعا شىعارىپ سالىپ تۇرىپ قاميلا بيسەيىتقىزى:
– سوڭىڭدا قالعان بالالارىڭدى شامام جەتكەنشە قاناتتىعا قاقتىرماي، تۇمسىقتىعا شوقىتتىرماي وسىرەمىن، – دەپ ءسوز بەرەدى. اكەسى سوعىسقا اتتانعان سوڭ اينالاسى ءۇش اپتاعا جۋىق ۋاقىتتا ومىرگە ءسابي كەلەدى. اعايىندار سوعىسقا كەتكەن ەرلەرگە تارتسىن دەگەن نيەتپەن اتىن بولات دەپ قويادى. اۋىلداعى ءومىر، جانتالاس تىرلىك سول تۇستاعى ۇلكەندەر مەن بالا-شاعاعا دا جەڭىل تيمەدى. اعاسى سوۆەتبەك جاستاي قىزىلشا دەرتىنەن شەتىنەپ كەتىپ، جاڭا تۋعان نارەستە شەشەسىنىڭ وكىنىش تولى ومىرىنە جۇبانىش بولادى. جەتىمدىك تىلگە اۋىر ايتىلعانىمەن ءورشىل، ەڭبەكشىل بالانىڭ تەز ەرجەتۋىنە كوپ ىقپال ەتتى. قوزى قۋىپ ءجۇرىپ تاباندىلىقتى، بۇزاۋ باعىپ ءجۇرىپ ەڭبەكسۇيگىشتىكتى، مايشامنىڭ تۇبىندە ءتۇننىڭ ءبىر ۋاعىنا دەيىن كىتاپ وقىپ ءجۇرىپ بىلىمدىلىكتى ۇيرەندى. تۇرمىستاعى كەيبىر جەتىسپەۋشىلىك قاتارلاستارىنا قاراعاندا تەز ەسەيتتى. سول تۇستاعى بالالىق بالعىن ءومىرىن كوز الدىنا ەلەستەتكەن بولاتبەك اعا:
– انام كەڭشاردا بەلسەندى ەڭبەك ەتتى. قيىن- دىقتار مەن جەتىسپەۋشىلىك، قايتا قۇرۋدىڭ قات-قابات جوسپارلارى بولسا دا مەنىڭ دۇرىس ءتالىم كورىپ، ءبىلىم الۋىم ءۇشىن بارلىق جاعدايدى جاساۋعا تى- رىستى. اكەسىز وسسەم دە ءومىر بويى اكەمنىڭ جوق- تىعىن سەزدىرمەۋگە تىرىستى. اۋىلدىق، اۋداندىق كەڭەس دەپۋتاتى بولىپ، ەلدىڭ جۇگىن ارقالاپ جۇرسە دە مەنىڭ بارلىق اتقاراتىن شارۋامدى قاداعالاپ وتىراتىن. كۇندىز جارقىلداپ جۇرسە دە، تۇندەردە كوز جاسىن سىعىمداپ الاتىنىن كورىپ قالاتىنمىن. ءبىر قىزىعى، اكەمنىڭ مايداننان جازعان حاتتارى مەن «قارا قاعازدى» ومىردەن وتەر الدىندا، ياعني 1994 جىلى ماعان تابىس ەتتى، – دەيدى ول. ءيا، ءبىزدىڭ ادام بولىپ اسقاقتاپ جۇرگەنىمىز دە وسىنداي انالاردىڭ ارقاسىندا ەمەس پە؟! بولات اعامىز دا اناسىن ماڭگىلىك مەكەنىنە دۇرىستاپ شىعارىپ سالدى. كۇنى-بۇگىنگە دەيىن پەرزەنتتىك پارىزىن وتەپ، قۇدايى تاماق بەرىپ، قۇران وقىتىپ دەگەندەي ماندىلىقتىڭ ۇلگىسىمەن اناعا دەگەن قۇرمەتىن ءبىلدىرىپ كەلدى. الپەشتەگەن انانىڭ ايالى الاقانىن سەزىنىپ وسكەن بولاتبەك بيسۇلتانۇلى باسىندا اقسۋ اۋداندىق جەتىمدەر ينتەرناتىندا، سوڭىنان 1957 – 1960 جىلى ءىلياس جانسۇگىروۆ كەنتىندەگى چاپاەۆ اتىنداعى ورتا مەكتەپتە وقيدى. وسىدان كەيىن سەمەي پەداگوگيكالىق ينستيتۋتىنا سىرتتاي وقۋعا ءتۇسىپ، ۇجىمشار مۇشەلىگىنە قابىلدانادى. كەيىننەن قاراكوز اۋىلىنداعى قىزىلوراق ورتا مەكتەبىندە مۇعالىم، 9 «ا» سىنىپتىڭ جەتەكشىسى مىندەتىن اتقاردى. بىراق بالا كۇنىنەن «قالامگەر بولسام» دەگەن ارماننىڭ الديىندە وسكەندىكتەن قانداي قوعامدىق جۇمىستار ىستەسە دە ويىنان جۋرناليست بولۋ ءبىر شىقپايدى. سونىمەن الپىسىنشى جىلداردىڭ ورتاسىندا بولات بيسۇلتانۇلى جۋرناليستيكا سالاسىنا بىردەن اۋىسادى. العاشىندا اقسۋ، قاپال اۋداندىق گازەتتەرىندە تاجىريبە جيناپ، ودان كەيىن وبلىستىق «جەرۇيىق» گازەتىندە تابان اۋدارماي 30 جىل ەڭبەك ەتتى.
ارينە، جۋرناليستيكا – كۇردەلى ماماندىق. ونىڭ ادامعا جۇكتەر جاۋاپكەرشىلىگى مەن جۇگى اۋىر. ويتكەنى جۋرناليست كۇن سايىن ءبىلىمى مەن تاجىريبەسىن جەتىلدىرىپ وتىرعانى دۇرىس. ولاي بولماسا، بيىك بەلەسكە شىعىپ، الىپ اسۋدان اسا المايدى. سونداي-اق، بۇل سالادا جازىلماعان ءبىر زاڭدىلىق بار. ياعني، جۋرناليستيكاداعى العاشقى قادامىن كوررەكتورلىقتان باستاعان. بولات اعا جۋرناليستيكا سالاسىنىڭ قىرى مەن سىرىن تەز مەڭگەرىپ، كوپ وتپەي باسقا ارىپتەستەرىنە تاجىريبەسىمەن جول كورسەتە باستايدى. «ەڭ قىزىعى، بولات اعا ماقالا جازۋ بارىسىندا ينتەرناتتا بىرگە تۇرعان، وقىعان بالالاردىڭ ەسىمدەرىن دە ۇمىتپاي جازىپ وتىرادى»، – دەپ ەستۋشى ەدىم. وسى ماتەريالدى دايىنداۋ بارىسىندا:
– اعا، وسىدان 65 جىل بۇرىن اقسۋ اۋدانىنداعى جەتىم بالالار ينتەرنات جاتاقحاناسىندا كىمدەرمەن بىرگە ءجۇرىپ-تۇرعان ەدىڭىز، – دەپ سۇراپ قويدىم. باسىندا ءمۇدىرىپ قالاتىن شىعار دەپ ويلانعانىم راس. ويتكەنى 65 جىل ەمەس، 35 جىل بۇرىنعىسىنىپتاستارىمىزدى ۇمىتىپ ءجۇرمىز عوي. اعامىز ساۋساعىن ساناي جونەلدى:
– بالتاباي ەسەنباەۆ، قانات عاليەۆ، كەڭەسبەك راحاتوۆ، يليا شالعىنباەۆ، بولات نۇرسەيتوۆ، قاعازبەك نامازبەكوۆ، قانات ساپىجانوۆ، تۇندەباي تولەگەنوۆ، جاكەتاي يمانعاليەۆ، – دەپ مۇدىرمەي، ءبىر دەممەن ايتىپ شىقتى. ارينە، ەستە ساقتاۋ قابىلەتى مىقتى ادامدار بولادى. بولات اعانى سول قاتارعا قوسامىز. دەسە دە، اعامىزدىڭ الپىس بەس جىلدىڭ الدىنداعى سىنىپتاستارىن ۇمىتپاعانى سول كۇندەرگە، ومىرگە، اۋىلعا دەگەن تەرەڭ سۇيىسپەنشىلىگىنىڭ بەلگىسى ەمەس پە؟ وسى ادامي قاسيەتتى ءاردايىم ءوزىمىزدىڭ سانامىزعا شەگەلەپ، الالارىمىزعا ۇلگى ەتسەك، ۇتارىمىز كوپ بولاتىنى انىق. ءتىپتى، بولات اعامىز مۇعالىم بولىپ جۇمىس ىستەگەن كەزدەردەگى ءوزى وقىتقان وقۋشىلاردىڭ اتى مەن تەگىن ءالى ۇمىتپاعان. مەكتەپ بىتىرگەن شاكىرتتەرى 40 جانە 50 جىلدىق كەزدەسۋلەر وتكىزىپ، ۇستازدارىن شاقىرعاندا الدى اتا، اپا اتانىپ، نەمەرە-شوبەرەلى بولعان وقۋشىلارىنىڭ اتى-ءجونىن، مەكتەپتەگى قىزعىلىقتى ىستەرىن مايىن تامىزىپ اڭگىمە ەتكەندە، بالالىق شاقتارىن قايتا ءبىر كوز الدىنان وتكىزگەن وقۋشىلارى ۇستازدارىنا شىنىمەن ءتانتى بولعانىن جۇرت ءالى اڭگىمە ەتىپ ءجۇر.
تەك بۇل ەمەس، زەردەلى اعامىز وڭىرىمىزدە وتكەن تاريحي، مادەني، مەرەكەلىك شارالاردىڭ دا قاشان، قالاي، قاي دەڭگەيدە وتكەنىن كۇنى كەشە وتكەندەي بايانداپ بەرەدى. بىردە قاراكەرەي قابانباي باتىر جايلى ماقالا دايىنداپ وتىرىپ، ءبىرىنشى رەت باتىردىڭ تويىنىڭ قاشان وتكەنى تۋرالى اقپارات كەرەك بولدى دا اعاما تەلەفون شالدىم:
– بولات اعا، قابانباي باتىردىڭ 300 جىلدىعى قاي جىلى، قاي ايدا، قاي كۇنى ءوتىپ ەدى؟ – دەپ سۇرادىم. اعام مۇدىرگەن جوق. 1991 جىلى 16-17 تامىز كۇنى ۇيگەنتاس جايلاۋىندا جۇما مەن سەنبى كۇنى تويلاندى. وعان سولتۇستاعى مادەنيەت ءمينيسترى، ۇلكەن جۇرەكتى ازامات وزبەكالى جانىبەكوۆ پەن قوعام قايراتكەرى مىرزاتاي جولداسبەكوۆ سىندى مەملەكەتتىك بيلىكتەگى تۇلعالار قاتىسىپ، شارانىڭ بەدەلىن اسىرىپ ەدى – دەمەسى بار ما؟ تاڭعالىسىمدى جاسىرا المادىم. بولات اعانىڭ اقىندىق تالانتى دا بار. ولەڭدى كوپ جازباعانىمەن ارا-تۇرا كوڭىلىندەگى ويىن كوركەمدەپ، ولەڭمەن جەتكىزەتىنى بار. العاشقى ولەڭىن جيىرما جاسىندا جازىپ، سول تۇستاعى اقسۋ اۋداندىق گازەتىنە جاريالاپتى. ارىپتەس اعا سۇحبات بارىسىندا سول ولەڭدى دە جاتقا ايتىپ بەردى.
اسىلىم، جۇرەگىمدە ۇيالادىڭ،
كوڭىلدىڭ بيىگىنە قيالادىڭ.
ءوزىڭسىز بۇل ءومىردىڭ ءسانى بار ما،
مەن بىراق «سۇيەم» دەۋگە ۇيالامىن.
سەن جۇرسەڭ ءبىلىم ىزدەپ الىس ماڭدا،
اڭسايمىن ساعىنىپ قول الىسقانعا.
كۇنىنە نەشە دۇركىن ەسكە الامىن،
جانىم-اۋ، جۇرەگىمىز اۋىسقان با؟ – دەپ كەلەدى.
ولەڭ سىرى بەلگىلى. عاشىقتىق دەرتى. ول ۇناتقان سول قىزدى الدەكىمدەر الىپ قاشىپ، امالسىزدان سول ءۇيدىڭ بوساعاسىندا تۇرىپ قالعان كورىنەدى. وسىدان كەيىن بولات بيسۇلتانۇلى ولەڭ جازۋدى ءۇزىلدى-كەسىلدى توقتاتادى دا، ءازىل-وسپاق، سىن-سىقاق جازۋعا بەلسەنە كىرىسەدى. ءومىر – مەكتەپ. سول مەكتەپتە تاعدىر ءارتۇرلى ادامدارمەن كەزدەستىرەدى. ۇلاعاتتى جاندار سەنىڭ جان-جاقتى بولىپ قالىپتاسۋىڭا جول اشادى. اعامىزدىڭ ومىرىندە دە اقىلىن اياماعان، جول نۇسقاپ، ءجون كورسەتكەن، قاتەلىگىن بەتىنە ايتىپ، كەمشىلىگىن جاسىرماي كورسەتكەن، سول ارقىلى ابىرويلى ازامات بولىپ قالىپتاسۋىنا ىقپال ەتكەن ادامدار از بولماعان. باستاۋىش سىنىپتا ءبىلىم بەرگەن ەرلى-زايىپتى نۇرمۇحانبەت ەجەنوۆ پەن ءراشيدا التىنباەۆالار ەڭ العاشقى ءومىر باسپالداعىن نىق باسۋىنا سەپ بولدى. ال جۋرناليستيكا سالاسىنا كەلگەندە تاڭىربەرگەن حاليلاحانوۆ، عايىس ەگەمبەرديەۆتىڭ جازۋ-سىزۋعا ادالدىعى ومىرلىك ۇلگى-ونەگەسىنە اينالدى. قوس قالامگەردىڭ بولمىس-ءبىتىمى، مىنەز-قۇلقى دا ەرەكشە. ەكەۋى دە سابىردى سەرىك ەتكەن ازاماتتار.
عايىس اعامىز بۇگىندە 93 جاستا. ءالى كۇنگە گازەتجۋرنال وقىپ، قوعامداعى وزگەرىس-جاڭالىقتان قالىس قالماي وتىرادى. سۇيەگى اسىل! قاتارلاس جۇرگەن جۋرناليستەردىڭ اراسىنان اراسانباي ەستەنوۆ، وتەپبەرگەن اقىپبەكوۆ، امىرە ءارىن، مىرزاعالي نۇرسەيىتوۆ، عالىم جازىلبەكوۆ، تالعات باتىرحانوۆ، احات باققوجاەۆتاردىڭ ومىردەگى ورنى ەرەكشە. بۇلار كوپشىل، ەڭبەكقور، كىسىلىگى باسىم جاندار. ۇساقتىقتان جوعارى تۇراتىن ازاماتتار. جوعارىدا اتى اتالعان اعامىزدىڭ ارىپتەستەرىن بۇگىندە جۇرت بىلەدى. ولار قىزىعى مەن قيىندىعى قاتار جۇرەتىن جۋرناليستيكانى جان-تانىمەن سۇيەتىن جاندار. رەداكتسيا تاپسىرماسىن تياناقتى ورىندامايىنشا ىشكەن اسى بويىنا سىڭبەيتىن ماماندار. بۇدان وزگە اعامىزدىڭ ومىرىندە ۇمىتىلماس ادامدارمەن قاتار تاريحي ساتتەر دە كوپ بولدى. قوعامداعى ءار وقيعا جۋرناليست ءۇشىن ماڭىزدى. ادامزات ءۇشىن الار ورنى ءتىلشى تاراپىنان ساراپقا سالىنادى. وسى تۇستا اعامىزدىڭ جۋرناليستيكاداعى بەتالىسىنا ارال قاسىرەتىنە ارنالىپ قىزىلوردا وبلىسىنىڭ ارال قالاسى مەن بارساكەلمەس ارالىندا وتكەن فورۋم ەرەكشە اسەر ەتتى. حالىقارالىق فورۋمعا ەۋروپا، ازيا، افريكا كونتينەنتتەرىنەن كورنەكتى عالىمدار، جۋرناليستەر، مەديتسينا سالاسىنىڭ باسشىلارى قاتىستى. وسى فورۋمدا بولات اعا جۋرناليستيكا سالاسىنداعى الەمدىك عالىمداردىڭ ءىس-تاجىريبەسىن كورىپ، ودان ۇلگى-ونەگە الدى. سول جيعان-تەرگەن تاجىريبەسىن ءوزىنىڭ بولاشاق ماماندىىنا جول اشادى.
اعامىزدىڭ تۇتاس ءومىرىنىڭ جارىمىنان كوبى جۋرناليستيكاعا ارنالدى. العاشقى ەڭبەك جولىن اقسۋ اۋداندىق «ءومىر نۇرى» گازەتىنەن باستاپ، قاپال اۋداندىق «قاپال ەڭبەككەرى» گازەتىندە جالعاستىردى. سول كەزدە اۋداننىڭ جاعدايى تىم جۇتاڭ. گازەتتە كەڭسە بولماعاندىقتان قىزمەتكەرلەر قازاق ۇيدە وتىرىپ جۇمىس ىستەيتىن. الايدا، ءتۇرلى قيىندىقتى كورە ءجۇرىپ، ەڭبەك ەتكەندىكتەن باسشىلاردىڭ نازارىنا ىلىگىپ، 1974 جىلى اۋداندىق گازەتتىڭ رەداكتورىلىعىنا تاعايىندا لادى. ال 1997 – 2000 جىلدار ارالىعىندا «سارقان» گازەتىنىڭ باس رەداكتورلىعىنا بەكىتىلدى. گازەت سول كۇندەرى ءبىراز ۋاقىتقا جابىلىپ، قايتا قالپىنا كەلتىرۋ كوپ ەڭبەكتەنۋدى تالاپ ەتتى. ەڭبەكاقى ۋاقىتىلى بەرىلمەيتىندىكتەن قىزمەتكەرلەردى ۇستاۋدىڭ ءوزى قيىن بولدى. اۋداننىڭ سول كەزدەگى اكىمى ازامات سارسەنباەۆ شىنايى ازاماتتىقتىڭ ۇلگىسىن كورسەتىپ، گازەتتىڭ شىعۋىنا بارىنشا قولداۋ ءبىلدىردى. ءسويتىپ، جاعداي شۇعىل جاقسارىپ كەتپەسە دە وڭ بەتبۇرىس بايقالدى. سونىمەن قاتار، بولات بيسۇلتانۇلى وبلىستىق «الاتاۋ» گازەتىنىڭ قالىپتاسۋىنا دا بارىنشا ەڭبەك ءسىڭىردى. «الاتاۋ» گازەتى وبلىس ورتالىعى تالدىقورعانعا قونىس اۋدارعان 2001 جىلى جارىققا شىعىپ، رەداكتوردىڭ ورىنباسارى بولات بيسۇلتانۇلى باسىلىمنىڭ №1 سانىن جوسپارلاۋعا قاتىستى. سول جىلى ءۇندى ەلىنەن پوليگرافيالىق ماشينالار جەتكىزىلىپ، گازەت باسۋدىڭ قىر-سىرى مەڭگەرىلدى. گازەتتى ءبىر مەزگىلدە بىرنەشە ءتۇرلى ءتۇستى ەتىپ باسىپ شىعارۋدىڭ العاشقى كۋاگەرى بولعان دا بولات اعامىز.
اعامىز 2005 جىلى وبلىستىق «الاتاۋ» گازەتىنەن قۇرمەتتى زەينەتكەرلىككە شىقتى. بولات بيسۇلتانۇلى زەينەتكەرلىككە شىققاننان كەيىن دە جايلانىپ جاتپاي، قوعامدىق قىزمەتتەردىڭ بەل ورتاسىندا ءجۇرىپ، بەلسەندى قولداۋ تانىتتى. قاراكەرەي قابانباي باتىرعا ارنالعان «دارابوز» قوعامدىق-مادەنيەت قورىنىڭ ءباسپاسوز حاتشىسى، ول وسى ازامات تۋرالى كوپتەگەن ماقالالار جاريالادى. وسى قور جەتەكشىسى سەيداحمەت شۇرەگەەۆتىڭ «قاراكەرەي قابانباي – الاشتىڭ ايبىندى قولباسشىسى» اتتى كىتابىن شىعارۋشى رەداكتورى بولدى. ايتا كەتەرلىگى، جوعارىدا اتالعان تالدىقورعان قالاسىندا 2007 جىلى 7 ناۋرىزدا قۇرىلعان قورعا مۇرىندىق بولۋىندا 2009 جىلدىڭ 23 قىركۇيەگىندە قابانباي باتىردىڭ الىپ ەسكەرتكىشى «قاراتال» شاعىناۋدانىندا بوي كوتەردى. ەسكەرتكىشكە ءتاۋ ەتكەن ءاربىر ادام بابا ءمۇسىنىنىڭ تاس تۇعىرعا ورنىعۋىنا بولات اعامىزدىڭ كوپ ەڭبەك سىڭىرگەنىن ۇمىتپاعانى ءجون.
وسى كەزدە قابانباي باتىر ەسكەرتكىشىنىڭ ساۋلەتتى بولۋى ءۇشىن سول تۇستاعى وبلىس اكىمى سەرىك ۇمبەتوۆ، ونىڭ ءبىرىنشى ورىنباسارى اماندىق باتالوۆ، قور توراعاسى سەيداحمەت شۇرەگەەۆ تسەحقا كەلىپ، جۇمىستى قاداعالاپ وتىردى. سول ىستەردىڭ ءبارى قوردىڭ ءباسپاسوز حاتشىسى بولات بيسۇلتانۇلىنىڭ قالامى ارقىلى باق-تا جارىق كورىپ، تاريحقا تاڭبالانىپ قالدى. سوڭعى ەكى جارىم جىلدان بەرى ب. بيسۇلتانۇلى وبلىستاعى «دىنمۇحامەد احمەتۇلى قوناەۆ» قوعامدىق قورىنىڭ توراعاسى ق. جەكسەنوۆ مىرزانىڭ ورىنباسارى ءارى قوردىڭ ءباسپاسوز حاتشىسى بولىپ ءجۇر. وسىناۋ ۇلى تۇلعا تۋرالى وبلىستىق گازەتتەرگە بىرنەشە كولەمدى ماقالالار جاريالاندى، ونى جۇرت ىقىلاستى قابىلدادى.
ءبىر ايتا كەتەرلىگى، وسىنشا كولەمدى، تىندىرىمدى ەڭبەكتەرى ءۇشىن اعامىز ەشقاشان ەڭبەكاقى تالاپ ەتىپ كورگەن جوق. ەل يگىلىگى جولىنداعى ىستەرگە قول ۇشىن بەرۋدى ازاماتتىق بورىشىم دەپ تۇسىنەدى. راسىمەن، ادامنىڭ قوعامدىق ومىردەگى بەلسەندىلىگىمەن قاتار تۇرمىستاعى جاۋاپكەرشىلىگى دە قاتار جۇرەدى. ءبىرىن ارداقتاپ، ەكىنشىسىن ۇمىتقان جان ەشقاشاندا بيىك بەلەسكە شىعا المايدى. بولات اعامىز جۇبايى سوۆەتاي نۇرعالىموۆا اپامىزبەن ىنتىماعى ۇيىعان وتباسىن قۇرىپ، ءۇش ۇل، ءبىر قىزدىڭ اتا-اناسى اتاندى. بۇگىندە 13 نەمەرە مەن 2 شوبەرەنىڭ اتا-اپاسى. وسى تۇستا ءبىر قالامگەردىڭ ارتىندا قاشاندا مىقتى ءبىر سۇيەنىشتىڭ تۇراتىنىن ەسكەرمەۋگە بولمايدى. بولات اعامىزدىڭ دا كويلەگى كوك، ءومىرى مەرەكەلى ءجۇرۋىنىڭ باسى-قاسىندا وتباسىنىڭ بارلىق جۇمىسىن ۇيلەستىرىپ، سوۆەتاي اپامىزدىڭ جۇرگەنىنەن ىزدەگەن ءجون. اپامىز مەديتسينا سالاسىندا 39 جىل ەڭبەك ەتتى. قر دەنساۋلىق ساقتاۋ مينيسترلىگىنىڭ قۇتتىقتاۋلارى، وبلىس اكىمى مەن باسقارمانىڭ العىس حاتتارىمەن ماراپاتتالعان بىلىكتى مامان. 1986 جىلى كسرو جوعارعى كەڭەسىنىڭ جارلىعىمەن «ەڭبەكتە ۇزدىك شىققانى ءۇشىن» مەدالىمەن ماراپاتتالعان. ءان مەن بي ونەرىن سۇيەدى. ايتپاقشى، اپامىز 2001 جىلى 7 مامىردا قر تاۋەلسىزدىگىنىڭ 10 جىلدىعى قۇرمەتىندە مەديتسينا قىزمەتكەرلەرى اراسىندا پرەزيدەنتتىك تەست سپارتاكياداسىندا وبلىس چەمپيونى اتاعىن جەڭىپ الىپ، قۇرمەت گراموتاسىمەن، باعالى سىيلىقپەن ماراپاتتالعانىن ايتا كەتكەن ءجون.
«اكە كورگەن وق جونار، شەشە كورگەن تون پىشەر» دەگەندەي، تۇڭعىشى ەرلان سپورت جانە دەنە تاربيەسىنىڭ جوعارى ءبىلىمدى مامانى، اسكەري بورىشىن اۋعانستاندا اتقارىپ، ەلىنە 1989 جىلى ورالدى. ەكىنشى ۇلى نۇرلان ەكونوميست، بيزنەستە. ەكەۋى دە الماتىدا. ءۇشىنشى ۇلى ەرجان اسكەري قىزمەتشى، دەسانتتىق-شابۋىل باتالونىندا. قىزى نۇرشولپان ساۋدا-ەكونوميكاسى مامانى، تورتەۋى دە ءوز وتباسىندا ۇرپاعىن ءوسىرىپ، قىزمەتتەرىن جالعاستىرىپ جاتقان ازاماتتار.
جۋرناليستيكا ارداگەرى، اقسۋ اۋدانىنىڭ بەل بالاسى بولاتبەك بيسۇلتانۇلى ءوزىنىڭ «تاعدىرىما ريزامىن» اتتى كىتابىنىڭ سوڭىندا ءوز بالا-شاعالارىنا مىنانداي جۇرەكجاردى اكەلىك ءارى اتالىق اقىلىن ايتىپتى.
ەرلان، نۇرلان، ەرجانىم،
نۇرشولپانىم – كەنجەم، ارداعىم.
ۇلكەن كەلىن – ءسانيا،
بارىنە باسشى جانۇيا.
جاننا مەنەن شىنارىم،
جاقىن مەنىڭ جانىما.
اينالايىن مۇراتجان،
جۇرەگى ادال جارىنا.
سەندەرگە ايتار اقىلىم،
سابىرمەن ءجۇرىپ اقىرىن.
ءبىرىڭدى-ءبىرىڭ ايالاپ،
تاتۋ جۇرۋگە شاقىردىم.
نەمەرەلەرىم ءوسىپ كوبەيسىن،
سىنىعىنداي كەسەك التىننىڭ.
ءسوزىمدى دۇرىس ۇعىڭدار،
ولشەۋلى عانا عۇمىر بار.
ءبارىڭ دە مەنىڭ بالامسىڭ،
ساعىنىسىپ تۇرىڭدار.
ءبارىڭنىڭ اناڭ – سوۆەتاي،
ايتقانىنا مويىن بۇرىڭدار.
22.05. 2017جىل
ءيا، ءبىزدىڭ جوعارىدا ايتقانىمىز بولات اعانىڭ ەلەۋلى ىستەرىنىڭ قاداۋ-قاداۋ تۇستارى عانا. دەسە دە، قازىرگى ۇرپاق قازاق دەگەن حالىقتىڭ بۇگىنگى تاۋەلسىزدىككە جەتۋىنىڭ ەڭ نەگىزگى سىرى – حالقىمىزدىڭ وتتى جىلداردا وتانىن قورعاي بىلگەن، بەيبىت كۇندەردە حالقىنىڭ قام-قايعىسىز تىرلىك ەتۋى ءۇشىن جانتالاسىپ، جارعاق قۇلاعى جاستىققا تيمەي ەڭبەك ەتكەن ازاماتتارىنىڭ تەڭدەسسىز قاجىر-قايراتىن تەرەڭ بىلگەنى ءجون. سول قاتاردا بولات اعامىزدىڭ دا سىڭىرگەن ەڭبەگى ۇشان-تەڭىز. سول تەلەگەي تابىسىنىڭ يگىلىگىن ۇرپاعى كورىپ، ۇلاعاتىن تۇتاس الاش ۇرپاعى ۇلگى ەتسە نەسى ايىپ. وسىنداي اڭقىلداق پەيىلدى، ارىپ-تالمايتىن اسقاق نيەتتى، ەڭبەگىن بۇلدامايتىن اعامىزدىڭ الداعى اسپانى اشىق بولسىن دەپ تىلەيمىز.
قاجەت انداس،
«Q-andas» اقپاراتتىق اگەنتتىگى.











