بەگزات ءومىر

وتكەن عاسىردىڭ العاشقى جارتىسى قازاق تاريحى ءۇشىن كۇيىنىشى مەن ءسۇيىنىشى قاتار ورىلگەن ءداۋىر بولدى. سول جىلدارى ەلگە تۇتقا بولعان ەل اعالارى، قازاقتىڭ بەتكەۇستار قايماقتارىن ايىپتاۋ مەن قۋعىنداۋ بۇرىنعىدان بەتەر كۇشەيىپ، جۇرت جۇرەگىندە مۇڭ مەن قايعى بۇلتى قالىڭداي ءتۇستى. ەكىنشى دۇنيەجۇزىلىك سوعىسى جىلدارىنداعى قيىندىق، ودان كەيىنگى قايتا قۇرۋدىڭ كۇردەلى ساتتەرى تالاي ادامنىڭ بالالىق، جاستىق ءداۋىرىن شارپىدى. سوندىقتان ولار كەيىنگى ۇرپاق وسىنداي قيىندىقتى كورمەي، ساعىنىشتىڭ سالقىنىن سەزبەي، ەمىن-ەركىن وسسە ەكەن دەگەن جاۋاپكەرشىلىكتى ساناسىنا بەرىك ساقتادى. سول ءۇشىن قاجىرلى، قاراپايىم، ەڭبەكقور، ەلگەزەك، جاقسىلىق اتاۋلىعا ەمىرەنىپ، بويكۇيەزدىكتى كورسە باتىل قارسى تۇرۋعا جاندارى جاقىن بولدى. سول قاتارعا وسى ماقالامىزدىڭ كەيىپكەرى بايان رىسبەكوۆانى دا قوسۋعا بولادى.

بايان قايىپبەرگەنقىزىنىڭ اتالارى توتاليتارلىق جۇيەنىڭ ناعىز كۇيىپ تۇرعان شاعىندا سان قيىندىقتى باستان وتكەردى.

– اباي وبلىسىنىڭ ءۇرجار اۋدانىنا قاراستى ەگىنسۋ دەگەن اۋىل بار. ول جەردى قاراكەرەي بابامىزدان تارايتىن رۋلى ەل مەكەندەيدى. اتاقونىسىمىز سول جەر. اۋىلدىڭ جانىندا «ءۇش ءبيدىڭ – قاجىنىڭ بەيىتى»، «ءۇش توبە» دەگەن تاريحي ورىندار بولدى. 1989 جىلى ءۇشارالدا جۇمىس ىستەپ تۇرعان كەزىمدە اكەم ەرتىپ بارىپ كورسەتىپ ەدى. اينالاسىندا مازار وتە كوپ بولاتىن. قاراۋسىز قالعان سول مۇرالار بۇگىندە تاپتالىپ، توپىراق بولىپ قالدى، – دەيدى بايان قايىپبەرگەنقىزى.

قاراكەرەيدەن تارايتىن ەرتورى، بايسىيىق، جانعۇلى، قاسقا اتالارى ءوسىپ-ونگەن اۋلەت. ال قاسقا اقساقالدىڭ الدوڭعار، الدابەرگەن، كارى اتتى 3 ۇلى بولىپتى. بايان رىسبەكوۆا الدوڭعاردان تارايتىن قايىپبەرگەننىڭ قىزى. الايدا، تەگىنىڭ رىسبەكوۆا بولىپ جازىلۋىنىڭ وزىندىك سەبەبى جانە اشى اقيقاتى بار.

– ءبىز الدوڭعاردىڭ تىكەلەي ۇرپاعىمىز. ونىڭ بارعانا، بارلىق، شوكەي، قۇلباي جانە تاۋاسار اتتى 5 ۇلى بولدى. ولاردىڭ ءبارى ءتۇرلى سەبەپپەن ومىردەن ەرتە وتكەن. مەنىڭ اكەم قايىپبەرگەن بارعانادان تاراعان بالالاردىڭ كەنجەسى. اناسى ونى 52 جاسىندا دۇنيەگە اكەلىپتى. اتامىز ول كەزدە 60 جاستا ەكەن. وتكەن عاسىرداعى قۋعىن-سۇرگىننىڭ سالدارىنان گۇلستان اپكەمىز بەن مەنىڭ اكەم عانا ءتىرى قالىپتى. ءبىرازى امان قالۋ ءۇشىن ارعى بەتكە ءوتىپ كەتكەن ەكەن. گۇلستان اپكەمىز: «ءبىزدىڭ اۋىلدا 1000-نان استام جىلقى بولدى. ال ءىرى قارا مەن ۇساق مال باسى وتە كوپ ەدى. اپتاسىنا اۋىلعا 5 جىلقى، 30-عا جۋىق ءىرى-ۇساق مال سويىلىپ، تاراتىلاتىن» دەپ ايتىپ وتىراتىن، – دەيدى بايان اپكەمىز.

بارعانا 2 نەكەلى بولعان ادام. بايبىشەسى شاكەن مەن توقالى باسار كورگەندى جەردەن كوكتەگەن جاندار. وكىنىشكە قاراي، 1930 جىلدارداعى كامپيسكە كەزىندە الدوڭعاردان تاراعان بالالاردان بارعانا عانا ءتىرى قالادى. باۋىرلارىنىڭ امان قالعان بالا-شاعاسىن جيناپ، ءتىرى قالۋدىڭ قامىمەن بارعانا ارعى بەتكە اۋىپ كەتەدى. ولار ارعى بەتتەگى بۇراتالا ءوڭىرىن مەكەندەپ، بارعانا سول جاقتا قايتىس بولادى. بۇل جاقتا قالعان بارعانانىڭ بايبىشەسى شاكەن اپا قايىپبەرگەندى الىپ قىزى گۇلستاندى جاعالاپ، ءۇرجاردان ۇشارالعا كوشىپ كەلىپ، قونىستانادى. گۇلستاننىڭ جۇبايى سادۋاقاس رىسبەكوۆ قۇدايىنا قاراعان ادام بولىپ شىعادى. كۇلىستان ۇشارالداعى ارتەلدە تىگىنشى، سادۋاقاس كۇزەتشى بولىپ جۇمىسقا ورنالاسقان. سونىمەن شاكەن جانە بوسار اپا، قايىپبەرگەن، سادۋاقاستىڭ اناسى ءاني اپا بارلىعى ۇلكەن ءبىر وتباسى بولىپ بىرگە تۇرادى. سادۋاقاس بوس ۋاقىتىندا بالىق پەن اڭ اۋلاپ، توپتى جانعا ەش قيىندىق كورسەتپەي اسىرايدى. سول 1930-شى جىلدارى گۇلستان قايىپبەرگەندى كۇيەۋىنىڭ تەگىنە اۋىستىرىپ الدى. ول كەزدە قايىپبەرگەن 5 جاستا بولاتىن. ويتكەنى سول تۇستا قىتايدا تۋىسى بار ادامدار قۋعىندالىپ، جۇمىستان الىنىپ، قاتتى قىسىم كورەتىن. قايىپبەرگەننىڭ دە، ونىڭ بالالارىنىڭ دا كەيىنگى جىلداردا قاقتى-سوققى كورمەي وسۋىنە، ەرجەتۋىنە، ءوز تالانتىمەن ەلگە قىزمەت ەتۋىنە وسى قادامنىڭ دا سەپتىگى تيگەنى انىق. كەيىن شوكەيدىڭ توقالى زاكاريا 1969 جىلى ارعى بەتتەگى الدوڭعار ۇرپاقتارىن باستاپ، ەلگە ورالادى. ال ارعى بەتكە وتكەن بارعانا ۇرپاقتارى اكەسىنىڭ تەگىن ساقتاپ قالادى.

وسىنداي تاعدىر تالايى قىزىق، سان قيىندىقتى كورىپ وسكەن اۋلەتتىڭ باسىنا 1941 جىلى باستالعان سوعىستىڭ دا سالقىنى از تيمەدى. سادۋاقاس اتا مەن قايىپبەرگەن سوعىسقا اتتانىپ، ىنتىماعى ۇيىپ وتىرعان وتباسىنىڭ شىرقىن بۇزدى. سادۋاقاس سوعىستان ورالماي، گۇلستان اپا 32 جاسىندا جەسىر قالدى.

– اكەم قايىپبەرگەن كەڭەس ارمياسىنىڭ قاتارىندا 1952 جىلعا دەيىن بولدى. ىشكى ىستەر حالىق اسكەرىنىڭ قاتارىندا ۋكراينانى ازات ەتۋگە قاتىسىپ، ميناشى بولدى. بارلىق الەمدىك كوشباسشىلار جينالىپ، بەيبىتشىلىك تۋرالى كەلىسسوزدەر جۇرگىزگەن يالتا كونفەرەنتسياسىندا كۇزەت قىزمەتىن اتقاردى. سوندىقتان سوعىس بىتسە دە ونى اۋىلعا قايتارمادى. اكەم وتە قاراپايىم، تاربيەلى ادام ەدى. اقىرى گۇلستان اپا جوعارى-تومەنگە حات جازىپ، اسكەري كوميسسارياتقا اناسى، اپكەسى جانە اكەسىنىڭ اناسى بار ەكەنىن ايتىپ ءجۇرىپ، اسكەردەن قايتارىپ الدى، – دەيدى بايان قايىپبەرگەنقىزى.

اكەسى ەلگە كەلگەن سوڭ اۋداندىق كومسومول كوميتەتى ونى بىردەن رايكومعا جۇمىسقا ورنالاستىردى. الدىمەن نۇسقاۋشى، سودان كەيىن ءبولىم مەڭگەرۋشىسى بولدى. سول جەردە اۋىلدىق مەكتەپ ءبولىمىنىڭ مەڭگەرۋشىسى بولىپ ىستەيتىن جاقسىبالا الدابەرگەنقىزىمەن ۇيلەندى. جاقسىبالا 15 جاسىندا جەتىم قالىپ، وتەعۇل اتا مەن قۇرماش اپانىڭ تاربيەسىندە ونەگەلى بولىپ بويجەتىپتى. ۇيلەنگەن سوڭ اۋداندىق كومسومول كوميتەتىندە جۇمىس ىستەي ءجۇرىپ، قايىپبەرگەن قازمۋ-ءدىڭ جۋرناليستيكا فاكۋلتەتىن، جاقسىبالا اباي اتىنداعى قازپي-ءنىڭ تاريح فاكۋلتەتىن سىرتتاي ءبىتىردى. وسىدان كەيىن قايىپبەرگەن اۋداندىق كومسومول كوميتەتىندە ۇيىمداستىرۋ ءبولىمىنىڭ مەڭگەرۋشىسى، اۋداندىق پارتيا كوميتەتىنىڭ نۇسقاۋشىسى، كەيىن اۋداندىق گازەتتىڭ جاۋاپتى حاتشى، باس رەداكتوردىڭ ورىنباسارى، باس رەداكتورى بولدى. ۇلى وتان سوعىسىنىڭ ارداگەرى، قازكسر جانە كسرو جۋرناليستەر وداعىنىڭ مۇشەسى، ءۇشارال قالاسىنىڭ قۇرمەتتى ازاماتى. جاقسىبالا ءومىر بويى ءبىلىم بەرۋ سالاسىندا جۇمىس ىستەدى. قازاق كسر اعارتۋ ءىسىنىڭ ۇزدىگى، پارتيا ۇيىمىنىڭ حاتشىسى، ۇيىمداستىرۋ مەڭگەرۋشىسى بولدى. ەكەۋى دە اۋدان تۇرعىندارى ورتاسىندا قۇرمەتكە بولەندى. ءبىر قىز، ءتورت ۇل ءوسىرىپ، ولاردى تاربيەلەپ ەرجەتكىزدى.

– اتا-انامىز ءبىزدىڭ جان-جاقتى دامىعان ادام بولعانىمىزدى قالادى. ءبىزدى ءار ءتۇرلى ۇيىرمەلەر مەن سەكتسيالارعا بەردى. گۇلستان اپا ۇيدە وتىرسا دا ءبىز بالاباقشاعا باردىق. ءبىرىنشى سىنىپتان باستاپ ساۋىقتىرۋ جانە پيونەر لاگەرلەرىنە جىبەرىپ تۇردى. مەن، قاسەن جانە قانات مۋزىكا مەكتەبىندە وقىدىق، فورتەپيانو سىنىبىن 7-سىنىپپەن ءبىتىردىم. 3-سىنىپتا ماعان فورتەپيانو ساتىپ اپەردى، بۇل ول كەزدە قىمبات دۇنيە ەدى. قاسەن مەن قانات بايان سىنىبىندا وقىدى. ولارعا دا اسپاپ ساتىپ اپەردى. سونداي-اق، قانات پەن داۋلەت بالالار سپورت مەكتەبىندە وقىپ، كەيىن سپورتشى بولىپ، الماتى قالاسىنداعى دەنە شىنىقتىرۋ ينستيتۋتىنا وقۋعا ءتۇستى. قانات كەيىن قازمۋ-ءدىڭ تاريح فاكۋلتەتىن ءبىتىردى. قاسەن فوتوسۋرەتپەن اينالىستى جانە بەينەلەۋ ستۋدياسىندا جاقسى سۋرەت سالدى. «جاس تەحنيك» بولدى، باياننان باسقا گيتارادا وينادى. ول قازپي-ءدىڭ كوركەمگرافيكا فاكۋلتەتىن، سەيىت قازپي-ءدىڭ تاريح فاكۋلتەتىن ءبىتىردى. قانات گيتارادا وينادى، مەكتەپتە ۆوكالدى-اسپاپتى انسابمل قۇرىپ، مۋزىكا جازدى، سامبومەن اينالىستى. مەن اۋداندىق كومسومول كوميتەتىندە جۇمىس ىستەي باستاعاندا، ىنىلەرىمدى باسقا قالالارعا پيونەر لاگەرلەرىنە جىبەرۋگە مۇمكىندىك تۋدى. سونىمەن قاتار، ولار تۋريس رەتىندە ماسكەۋ، لەنينگرادتا بولدى. قازىر ولاردىڭ وتباسى، بالاسى، نەمەرەسى بار. كەلىندەرىم بيشات، الماگۇل، گۇلنۇر، قارلىعاش يبالى، يناباتتى جاندار بولىپ كەزدەستى. شەشەمنىڭ اكەسى الدابەرگەن اتامىز سوعىستا قايتىس بولىپتى. ءوز وسيەتىندە: «ۇل بالا بولسا مەنىڭ تەگىمدى بەرىڭدەر» دەگەن ەكەن. سونىمەن ىنىلەرىمنىڭ جانە ولاردىڭ بالالارى الدابەرگەنوۆتەر بولىپ جازىلعان، – دەيدى بايان قايىپبەرگەنقىزى.

بايان قايىپبەرگەنقىزى 1953 جىلى 16 مامىردا تالدىقورعان وبلىسى، الاكول اۋدانىنىڭ ءۇشارال قالاسىندا دۇنيەگە كەلەدى. ءۇشارال قالاسىنىڭ لەنين اتىنداعى ورتا مەكتەپتى 1970 جىلى ءبىتىردى. ورتا مەكتەپتە جۇرگەندە اكەسى سياقتى جۋرناليست بولۋعا تالپىندى. سول جىلدارى «نوۆايا جيزن» گازەتىندە، رەسپۋبليكالىق «درۋجنىە رەبياتا» گازەتىندە، ءتىپتى بۇكىلوداقتىق «پيونەرسكايا پراۆدا» گازەتىندە ماقالالارى جاريالانا باستاعان. سونداي-اق، مەكتەپ قابىرعا گازەتىنىڭ رەداكتسيالىق القاسىندا بولىپ، قازمۋ-ءدىڭ جۋرناليستيكا فاكۋلتەتىنە ءتۇسۋدى ارماندادى. بىراق ارمانى ورىندالماسا دا، الماتى قالاسىنداعى قازاق مەملەكەتتىك پەداگوگيكالىق ينستيتۋتىنا ءتۇسىپ، ونى 1974 جىلى «ورىس ءتىلى جانە ادەبيەت» ءپانىنىڭ وقىتۋشىسى ماماندىعى بويىنشا ءتامامدادى. ينستيتۋتتا قازاقستان بويىنشا بيدايدىڭ قاتتى سورتتارىن ىرىكتەۋ جانە وسىرۋمەن اينالىسقان اتاقتى اكادەميك باراەۆتىڭ قىزى سۆەتلانا باراەۆانىڭ تاربيەسىن كوردى. سونىمەن قاتار، وقۋ باعدارلاماسىنا كىرمەيتىن ءتۇرلى ءىس-شارالار ۇيىمداستىردى. ماسكەۋگە جانە بالتىق جاعالاۋىنا تۋريستىك كومسومولدىق جولدامامەن باردى، شىمبۇلاققا تاۋعا شىعۋدىڭ باستاماشىسى بولدى. الاكول، اندرەەۆ، سارقان اۋداندارىندا ديالەكتيكالىق ەكسپەديتسيامەن بارىپ، ماتەريال جيناپ، عىلىمي جۇمىستار جازىپ، رەسپۋبليكالىق عىلىمي ستۋدەنتتەر كونفەرەنتسياسىنا جىبەرىلدى. 2-كۋرستا تسەلينوگراد قالاسىنا، ال 3-كۋرستا سەمەي قالاسىنا ەكسپەدياتسيدا بولىپ، قازاقستان كومسومولى وك گراموتالارىمەن ماراپاتتالدى. قاراجاتىن ۇنەمدەپ قۇندى كىتاپتار جيناۋمەن اينالىستى.

1984-1987 جىلدارى كوكپ وك جانىنداعى الماتى جوعارعى پارتيا مەكتەبىندە وقىپ، ونى دا ناتيجەلى اياقتادى. ال 1974-1975 جىلدارى ءۇشارال قالاسىنداعى ن. كرۋپسكايا اتىنداعى ورتا مەكتەپتە ورىس ءتىلى جانە ادەبيەت ءپانىنىڭ مۇعالىمى بولىپ جۇمىس ىستەپ، ءوزىنىڭ ءبىلىمى مەن بىلىگىن شىڭدادى. سول تۇستارى ونىڭ الدىنان ءبىلىم العان وقۋشىلار بۇگىندە تالدىقورعان، الماتى جانە قازاقستاننىڭ باسقا قالالارىندا، رەسەي، گەرمانيا، شەشەنستاندا تۇرادى. ءبارى دە بىلىكتى مامان بولىپ ەرجەتتى. ءالى دە حابارلاسىپ تۇرادى. 1975 جىلى مەكتەپ جاستارى مەن پيونەرلەر ماسەلەلەرى بويىنشا جەتەكشىلىك جۇرگىزەتىن قازاقستاننىڭ لكجو الاكول اۋداندىق كوميتەتىنىڭ حاتشىسى، 1977 جىلى قازاقستاننىڭ لكجو الاكول اۋداندىق كوميتەتىنىڭ ءبىرىنشى حاتشىسى بولىپ سايلاندى. ەندى ءومىردىڭ ەڭ قىزىقتى جانە تىنىمسىز شاعى باستالدى. پيونەرگە قابىلداۋ، مەكتەپ وقۋشىلارىنىڭ كومسومول، پيونەر سلەتتەرى، لاگەرلەر، جيىندار ونىڭ كۇندەلىكتى ومىرىنە اينالدى. اۋداندىق كومسومول كوميتەتىنىڭ حاتشىسى عانا ەمەس، پيونەر ۇيىمىنىڭ اۋداندىق كەڭەسىنىڭ توراعاسى رەتىندە دە تىنىمسىز ەڭبەكتەنۋگە تۋرا كەلدى. ناتيجەسىندە بۇكىلوداقتىق پيونەر ۇيىمىنىڭ 60 جىلدىعىنا وراي «پيونەرلەرمەن بەلسەندى جۇمىسى ءۇشىن» بلكجو وك بەلگىسىمەن ماراپاتتالدى.

1983 جىلى الاكول اۋداندىق پارتيا كوميتەتىنىڭ يدەولوگيالىق ماسەلەلەرى جونىندە حاتشى بولىپ سايلاندى. كوكپ تاراتىلعانشا 1991 جىلدىڭ تامىز ايىنا دەيىن بۇل قىزمەتتە 8 جىل جۇمىس اتقاردى. سول جىلدارداعى ەڭ ۇلكەن جەتىستىگى – شەگارالى وڭىردەگى مادەني شارالاردىڭ جاندانۋى مەن جاۋىنگەرلىك داڭق مۇراجايلارىنىڭ اشىلۋىنا كوپ ەڭبەك ەتتى. ەلىمىز تاۋەلسىزدىك العاننان كەيىن تالدىقورعان وبلىستىق اكىمدىگىندە كەڭەسشى، اعا رەفەرەنتى، تالدىقورعان وبلىسىنىڭ الماتى وبلىسىنا قوسىلۋىنا بايلانىستى تالدىقورعان قالاسى اكىمدىگىنىڭ ىشكى ساياسات ءبولىمىنىڭ مەڭگەرۋشىسى، قالالىق ءبىلىم ءبولىمىنىڭ باستىعى، الماتى وبلىسى بويىنشا بايلانىس قىزمەتكەرلەرىنىڭ سالالىق كاسىپتىك وداعىنىڭ ءتورايىمى بولىپ سان-سالادا قىزمەت اتقاردى. سول تۇستارى تالدىقورعان قالاسى، الاكول اۋدانىندا، تالدىقورعان جانە الماتى وبلىستارىندا، قر كاسىپوداقتار فەدەراتسياسىندا، «كاسىپوداقتاردىڭ دۇنيەجۇزىلىك فەدەراتسياسىنىڭ» قوعامدىق ومىرىنە بەلسەندى اتسالىستى. 15 جىل الاكول اۋداندىق كەڭەسىنىڭ حالىق دەپۋتاتى، الاكول اۋدانىنىڭ كومسومول، پارتيا ورگاندارىنىڭ جانە بيۋروسىنىڭ مۇشەسى، تالدىقورعان وبلىسى جانە الاكول اۋدانىنىڭ كومسومول، پارتيا كونفەرەنتسيالارىنىڭ دەلەگاتى، قازاقستاننىڭ لكجو 13-14 سەزىندە، قازاقستاننىڭ بايلانىس قىزمەتكەرلەرىنىڭ كاسىپوداعى مەن قازاقستان رەسپۋبليكاسىنىڭ كاسىپوداقتار فەدەراتسياسىنىڭ دەلەگاتى، قازاقستان مۇعالىمدەر سەزىنىڭ 2 مارتە دەلەگاتى بولىپ سايلاندى. 2007 جىلدان باستاپ 2015 جىلعا دەيىن قرفك باس كەڭەسىنىڭ مۇشەسى، قر بايلانىس قىزمەتكەرلەرى كاسىپوداعىنىڭ اتقارۋ كوميتەتىنىڭ مۇشەسى، قر بايلانىس قىزمەتكەرلەرى كاسىپوداعىنىڭ ورتالىق كوميتەتى توراعاسىنىڭ شتاتتان تىس ورىنباسارى بولىپ جۇمىس اتقاردى.

مالايزياداعى كۋالا-لۋمپۋر قالاسىندا ورتا ازيا جانە تىنىق مۇحيتى وڭىرلەرىنەن حالىقارالىق ايەلدەردىڭ، تۇركياداعى ستامبۋل قالاسىندا بايلانىسشىلار مەن «تيۋركمەتالل» مەتاللۋرگيا ونەركاسىبى ماماندارىنىڭ حالىقارالىق سەزىنە قاتىسىپ، مول تاجىريبە جينادى. جاپونيانىڭ ناگاساكي جانە حيروسيما قالالارى وقيعالارىنىڭ 45 جىلدىعىنا ارنالعان «يۋني» دۇنيەجۇزىلىك كاسىپوداعىنىڭ حالىقارالىق فورۋمىنا قاتىستى. بۇگىندە وبلىستاعى جانە تالدىقورعان قالاسىنداعى قوعامدىق جۇمىستارعا بەلسەنە ارالاسىپ كەلەدى.

ەڭبەگىنىڭ ناتيجەسىن دە كوردى. العاش مەكتەپتە ۇستاز بولىپ جۇمىس باستاعاننان بۇگىنگە دەيىن كوپتەگەن ماراپاتتىڭ يەگەرى اتاندى. مەملەكەت باسشىلارى مەن ءتۇرلى مينيسترلىكتىڭ العىس حاتى مەن قۇرمەت گراموتالارىن، «ەڭبەك ارداگەرى»، «كاسىبوداق ارداگەرى» قاتارلى مەدالداردىڭ يەگەرى ءارى «قازاق كسر-ءىنىڭ ۇزدىك اعارتۋشىسى» جانە الاكول اۋدانىنىڭ قۇرمەتتى ازاماتى.

جوعارىدا جازىلعاندار بايان رىسبەكوۆانىڭ ءومىرىنىڭ قاداۋ-قاداۋ تۇستارى عانا. بىراق تۇتاس ءومىرىن ەلىنىڭ وركەندەۋى مەن ءوڭىردىڭ دامۋىنا ارناعان جاننىڭ ءار جەتىستىگى ەسكەرۋسىز قالمايتىنى انىق. جىلدار جىلجىپ، ۋاقىت وتكەن سايىن ونىڭ قۇنى ارتىپ، باعاسى دا قىمباتتاي بەرمەك.

قاجەت انداس،

«جەتىسۋ» گازەتى، №50، سەنبى، 1 مامىر 2023