جىگىت
كەلگەنىم تويعا ءمىنىپ توراالا ازبان،
وتپەيدى تولارساقتاپ قورقىپ سازدان.
كەلىپ ەم الىس جاقتان جولاۋشىلاپ،
كەز بولدىڭ قوس بويجەتكەن بوياق قازعان.
قىز:
بولعان با بالالار قىسىڭ قاتتى،
ءمىنىپسىڭ تۇرالاعان ارىق اتتى.
تۇرىڭنەن تۇك قالماپتى بايقاپ كورسەم،
بوپ قاپسىڭ قاۋعا ساقال، بۋىرىل شاشتى.
جىگىت:
قىزداردىڭ تاڭعالامىن قاسقاسىنان،
نەگە قاقساي بەرەسىڭ جاس باسىڭنان.
ءبۇيىمتايىم سۇرايتىن تولىپ جاتىر،
بىردەن سۇراپ وتەيىن باس-باسىنان.
قىز:
مىنەدى جولاۋشىلار جەلماياسىن،
كيەدى تويعا قىزدار ءدۇرياسىن.
بۇيىمىڭ بىزدەر سۇرار شەشەڭدە بار،
شەشەسى بالاسىنان نەگە اياسىن.
جىگىت:
قىزدار-اۋ قيسىنسىزدان كيمەلەدىڭ،
سوزىڭە باعاناعى ۇندەمەدىم.
سوزدەرىڭ تەرىسكە الىپ بارا جاتىر،
بىلاي تامان، وكپەم بار ءجۇر دەمەدىڭ.
قىز:
قىزى ەدىم باي اۋىلدىڭ اتىم قاۋىن،
اكەمنىڭ داۋلەتىندە الشاڭداۋىم.
تىسىڭمەن تىستەسەڭ دە اعىتىلماس،
جوعارى ەمەس، تومەنگى تۇيمە باۋىم.
جىگىت:
قىز ەدىڭ باي اۋىلدىڭ اتىڭ قاۋىن،
بولاما سەندەي قىزدان جاتىرقاۋىم.
قاۋىن قىز قارعىپ شىقسام بيىگىڭە،
مۇنان دا جاقسى بولار قارقىلداۋىڭ.
قىز:
سيىرىڭ وتكەن جىلى اۋسىل بولعان،
ساۋدىراپ ىڭىرشاعىڭ جۇرتتا قالعان.
ماقتانبا كورمەگەندەي ەكى نەمە،
ەلدەرىڭ ءبىزدىڭ ەلدەن ساۋىن ساۋعان.
جىگىت:
سيىرعا بارلىق جەردە اۋسىل كەلدى،
سەنىڭ دە سيىرلارىڭ تاۋسىلدى ەندى.
بۇزاۋىڭ ەمىپ كەتسە جىلاۋشى ەدىڭ،
ءوزىڭ دە شامالاپ قوي شارتىڭدى ەندى.
جوعارىداعى ايتىستى تىلەۋقابال ابىلعازىۇلىنان جازىپ الىپ، ساقتاعان انداس وماراقىنۇلى
دەرەككوز: دودا: (ايتىستار مەن تاريحي-ەتنوگرافيالىق جىرلارى) / ا. وماراقىن ؛ [قۇراستىرعان: ءا. ماجاي [ج. ب.] .- تالدىقورعان : [ب. ج.]. https://kazneb.kz/kk/catalogue/view/1657687
“Q-Andas” اقپاراتتىق اگەنتتىگى











