قۋانبەك:
باسىندا سوربۇلاقتىڭ قىستاپ ءجۇرمىن،
ونەردى ولەڭمەنەن نۇسقاپ ءجۇرمىن.
قانىشاي، وزىڭە ارناپ ولەڭ-جىردىڭ،
جورعاسىن، جۇيرىگىمەن ۇستاپ ءجۇرمىن.
باسىندا كوكشوقىنىڭ جايلاپ ءجۇرمىن،
بۇلبۇلداي مىڭ قۇبىلىپ سايراپ ءجۇرمىن.
قانىشاي ولەڭمەن ءبىر سايىسۋعا،
جاراتىپ جىر ءدۇلدىلىن سايلاپ ءجۇرمىن.
قانىشاي:
باسىندا سوربۇلاقتىڭ ءان ساپ ءجۇرمىن،
اتىڭدى ءبىر ەستۋدى اڭساپ ءجۇرمىن.
اسەم ءان بال شىرىنداي سوزدەرىڭدى،
مەيىزدەي تاڭدايعا ساپ تاۋساپ ءجۇرمىن.
جان ەدىڭ جاستايىڭنان ولەڭ قۋعان،
تاماشا جۇرگەن جەرىڭ جىر مەن دۋمان.
قىرانداي قىراعى ەدىڭ ءىلىپ تۇسەر،
قۇربىڭنان ءوزىڭ تەكتەس ارتىق تۋعان.
كەيىن قانىشاي ۇزاتىلار تۇستا، ونىڭ ەل مەن جەرمەن قوشتاسقان ارىز ولەڭىن قۋاندىق ايتقان ەكەن.
اۋىلعا ادام بارماس ارالداعى،
كەلمەيدى-اۋ اتار جەرگە مارالداعى.
ون بەس پەن ون التىدا سىرتقا كەتىپ،
قىزداردىڭ ىشتە كەتەر بار ارمانى.
قونبايدى تاۋدىڭ قۇسى شي باسىنا،
بىرەۋدىڭ ءىلىنىپسىڭ بۇيداسىنا.
ات ەرتتەپ اتتانۋعا دايار بوپسىڭ،
قوش ايتىپ اتتانارسىڭ ءۇي باسىنا.
ويناۋشى ەڭ جاس كۇنىڭدە تۇيە بولىپ،
شىقتى عوي ساعان بىرەۋ يە بولىپ.
شاي سال دەسە شاينەككە شاي سالماۋشى ەڭ،
ۇستايسىڭ قايتىپ قازان كۇيە بولىپ.
بازاردان الىپ كەلگەن شىنى-شاينەك،
كىرپىشتەن ءۇي سالدىردىم ءىشى اينەك.
بارعان جەردە جايدارى جاقسى بوپ ءجۇر،
جاناسىپ ءوز قۇربىڭمەن كۇلىپ-ويناپ، – دەگەن ەكەن.
قۋانبەك پەن بەگزاتقاننىڭ ايتىسى
قۇانبەك:
بەگزاتقان ءسوزىڭ بۇلاق، ءانىڭ قاۋسار،
اتىڭدى مىڭ بۇرالعان قۇربىڭ اڭسار.
ولەڭدەرىڭ ارالدىڭ التىنىنداي،
سوزدەرىڭ ماگنيتتەي ءبىزدى تارتار.
بۇگىن ءتۇن ۇزاق تۇنگە تالماي شىرقا،
قۇربىڭنىڭ ءان قۇمارى سوندا تارقار.
بەگزاتقان:
ەستىدىم كەلدى دەگەن حابارىڭدى،
بىلمەدىم نانباسىڭدى، نانارىمدى.
ءوزىڭدى كوپتەن بەرى اڭساۋلى ەدىم،
كورسەم دەپ التىن ديدار جامالىڭدى.
ايتقان ءسوز، سالعان ءانىڭ ويدى تەربەپ،
نۇر قۇيىپ جادىراتار جانىمىزدى.
جوعارىداعى ايتىستى ەل اۋزىنان جازىپ الىپ، ساقتاعان انداس وماراقىنۇلى
دەرەككوز: دودا: (ايتىستار مەن تاريحي-ەتنوگرافيالىق جىرلارى) / ا. وماراقىن ؛ [قۇراستىرعان: ءا. ماجاي [ج. ب.] .- تالدىقورعان : [ب. ج.]. https://kazneb.kz/kk/catalogue/view/1657687
“Q-Andas” اقپاراتتىق اگەنتتىگى











