نىساننىڭ سالتاناتتى اشىلۋىنا وبلىساكىمىنىڭ ورىنباسارى دياس ەسداۋلەتوۆ، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى دانيار قاسقاراۋوۆ، الاكول اۋدانىنىڭ اكىمى الماس ابدينوۆ، بەلگىلى سپورت ارداگەرلەرى، وليمپيادا چەمپيوندارى مەن ءوڭىردىڭ قۇرمەتتى ازاماتتارى قاتىستى.
جوبانىڭ جالپى قۇنى 3،8 ملرد. تەڭگەنى قۇرايدى. عيماراتتاردىڭ جالپى قۇرىلىس اۋماعى 5772،1 شارشى مەتر، سپورت كەشەنىنىڭ جوبالىق قۋاتتىلىعى 160 ورىن، ال جاتاقحانا 244 ورىنعا ارنالعان. تاپسىرىس بەرۋشى وبلىستىق قۇرىلىس باسقارماسى، نەگىزگى مەردىگەر «داۋلەت-سەرپين 603» جشس، تەحنيكالىق قاداعالاۋدى «دان ستروي پروەكت» جشس جۇرگىزگەن.
كەشەن قۇرامىنا كۇرەس، بوكس، ۆولەيبول جانە باسكەتبول زالدارى، ترەناجەر زالى، مەديتسينالىق جانە قالپىنا كەلتىرۋ بولمەلەرى، سونداي-اق اشىق فۋتبول الاڭى ەنگەن. ال بەس قاباتتى جاتاقحانا سپورتشىلاردىڭ قاۋىپسىز ءارى جايلى ءومىر سۇرۋىنە تولىقتاي بەيىمدەلگەن.
سالتاناتتى جيىندا العاشقى قۇتتىقتاۋ ءسوزدى وبلىس اكىمىنىڭ ورىنباسارى دياس ەسداۋلەتوۆ سويلەپ، جاڭا سپورت كەشەنىنىڭ ءوڭىر ءۇشىن ماڭىزىن اتاپ ءوتتى:
– بۇل نىسان اۋىل سپورتىن دامىتۋعا تىڭ سەرپىن بەرىپ، جاسوسپىرىمدەردىڭ جۇيەلى تۇردە جاتتىعىپ، ۇلكەن سپورتقا قادام باسۋىنا مۇمكىندىك جاسايدى. مەملەكەت تاراپىنان سپورت ينفراقۇرىلىمىن دامىتۋ الداعى ۋاقىتتا دا جالعاسىن تابادى، – دەدى ول.
قازاقستان رەسپۋبليكاسى پارلامەنتى ءماجىلىسىنىڭ دەپۋتاتى دانيار قاسقاراۋوۆ ءوز سوزىندە جاستار سپورتىنا سالىنعان ينۆەستيتسيا – ەلدىڭ بولاشاعىنا سالىنعان ينۆەستيتسيا ەكەنىن اتاپ ءوتتى.
سونداي-اق وليمپيادا چەمپيونى ەرماحان ىبىرايىموۆ، گرەك-ريم كۇرەسىنەن وليمپيادا چەمپيونى يۋريي مەلنيچەنكو جاس سپورتشىلارعا ساتتىلىك تىلەپ، تاباندىلىق پەن ەڭبەك قانا ۇلكەن جەڭىسكە جەتكىزەتىنىن جەتكىزدى.
ءىس-شارا بارىسىندا 21–26 ماۋسىم ارالىعىندا ۆەتنامنىڭ ۆۋنگتاۋ قالاسىندا وتكەن U17 جاسوسپىرىمدەر اراسىنداعى ازيا چەمپيوناتىندا 60 كەلى سالماقتا التىن مەدال جەڭىپ العان لەپسى مەكتەبىنىڭ وقۋشىسى اقان دامير ەرەكشە قۇرمەتكە يە بولدى. چەمپيون سپورتشىعا 500000 تەڭگە، سونداي-اق، ونىڭ جاتتىقتىرۋشىسى وتارقۇل نۇرداۋلەتكە دە 500000 تەڭگە كولەمىندە اقشالاي سىياقى تابىستالدى. ماراپاتتى قازاقستانداعى بوكس جانە كۇرەس فەدەراتسيالارىنىڭ ۆيتسە-پرەزيدەنتى، مەتسەنات باۋىرجان وسپانوۆ تابىستادى.
سالتاناتتى ءراسىم بارىسىندا الماتى جانە جەتىسۋ وبلىستارىنىڭ قۇرمەتتى ازاماتى، ەڭبەك ارداگەرى بولاتبەك شىنقوجاۇلى قاپسالاموۆ جاڭا سپورت كەشەنىنىڭ بولاشاعىنا اق باتاسىن بەردى. ودان كەيىن قۇرمەتتى قوناقتاردىڭ قاتىسۋىمەن لەنتا قيۋ ءراسىمى ءوتىپ، قوناقتار عيماراتتى ارالاپ كوردى.
لەپسى اۋىلىندا اشىلعان بۇل جاڭا سپورت كەشەنى – وڭىردەگى سپورتتىق رەزەرۆتى قالىپتاستىرۋعا، اۋىل جاستارىنىڭ الەۋەتىن اشۋعا جانە بولاشاقتا ۇلتتىق ءارى حالىقارالىق ارەنادا ەل نامىسىن قورعايتىن چەمپيونداردى تاربيەلەۋگە باعىتتالعان ماڭىزدى قادام.
جەتىسۋدىڭ جەلمەن جارىسقان جاستارى ءاردايىم جەڭىس تۇعىرىنان كورىنە بەرسىن!
قاجەت انداس،
«Q-andas» اقپاراتتىق اگەنتتىگى.
لەپسى اۋىلى،
الاكول اۋدانى.
