پاۆلودار قالاسىندا وتكەن پارا ۇستەل تەننيسىنەن جاستار اراسىنداعى قازاقستان رەسپۋبليكاسىنىڭ چەمپيوناتىندا وبلىس سپورتشىلارى جوعارى ناتيجە كورسەتىپ، ءوڭىر ابىرويىن اسقاقتاتتى. ەلدىڭ ءار وڭىرىنەن جينالعان جاس سپورتشىلار دوداسىندا جەتىسۋلىقتار جەكەلەي، جۇپتىق جانە ابسوليۋتتىك ساناتتاردا جۇلدەلى ورىن يەلەنىپ، جالپىكوماندالىق ەسەپتە دە ۇزدىكتەر قاتارىنان كورىندى.بۇل باسەكەدە ءوڭىر نامىسىن قورعاعان جاس سپورتشىلار جوعارى شەبەرلىك تانىتىپ، بىرنەشە سانات بويىنشا جەڭىس تۇعىرىنان كورىندى. مۇنداي تابىس جەتىسۋ جەرىندە پاراسپورتتىڭ، سونىڭ ىشىندە پارا ۇستەل تەننيسىنىڭ جۇيەلى تۇردە دامىپ كەلە جاتقانىن اڭعارتتى.
چەمپيونات بارىسىندا ءجۇنىس الديار ەرەكشە قارقىنىمەن كوزگە ءتۇستى. ول جەكەلەي سىندا قارسىلاستارىنان باسىم ءتۇسىپ، ءبىرىنشى ورىندى يەلەنسە، ابسوليۋتتىك سىندا دا توپ جارىپ، ەكى بىردەي التىن جۇلدەنى قانجىعاسىنا بايلادى. ىسقاق داريا دا جوعارى دەڭگەيدەگى دايىندىعىن دالەلدەپ، جەكەلەي سىندا چەمپيون اتانىپ، ابسوليۋتتىك سىندا قولا مەدال ولجالادى. داۋلەت اقات جەكەلەي سىندا جەڭىمپاز اتانسا، قوجابەك اديا ەكىنشى ورىندى يەلەندى. ايدوسۇلى ارمان ۇزدىك ۇشتىكتى تۇيىندەپ، قولا جۇلدەگە قول جەتكىزدى.
جۇپتىق جانە ارالاس ساناتتاردا دا جەتىسۋ سپورتشىلارى تابىستى ونەر كورسەتتى. MD8 ساناتىندا ءجۇنىس الديار مەن ىسقاق داريا جەڭىمپاز اتانىپ، التىن جۇلدەنى يەلەندى. XD10 ساناتىندا دا وسى جۇپ ۇزدىك ناتيجە كورسەتىپ، ءبىرىنشى ورىنعا كوتەرىلدى. سونىمەن قاتار، قوجابەك اديا ءوز ساناتىندا التىن جۇلدە السا، جارقىن اعارسىن ءۇشىنشى ورىننان كورىندى. ال XD14 ساناتىندا مەڭلىباي اقجول مەن قوجابەك اديا قولا جۇلدەگە يە بولدى.
وسى جارىستا «جەتىسۋ» ولكەتانۋشىلار ورتالىعىنىڭ قىزمەتكەرى مەڭلىباي اقجولدىڭ دا مەرەيى ۇستەم بولدى. ەل چەمپيوناتىندا جۇلدەلى ورىن يەلەنۋى ونىڭ سپورتتاعى تالپىنىسى مەن تاباندىلىعىن عانا ەمەس، ءوزى قىزمەت ەتەتىن ۇجىمنىڭ دا ابىروي-بەدەلىن ارتتىرا تۇسكەنىن كورسەتتى. بۇل جەتىستىك ارقىلى مەڭلىباي اقجول «جەتىسۋ» ولكەتانۋشىلار ورتالىعىنىڭ مەرەيىن ءوسىرىپ، ۇجىم قورجىنىنا قۋانىش پەن ماقتانىش سىيلادى.
جالپىكوماندالىق ەسەپتەگى جوعارى ناتيجە جەتىسۋ قۇراماسىنىڭ الەۋەتى مىقتى ەكەنىن تاعى ءبىر مارتە دالەلدەدى. بۇل جەڭىس سپورتشىلاردىڭ تىنىمسىز ەڭبەگى، باپكەرلەردىڭ بىلىكتى دايارلىعى جانە وڭىردەگى سپورت سالاسىنا كورسەتىلىپ وتىرعان قولداۋدىڭ ناقتى جەمىسى. جاس سپورتشىلاردىڭ ەل چەمپيوناتىنداعى بۇل تابىسى الداعى ءىرى جارىستاردا دا ۇلكەن ءۇمىت كۇتتىرەتىنى انىق.
قاجەت انداس،
Q-Andas اقپارات اگەنتتىگى
