«جەتىسۋ» ولكەتانۋشىلار ورتالىعى قوعامدىق بىرلەستىگى «كىتاپ وقيتىن ۇلت» جوباسى اياسىندا «ولكەتانۋ – ۇرپاق تاربيەسىنىڭ التىن ارقاۋى» اتتى وبلىستىق سەمينار-ترەنينگ وتكىزدى. تاعىلىمدى شارانىڭ باستى ماقساتى تۋعان ولكە تاريحىن ناسيحاتتاۋ، ءبىلىم بەرۋ ۇيىمدارىنداعى ولكەتانۋ باعىتىنداعى جۇمىستى جانداندىرۋ، وقۋشىلاردىڭ تاريحي تانىمىن ارتتىرۋ جانە ۇستازدار اراسىندا تاجىريبە الماسۋ الاڭىن قالىپتاستىرۋ بولدى.
ماڭىزدى شاراعا وبلىستىق ادىستەمەلىك ورتالىق قولداۋ ءبىلدىردى. بۇل باستاما وڭىردەگى ولكەتانۋ جۇمىستارىن جۇيەلەۋگە، ءبىلىم بەرۋ سالاسىنداعى تاريحي-تانىمدىق باعىتتى كۇشەيتۋگە ارنالعان ماڭىزدى قادامداردىڭ ءبىرى رەتىندە باعالاندى.
سەمينار-ترەنينگكە تالدىقورعان قالاسىنداعى جالپى ءبىلىم بەرەتىن ۇيىمداردىڭ تاريح جانە گەوگرافيا ءپانى مۇعالىمدەرى قاتىستى. باسقوسۋ بارىسىندا ءوڭىر تاريحىن زەرتتەۋ، تاريحي سانانى جاڭعىرتۋ، ۇلتتىق قۇندىلىقتاردى دارىپتەۋ باعىتىنداعى وزەكتى ماسەلەلەر كەڭىنەن تالقىلاندى.
جيىندا ولكەتانۋ ءپانىن ءبىلىم بەرۋ جۇيەسىنە جۇيەلى تۇردە ەنگىزۋ جانە ونى وقىتۋدىڭ قاجەتتىلىگىنە ەرەكشە نازار اۋدارىلدى. بۇگىندە مەكتەپ باعدارلاماسىندا تۋعان ولكە تاريحىنا قاتىستى دەرەكتەر كوبىنە قوسىمشا ماتەريال رەتىندە عانا قاراستىرىلادى. سونىڭ سالدارىنان وقۋشىلار ءوز اۋىلىنىڭ، قالاسىنىڭ، ءوڭىرىنىڭ تاريحي تۇلعالارىن، كونە قونىستارىن، كيەلى جەرلەرىن، جەر-سۋ اتاۋلارىنىڭ ءمانىن تولىق بىلە بەرمەيدى. بۇل تاريحي جادتىڭ السىرەۋىنە، تۋعان جەرگە دەگەن تانىمدىق بايلانىستىڭ ۇزىلۋىنە اكەلۋى مۇمكىن.
ولكەتانۋ جەكە ءپان نەمەسە تۇراقتى فاكۋلتاتيۆتىك كۋرس رەتىندە وقىتىلسا، وقۋشى تۋعان جەر تاريحىن تەك وقۋلىقتاعى جالپى مالىمەت ارقىلى ەمەس، ناقتى دەرەك، جەرگىلىكتى مۇرا، ارحيۆ قۇجاتى، تاريحي ورىن، ەل ىشىندەگى اڭگىمە ارقىلى تانىر ەدى. مۇنداي باعىت بالانىڭ زەرتتەۋشىلىك قابىلەتىن دامىتىپ، تۋعان ولكەگە دەگەن جاۋاپكەرشىلىگىن ارتتىرادى. اسىرەسە تاريح، گەوگرافيا، ادەبيەت، بيولوگيا پاندەرىمەن ساباقتاستىرا وقىتۋ ارقىلى ولكەتانۋدى كەشەندى ءبىلىم بەرۋ قۇرالىنا اينالدىرۋعا بولادى.
سەميناردا وسى باعىتتاعى ولقىلىقتار دا اشىق ايتىلدى. بۇگىندە ءبىلىم بەرۋ ۇيىمدارىندا ولكەتانۋ جۇمىستارى جۇيەسىز جۇرگىزىلەدى، جەرگىلىكتى ماتەريال جەتكىلىكسىز، دايىن ادىستەمەلىك قۇرال از، مۇعالىمدەردىڭ ارحيۆتىك دەرەكتەرمەن جۇمىس ىستەۋ تاجىريبەسى بىردەي ەمەس. سونىمەن بىرگە، وڭىردەگى تاريحي-مادەني نىسانداردى مەكتەپ باعدارلاماسىمەن بايلانىستىرۋ، وقۋشىلاردى مۋزەي، ارحيۆ، ەكسپەديتسيا، دالا زەرتتەۋى سياقتى تاجىريبەلىك جۇمىستارعا تارتۋ ماسەلەسى دە ءالى تولىق جولعا قويىلماعان.
كەزدەسۋدە اياسىندا «جەتىسۋ» ولكەتانۋشىلار ورتالىعى قوعامدىق بىرلەستىگىنىڭ ماقساتى، مىندەتى جانە وسى ۋاقىتقا دەيىن اتقارعان جۇمىستارى تۋرالى ارنايى بەينە تانىستىرىلىم كورسەتىلدى. قاتىسۋشىلارعا بىرلەستىكتىڭ وڭىردەگى تاريحي-مادەني مۇرالاردى زەرتتەۋ، كيەلى ورىنداردى ناسيحاتتاۋ، ارحيۆ دەرەكتەرىن جيناقتاۋ، كىتاپ شىعارۋ جانە رۋحاني قۇندىلىقتاردى دارىپتەۋ باعىتىنداعى ەڭبەكتەرى جان-جاقتى تانىستىرىلدى.
سونىمەن قاتار بىرلەستىك جانىنداعى ولكەتانۋشىلاردىڭ باسپادان جارىق كورىپ، ەلەكتروندى كىتاپ قورىنا ەنگەن ولكە تاريىن تۇگەندەيتىن 37 كىتاپتىڭ ارنايى تانىستىرىلىم ۇيىمداستىرىلدى. تاريحي-تانىمدىق باعىتتاعى كىتاپتاردىڭ جاس ۇرپاق تاربيەسىندەگى رولىنە ەرەكشە توقتالىپ، تۋعان جەر تاريحىن وقىتۋدا مۇنداي ەڭبەكتەردىڭ ماڭىزى زور ەكەنى ايتىلدى. سونداي-اق، «Q-ANDAS» اقپارات اگەنتتىگىنىڭ رەسمي سايتى تانىستىرىلىپ، ونداعى تاريحي-تانىمدىق ماقالالار، ارحيۆتىك دەرەكتەر، رۋحاني-مادەني جوبالار مەن ەلەكتروندى ماتەريالداردىڭ مازمۇنى ءتۇسىندىرىلدى. قاتىسۋشىلارعا سايتتىڭ اقپاراتتىق مۇمكىندىگى، قۇرىلىمى جانە ءبىلىم بەرۋ ۇدەرىسىندە پايدالانۋ جولدارى جونىندە كەڭىنەن مالىمەت بەرىلدى.
سەمينار-ترەنينگ اياسىندا ۇستازدار ولكەتانۋ باعىتىنداعى ءوز تاجىريبەلەرىمەن ءبولىسىپ، مەكتەپتەردە جۇزەگە اسىپ جاتقان جوبالار تۋرالى پىكىر الماستى. اسىرەسە تۋعان جەر تاريحىن وقۋشىلارعا زاماناۋي فورماتتا جەتكىزۋ، ارحيۆ ماتەريالدارىن وقۋ ۇدەرىسىنە ەنگىزۋ جانە تاريحي-تانىمدىق جوبالاردى كوبەيتۋ ماسەلەلەرى كەڭىنەن قوزعالدى.
ۇيىمداستىرۋشىلاردىڭ ايتۋىنشا، مۇنداي باسقوسۋلار جاس ۇرپاقتىڭ تۋعان جەرگە دەگەن سۇيىسپەنشىلىگىن ارتتىرىپ، ۇلتتىق تاريح پەن رۋحاني مۇراعا دەگەن قىزىعۋشىلىعىن كۇشەيتۋگە ىقپال ەتەدى. ويتكەنى ولكەتانۋ ۇلتتىڭ تاريحي جادىن ساقتاپ، وسكەلەڭ بۋىن ساناسىنا ەلدىك قۇندىلىقتاردى سىڭىرەتىن ماڭىزدى رۋحاني نەگىزدەردىڭ ءبىرى.
بىرلەستىك جۇرگىزگەن زەردەلەۋ ناتيجەسىندە ولكەتانۋ ءپانىنىڭ مەكتەپتەردە وقۋ جىلىنىڭ سوڭىنا قاراي ءبىر ساعاتپەن عانا شەكتەلەتىنىن، ءارى بۇل باعىتتى وقىتۋ ءىسى ولكەتانۋ سالاسىن جەتىك مەڭگەرگەن مۇعالىمدەرگە ۇنەمى تاپسىرىلا بەرمەيتىنىنە كوز جەتكىزدى. بۇل جاعداي تۋعان ولكە تاريحىن جۇيەلى وقىتۋعا، وقۋشىلاردىڭ جەرگىلىكتى تاريحي-مادەني مۇراعا دەگەن قىزىعۋشىلىعىن ارتتىرۋعا كەرى اسەرىن تيگىزۋى مۇمكىن. سوندىقتان اتالعان ماسەلە الداعى ۋاقىتتا «جەتىسۋ» ولكەتانۋشىلار ورتالىعى قوعامدىق بىرلەستىگىنىڭ ءجىتى نازارىندا بولادى.
سەمينار-ترەنينگ سوڭىندا قاتىسۋشىلار ءوزارا پىكىر الماسىپ، ولكەتانۋ باعىتىنداعى جاڭا جوبالار مەن بىرلەسكەن باستامالاردى جۇزەگە اسىرۋ ماسەلەلەرىن تالقىلادى. سوڭىندا وبلىستىق سەمينار-ترەنينگكە بەلسەندى قاتىسقان تاريح جانە گەوگرافيا ءپانى مۇعالىمدەرىنە ارنايى سەرتيفيكات تابىستالدى.
«Q-Andas»اقپاراتتىق اگەنتتىگى











