بايەكە بولىس ءوزى تۇستاس، كورىكتى اقىن كەلىنشەك مالايعا بىرنەشە رەت بازىنالىق ءسوز سالادى ەكەن. بىراق مالاي قابىل كورمەپتى. «ءاي سەنى مە»، – دەپ وراي ىزدەپ جۇرگەن ءبىر جىلى مالايدىڭ اۋىلىنا بەس ساۋداگەر كەلىپ ساۋدا جاساپتى. وسىنى ەستىگەن بولىس ۇيىندە اياقكيىم تىگىپ جاتقان ەتىكشى قايرانباي دەگەن ادامدى جىبەرىپ:
قايرەكە تاعى قايتىپ باراسىز با،
جەل ءسوزدىڭ ءسىز جۇرەسىز اراسىنا.
مالايدى بەس كەرۋەندىك قىلعان جاۋىز،
كوكپەكتىڭ كۇلىن سەپسىن جاراسىنا، – دەپ ءبىر اۋىز ولەڭ ايتقىزىپتى.
سوندا مالاي قايرەكەڭدى قايتا جىبەرىپ:
جايلاعان ءبىزدىڭ ەلدى بەس كەرمەندىك،
كوتتىڭ جاۋىر بولارىن ەسكەرمەدىك.
باكەڭنىڭ وكپەلەيتىن قيسىنى بار،
بوپايدان ءبىر جاپىراق ەت بەرمەدىك.
سالەم دە بايەكەگە قاعىنباسىن،
باسىنان بوقاش العان مارجان تاسىن.
مەن تۇسسەم بولىستىقتان و دا ءتۇستى،
(ءوزىنىڭ كەلىنشەك بولعانىن ايتىپ وتىر)
جەمىر قارا بۋراداي شابىنباسىن.
ءوزىڭنىڭ كوز سالمايسىڭ ار جاعىڭا،
اۋىردىڭ جەر سولقىلدار سالماعىنا.
جانىنا مەنىڭ ءسوزىم قاتتى باتسا،
قوعىلداپ قاشىپ كەتسىن قالماعىنا، – دەگەن ولەڭدى قولما-قول ايتقىزىپتى.
(سول جىلى بايەكە بولىستىقتان قالىپ، ورىن بوقاش دەگەن ادام العان ەكەن).
مالايدىڭ جاڭا تۇسكەن جاس كەلىنشەك كۇنى ەكەن. ءبىر جىلى جايلاۋ ۇستىندە سول اۋىلدىڭ جاقىپ دەگەن قايىناعاسى كيىز ءۇيدىڭ الدىندا وتىرىپ، مالايدىڭ سۇلۋلىعىنا قىزىعادى.
بىراق كەلىنى بولعاندىقتان ءسوز ايتا الماي امالسىزدان ارى وتكەن، بەرى وتكەندە مالايدىڭ ارتىنان سارى قۋرايدى جۇلىپ الىپ لاقتىرىپ ۇرادى ەكەن.
سوندا مالاي:
التىمىزدان شىعايىق جەتىمىزگە،
شاعي كويلەك جاراسار ەتىمىزگە.
بي اعانىڭ بىزدەردە كوڭىلى بار ما،
سارى قۋرايمەن ۇرادى كوتىمىزگە، – دەگەن ەكەن.
دەرەككوز: دودا: (ايتىستار مەن تاريحي-ەتنوگرافيالىق جىرلارى) / ا. وماراقىن ؛ [قۇراستىرعان: ءا. ماجاي [ج. ب.] .- تالدىقورعان : [ب. ج.]. https://kazneb.kz/kk/catalogue/view/1657687
“Q-Andas” اقپاراتتىق اگەنتتىگى
جالعاسى بار…











