سولتانگەلدى(1) بالا كۇنىنەن مىرزا وسكەن، سۇڭعىلا ادام ەكەن. ءبىر جىلى ەسەنكەلدى اعاسىنا ەرىپ، اسكەري اتتاردى كۇزەتۋگە شىعادى. سول كۇنى قالىڭ جاڭبىر بولىپ، شەشەسى ەتەك-جەڭىن ءجۇرىنداپ، ورنەكتەپ تىگىپ بەرگەن تون-شالبارى قالىڭ جاڭبىردىڭ اسەرىنەن سوزىلىپ، ۇزارا بەرگەن سوڭ جەڭى مەن بالاعىن كەسىپ تاستاپ وتىرادى. ەرتەسى كۇن ىسىپ، تون-شالبار ابدەن كەپكەن كەزدە جەڭى مەن بالاعى قىسقارىپ، كيۋگە كەلمەي قالىپتى. مۇنى كورگەن اعاسى ەسەنكەلدى: «كون قاتسا قالىبىنا كەلەدى» دەپ ءىنىسىن جۇباتقان ەكەن. كەيىن بۇل ءسوز ەل اراسىنا تاراپ، قاناتتى سوزگە اينالىپ كەتەدى.
1) سولتانگەلدى مىرزا – قۇداينازار باتىردىڭ كەنجەسى، مىرزالىعىمەن جۇرت نازارىنا ىلىنگەن ادام.
***************************
ۇركەر ۇيدەن كورىنسە،
ءۇش اي توقسان جازىڭ بار.
ۇركەر ىڭىردە جامباسقا كەلسە،
جاز شىقپاعاندا نەسى بار. (1)
********************************
جەتى قاراقشىنى اڭعارساڭ،
جەتى تۇندە اداسپايسىڭ.(2)
********************************
ءساۋىر بولماي جاۋىن بولماس،
جاۋىن بولماي قاۋىن بولماس.(3)
*********************************
بۇلت كوپ بولسا، جۇت بولادى،
اۋرۋ كوپ بولسا، قۇرت بولادى.(4)
*********************************
تىشقان كوپ جىلى،
توقشىلىق بولادى.
قويان كوپ جىلى،
جوقشىلىق بولادى.(5)
1،2،3،4،5 بۇلار ەسەنگەلدى باتىردىڭ اۋارايى تۋرالى بولجامدارى دەپ ايتىلادى. قازىر ەل اراسىندا قاناتتى ءسوز بولىپ، تارالىپ ءجۇر.
«تەكەباي (1) داۋعا بەرمەيدى،
بۇلعىناياق (2) جۇتقا بەرمەيدى.
ءمۇسىرباي (3) اۋرۋعا بەرمەيدى،
قاراعاي (4) جاۋعا بەرمەيدى».
1) تەكەباي اعىسۇلى – قىزايدىڭ بەگىمبەت رۋىنان شىققان زەردەلى، شەشەن ادام.
2) بۇلعىناياق – قىزايدىڭ قازىمبەت رۋىنان شىققان ايتۋلى بولجامپاز ادام.
3) ءمۇسىرباي قاتپاۇلى – قىزىايدىڭ بەگىمبەت رۋىنان شىققان اتاقتى ەمشى.
4) قاراعاي باتىر – قىزايدىڭ دەربىس رۋىنان شىققان جاۋجۇرەك باتىر.
دەرەككوز: تاريح تالعارىندا [ءماتىن] : (تاريحي زەرتتەۋلەر، ەسسە، ماقالالار) / ا. وماراقىن- تالدىقورعان : [ب. ج.] ، 2022.– 500 دانا . – ISBN 978-601-7865-39-9 (1-ت.)، ISBN 978-601-7865-36-8 1-توم .– 287 ب.، سۋرەتتى .
https://kazneb.kz/kk/catalogue/view/1657755
“Q-Andas” اقپاراتتىق اگەنتتىگى
جالعاسى بار…











