Oblystyq Kórkemóner galereyasynda Balalar kórkemsuret mektebiniń túlekterine arnalǵan saltanatty kesh ótti. Ónerge qúshtar jas órenderge arnaiy kuálikter tabystalyp, birneshe jyldyq shyǵarmashylyq izdenisteri men eńbekteriniń nátijesi qorytyndylandy.
Mazmúndy sharaǵa ústazdar, ata-analar, mádeniet salasynyń ókilderi men qala túrǵyndary qatysty. Kesh barysynda mektep direktory men oqytushylar túlekterdi qúttyqtap, olardyń óner jolyndaǵy alǵashqy qadamdaryna sáttilik tiledi. Ústazdar shákirtterdiń suret salu sheberligin meńgerip qana qoimai, estetikalyq talǵamy joǵary, shyǵarmashyl túlǵa retinde qalyptasqanyn erekshe atap ótti.
Kesh ayasynda 40 túlektiń úzdik shyǵarmashylyq júmystary qoiylǵan arnaiy kórme úiymdastyryldy. Kórermender jas qylqalam sheberleriniń eńbekterine joǵary baǵa berip, tuyndylardan últtyq naqysh pen zamanaui kózqarastyń úilesimin baiqady. Ásirese tuǵan ólkeniń tabiǵaty, el ómiri men últtyq qúndylyqtardy beineleitin shyǵarmalar kópshiliktiń erekshe yqylasyna bólendi.
SHara barysynda sóz alǵan óner ókilderi jas suretshilerdiń shyǵarmashylyǵyna toqtalyp, ónerdiń qoǵamdaǵy orny men ruhani mańyzy jaiynda taǵylymdy oilaryn ortaǵa saldy.
– Óz suretshilerimizdiń tuyndylarynan taǵylym alyp, naǵyz ónerdi tanuǵa úmtyluymyz kerek. Biz olardy qanshalyqty dáriptesek, tól mádenietimizdiń de mereii sonshalyqty ústem bolady. Kartina salu jai oryndaushylyq emes. Tuyndyǵa jan bitiru úshin shyǵarmashylyq sheshim, boyau men sezim úndesui qajet. Suretshi óz kóńil kúiin kartinaǵa bere alǵanda ǵana shyǵarma shynaiy óner tuyndysyna ainalady. Ár eńbek suretshiniń jan dúniesiniń bir bólshegi. Ol óz dáuiriniń tynysyn bolashaqqa jetkizetin ruhani múra, – dedi kesh barysynda sóz alǵan óner ókilderiniń biri.
SHara sońynda túlekter ata-analary men ústazdaryna alǵystaryn bildirip, bolashaqta óner salasynda biik belesterdi baǵyndyruǵa nietti ekenderin jetkizdi.
Búl kesh jas suretshilerdiń birneshe jyldyq eńbegin saralap, olardyń óner álemine jasaǵan alǵashqy qadamyn aiqyndaǵan taǵylymdy shara boldy. Túlekterdiń tuyndylary arqyly últtyq qúndylyqqa qúrmet, tuǵan jerge súiispenshilik jáne shyǵarmashylyq izdenis aiqyn kórindi. Múndai bastamalar jas talanttardyń qanatyn qataityp, tól mádenietimizdiń órkendeuine jol ashady.
Qajet Andas,
«Q-Andas» aqparat agenttigi.
