راقىمباەۆ نۇرعالىق 1897 جىلى ورتا شارۋا وتباسىندا دۇنيەگە كەلگەن. ول 1920 جىلدارى قاراتال وڭىرىندە كومسومول-جاستار ۇيىمىن قۇرۋعا قاتىسادى. 1930 جىلدارى اۋىل شارۋاشىلىعى ارتەلىن، سوڭىنان كولحوزداردى ۇيىمداستىرۋعا ات سالىسادى. كولحوز باسقارماسى اۋىلدىق كەڭەس توراعاسى قىزمەتىن اتقارادى. ناۋبەت جىلدارى (1937 ج.) العاشقىلاردىڭ ءبىرى بولىپ تۇرمەگە جابىلدى. ىزىنشە 5-6 ايدىڭ ىشىندە اقتالىپ شىعادى. 1944 جىلى قازاقستاننىڭ اۋىلدىق كەڭەس توراعالارىنىڭ ءى-سەزىنە دەلەگات بولىپ قاتىسادى. سول جىلى كەڭەس وداعىنىڭ «قۇرمەت» وردەنىمەن ماراپاتتالادى.
اۋىلدىق كەڭەستىڭ توراعاسى بولىپ تۇرعان كەزىندە 1951 جىلى «حالىق جاۋى» رەتىندە 8 جىلعا باس بوستاندىعىنان ايىرىلادى. ءىنىسى راقىمباەۆ نۇرقاسىم موسكۆاعا ارنايى بارىپ، جوعارعى كەڭەس پرەزيدۋمىنىڭ توراعاسى گوركيننىڭ قابىلداۋىندا بولادى. ءىسى جوعارعى سوتتا قايتا قارالىپ، اعاسى 8 اي دەگەندە تۇرمەدەن بوساتىلىپ، اقتالىپ شىعادى.
كەيىنگى جىلدارى زەينەتكە شىققانعا دەيىن اۋىل شارۋاشىلىق سالاسىندا باسشىلىق قىزمەتتەر اتقارادى. بەرتىندە 1978 جىلى قايتىس بولادى.
ءوز اراسىنان جاۋ ىزدەگەن سول ءبىر قيىن زاماندا ءبىر اۋلەتتىڭ قوس بىردەي بەتكە شىعار ازاماتتارى جازىقسىز جالانىڭ قۇربانىنا اينالعان. الايدا «اققا قۇداي دا جاق» دەگەندەي اقتالىپ شىققان مىسالدارى كوپتەپ ۇشىراسادى. سولاردىڭ ءبىرى راقىمباەۆ اۋلەتىنەن تاراعان نۇرعالىق پەن نۇرقاسىم اقساقالدار بولاتىن.
راقىمباەۆ نۇرقاسىن قازىرگى بىرلىك اۋىلىندا ورتا شارۋا وتباسىندا دۇنيەگە كەلەدى. ول 1920 جىلداردىڭ اياعىندا نكۆد قۇرامى بولىمشەسىندە قىزمەت ەتەدى. ال 1930 جىلدارى ەل شىرقىن بۇزعان باندىلارمەن شايقاستارعا قاتىسادى. اۋداندىق پارتيا كوميتەتىنىڭ شەشىمىمەن1933-1934 جىلدارى جاڭادان قۇرىلعان كوكباستاۋ كولحوزىنىڭ باسقارماسى بولىپ تاعايىندالادى.
ۇلى وتان سوعىسى باستالعاندا نۇرقاسىم راقىمباەۆ قازاقستان كولحوزىنىڭ توراعاسى ەكەن. ول 1941 جىلدىڭ اياعىندا (برونى بولا تۇرسا دا) ءوز ەركىمەن وتان قورعاۋعا اتتانادى. لەنينگراد، ۆولوحوۆ مايداندارىندا شايقاسىپ، پريبالتيكا ەلدەرىن ازات ەتۋگە، كەنيگسبەرگ قالاسىن الۋعا قاتىسادى. سوعىس اياقتالعاننان سوڭ 1946 جىلى اسكەر قاتارىنان بوساپ، ەلگە ورالادى. وتان قورعاۋداعى ەرلىگى ءۇشىن جانە بىرنەشە مەدالدارمەن ماراپاتتالادى. مۇنان سوڭ قاراتال اۋدانى شارۋاشىلىقتارىندا باسشى قىزمەتتەر اتقارادى. الايدا 1951 جىلى اۋىل شارۋاشىلىعىنا كەلتىرگەن زيانى ءۇشىن دەگەن جەلەۋمەن (19 قوزى تىشقاقتان ولگەن) «حالىق جاۋى» رەتىندە كولحوز باسقارماسى قىزمەتىندە ءجۇرىپ 10 جىلعا سوتتالادى. ارادا ەكى جىل وتكەن سوڭ، 1953 جىلى ءستاليننىڭ ولىمىنەن كەيىنگى جىلىمىقتان سوڭ راقىمشىلىق جاسالىپ، تۇرمەدەن بوساتىلادى. ءومىرىنىڭ سوڭىنا دەيىن (1957 ج.) بىرلىك كولحوزىندا جاۋاپتى قىزمەتتەر اتقارادى.
ونىڭ كىندىگىنەن تاراعان بىزدەر – ماقسات (مارقۇم) پەن ءوز باسىم، ءىنىم مۇرات ارداقتى اكەمىزدى اركەز ماقتان ءارى قاستەر تۇتامىز.
ماكسيم راقىمباەۆ
ۇرپاعى. تالدىقورعان قالاسى.
جاريالاندى. قارامان ق. قاراتال اقتاڭداعى: تاريحي-تانىمدىق كىتاپ-الماتى: «توعاناي ت». 2015. -240 ب. -170–171 ب.











