بالا كۇنىمىز جۇپىنى عانا اۋىلدا ءوتتى. ءبىر-بىرىنە جاپسارلاي سالىنعان تام ۇيلەردىڭ اراسىن بەس-التى توقتى-تورپاق، ءبىر-ەكى ساۋىن سيىر سياتىنداي اينالاسى شارباقپەن قورشالىپ، جۇگەرىنىڭ ساباعىمەن قىمتالعان، توبەسىنە بورەنە توسەپ، ءشوپ جينايتىن مال قورا ءبولىپ تۇراتىن. كوسىلىپ جاتقان كەڭ دالاداعى شاعىن اۋىلدىڭ نەگە سولاي ۇيلەرىن ءبىر-بىرىنە مىڭگەستىرىپ سالاتىنىنا قازىر تاڭعالامىن.
بىزبەن جامالقان دەگەن اپامىز كورشى تۇردى. ول كىسىنىڭ كوپ ەتىكتىنى كوزگە ىلمەي، كون ەتىكتىدەن جولى بولماي، وتىرىپ قالعان بالقاديشا دەگەن قىزى بولدى. ءوزى دە قارا تورىنىڭ ادەمىسى ەدى.
قىزىق كەشكە مال جاعاعاندا باستالاتىن. قولىمىزداعى مالداردى سۋعارىپ، قوراعا كىرگىزگەن سوڭ تۇندە جەيتىن ءشوپ سالاتىنبىز. ول كەزدە ءشوپتى قورانىڭ ۇستىنە جينايمىز. مەن جەردە تۇراتىنمىن دا ءىنىم قورانىڭ توبەسىنەن ءشوپ الىپ بەرۋگە كوتەرىلەتىن. قاي سايتان تۇرتەتىنىن كىم ءبىلسىن. قورانىڭ توبەسىنە شىعا بەرە:
دەگەندە بالقاديشا، بالقاديشا،
كۇيەۋىڭ سەكسەن بەستە شال قاديشا، – دەپ اندەتە جونەلەدى. ونىڭ داۋىسى شىعا بەرگەندە شەشەي:
– قۋ، قىرشىن، قازاقتىڭ ءانى قۇرىپ قالدى ما باسقاسىن ايت. كورشىلەردەن ۇيات بولادى، – دەپ ايعاي سالادى.
ونى ءىنىم قۇلاعىنا ىلمەيدى. بالقاديشانىڭ باسقا شۋماقتارىن ايتسادا بولادى عوي. جوعارىداعى ەكى جولدى قايتا، قايتا ايتادى. شىدامى تاۋسىلعان شەشەي بوساعاداعى تال شىبىقتى الا سالىپ، ءىنىمدى قورانىڭ توبەسىنەن قۋىپ تۇسەدى. سولقىلداعان شىبىق وڭدىرسىن با، بالتىردان ءبىر-ەكى تيگەن سوڭ ءىنىم قورانىڭ قاراڭعى قۋىسىنا بارىپ تىعىلىپ، ەڭكىلدەپ جىلاپ وتىرادى. بىرەسە توبەگە شىعىپ، بىرەسە جەرگە ءتۇسىپ، مالدىڭ كەشكى ازىعىن سالىپ بىتكەنشە ونىڭدا اۋرۋى تاراپ، اشۋى قايتادى. بۇل ءىس ەرتەسى كەشكە تاعى باستالادى. ءىنىم جازالانىپ، وسى ءان قايدان شىققان دەپ مەن قاپالانامىن.
– باسقاسىن ايتساڭ ايت. كۇيەۋىڭ سەكسەن بەستە شال قاديشا دەگەندى ايتپاشى، – دەپ ىنىمە مەن دە زەكيمىن.
– جارايدى، ايتپايمىن، باسقا جەرىن ايتامىن، – دەپ ۋادە بەرگەنىمەن ەرتەسى قورانىڭ توبەسىنە شىعا بەرگەندە مەنىڭ ەسكەرتۋىمدى دە، شەشەيدىڭ شىبىعىنىڭ اشى ءدامىن دە ۇمىتىپ كەتەدى.
بۇل سول جىلى قىس بويى جالعاستى. جاز شىعا بالقاديشا ۇيلەندى. سەكسەن بەستەگى شالعا ەمەس، ءوزىنىڭ تەڭىن تاپتى. ءبىر قىزىعى، ءىنىم دە سودان باستاپ بالقاديشانى ايتپايتىن بولدى.
… بالقاديشا ءانىن تىڭداپ وتىرىپ، سول ءتاتتى كۇندەر ەسكە ورالدى. شىركىن-اي، قىزىعى مەن قىرسىعى بىتپەيتىن بالا كەزدەر-اي!
قاجەت انداس
«Q-andas» اقپاراتتىق اگەنتتىگى.
