تۋعان جەرگە تۋ تىككەن
مۇقانشى اۋىلدىق وكرۋگىنىڭ اكىمى مۇحيت مامىر ءۇشىن تۋعان جەرگە قىزمەت ەتۋ – ازاماتتىق پارىز بەن ۇلكەن جاۋاپكەرشىلىكتىڭ كورىنىسى. جەتىجال ەلدى مەكەنىندە تۋىپ-وسكەن ول بالا كۇنىنەن وسى ءوڭىردىڭ تىنىس-تىرشىلىگىن تانىپ، ەلدىڭ قۋانىشى مەن تۇرمىسىن بويىنا ءسىڭىرىپ ءوستى. وسىندا ءبىلىم الىپ، ازامات رەتىندە قالىپتاستى.
جوعارى وقۋ ورنىن اياقتاعاننان كەيىن ەڭبەك جولىن الماتى قالالىق سپورت باسقارماسىندا باستاپ، بىرنەشە جىل سول سالادا قىزمەت اتقاردى. قالاداعى قىزمەت ونى ۇيىمداستىرۋشىلىققا، جاۋاپكەرشىلىككە، جۇيەلى جۇمىس ىستەۋگە باۋلىدى. الايدا تۋعان جەرگە دەگەن ساعىنىش پەن ەلگە جاقىن بولۋ نيەتى اۋىلعا قايتا ورالۋىنا سەبەپ بولدى. كەيىن اۋىلعا كەلىپ شارۋاشىلىقپەن اينالىسىپ، جەرگىلىكتى جۇرتتىڭ كۇندەلىكتى تىرشىلىگىمەن ەتەنە ارالاستى.
قاي كەزەڭدە دە اۋىلدىڭ مۇڭ-مۇقتاجىنان سىرت قالماي، ەل ىشىندەگى وزەكتى ماسەلەلەرگە سەرگەك قاراي بىلگەن ازامات رەتىندە جۇرتشىلىق سەنىمىنە يە بولدى. وسى سەنىمنىڭ ناتيجەسىندە جەتىجال اۋىلىنىڭ اتىنان وبلىستىق ءماسليحاتتىڭ دەپۋتاتى بولىپ سايلانىپ، ءوڭىردىڭ كوكەيكەستى تۇيتكىلدەرىن كوتەرۋگە اتسالىستى. بۇل قىزمەت حالىقپەن ەتەنە جۇمىس ىستەۋدىڭ، ەل ءۇمىتىن ارقالاۋدىڭ ماڭىزدى مەكتەبىنە اينالدى.
2023 جىلى اۋىل اكىمىنىڭ سايلاۋىنا قاتىسىپ، ەل قولداۋىمەن اكىم بولىپ سايلانۋى دا سول سەنىمنىڭ زاڭدى جالعاسى ەدى. تۋعان توپىراقتىڭ پەرزەنتى رەتىندە وزىنە ارتىلعان سەنىمدى تەرەڭ سەزىنەدى. سوندىقتان اۋىلدىڭ ءاربىر تابىسى مەن العا باسقان ءاربىر قادامىن ورتاق جەتىستىك دەپ قابىلدادى.
اتقارىلعان ءىس اۋقىمدى
مۇقانشى اۋىلدىق وكرۋگىندە سوڭعى جىلدارى ناقتى ىستەر كورىنىس تاۋىپ، ەلدى مەكەندەردىڭ ەڭسەسى كوتەرىلە ءتۇستى. وكرۋگتە اۋدان جانە وبلىس باسشىلارىنىڭ قولداۋىنىڭ ارقاسىندا حالىقتىڭ تۇرمىس ساپاسىن جاقسارتۋعا باعىتتالعان جۇيەلى جۇمىستار قولعا الىندى.
ايتالىق، جەتىجال اۋىلى مەن مۇقانشى ەلدى مەكەنىندە كوشەلەر جارىقتاندىرىلىپ، بۇل جۇمىس كەيىن كوكسۋ بەكەتى مەن قازاقستاننىڭ 50 جىلدىعى اۋىلىندا جالعاسىن تاپتى. جەتىجال مەن نادرىزبەك اۋىلدارىنا گاز تارتىلىپ، تۇرعىنداردىڭ تۇرمىس ساپاسى جاقساردى. كوكسۋ بەكەتىندە، جەتىجال جانە نادرىزبەك اۋىلدارىندا كوشەلەرگە ورتاشا جوندەۋ جۇرگىزىلىپ، قازاقستاننىڭ 50 جىلدىعى اۋىلى مەن قاراتال اۋدانىنا قاراستى كالپە اۋىلى ارالىعىنداعى جول دا جاڭارتىلدى.
الەۋمەتتىك نىساندار قۇرىلىسى دا نازاردان تىس قالمادى. جەتىجال اۋىلىندا سپورت الاڭى مەن فەلدشەرلىك-اكۋشەرلىك پۋنكت سالىندى. قازاقستاننىڭ 50 جىلدىعى اۋىلىندا بالاباقشا بوي كوتەردى. كوكسۋ بەكەتىندە مال دارىگەرلىك پۋنكت اشىلىپ، ۇلى وتان سوعىسى ارداگەرلەرىنە ارنالعان ەسكەرتكىش جاڭعىرتىلدى. بايشاپانوۆ جانە قوجابەرگەنوۆ كوشەلەرىندە اۋىزسۋ جۇيەسىنە جاڭارتۋ جۇمىستارى جۇرگىزىلدى. مۇقانشى ەلدى مەكەنىندە الەۋمەتتىك وسال توپتاعى ازاماتتارعا ارنالعان تۇرعىن ۇيلەر سالىنىپ جاتىر. وكرۋگ اكىمدىگى عيماراتىنا جوندەۋ جۇرگىزىلىپ، الدى اباتتاندىرىلدى. ءبىر سوزبەن ايتقاندا، مۇقانشى اۋىلدىق وكرۋگىندەگى يگىلىكتى ىستەر اۋىلدىڭ ەڭسەسىن كوتەرىپ، تۇرعىنداردىڭ ەرتەڭگە دەگەن سەنىمىن نىعايتا ءتۇستى.
ارينە، مۇنداي وزگەرىستەردىڭ ءبارى قيىندىقسىز كەلگەن جوق. سول سالماقتىڭ ءبارى اۋىل اكىمىنىڭ يىعىنا ءتۇستى. سونىڭ ءبىرى – اۋىلعا گاز تارتۋ ماسەلەسى. بۇل باعىتتا ازدى-كوپتى تالاس-تارتىستىڭ بولعانى دا راس. سەبەبى، گاز جەلىسىن تارتۋداعى بەكىتىلگەن تەحنيكالىق ولشەمدەر، اسىرەسە ونىڭ بيىكتىگى اۋىلدىق جەردىڭ كۇندەلىكتى تىرشىلىگىنە، حالىقتىڭ تۇرمىس ىڭعايىنا ءاردايىم ساي كەلە بەرمەيتىن تۇستار بولعان. وسىنداي ساتتە ەل ءسوزىن سويلەپ، تۇرعىندار تالابىن جەتكىزۋ قاجەت ەدى.
ءدال وسى تۇستا اۋىل اقساقالى ارعىنعازى شايمەردەنوۆ پەن مۇحيت مامىر جۇرتتىڭ مۇڭ-مۇقتاجىن ارقالاپ، ماسەلەنىڭ وڭ شەشىلۋىنە كۇش سالدى. ولار جوعارى جاققا قايتا-قايتا بارىپ، اۋىل تۇرعىندارىنىڭ ءۋاجىن جەتكىزىپ، ناقتى تالاپتىڭ ەسكەرىلۋىنە ىقپال ەتتى. سونىڭ ناتيجەسىندە بۇل ماسەلە دە حالىقتىڭ سۇرانىسىنا ساي شەشىمىن تاپتى.
– گاز تارتۋ وڭاي بولعان جوق. ەل ىشىندە ءارتۇرلى پىكىر دە بولدى. بىراق اۋىلدىڭ جاعدايىن، تىرشىلىكتىڭ ىڭعايىن ەسكەرمەسە بولمايتىن ەدى. سوندا مۇحيت ەلمەن بىرگە بولدى. تۇرعىنداردىڭ تالابىن ارقالاپ، تالاي جەرگە بارىپ ءجۇردى. اقىرى اۋىلعا ءتيىمدى جاعى قاراستىرىلدى. مۇنىڭ ءوزى ەلگە شىن جاناشىر باسشىنىڭ ءىسى دەپ ويلايمىن، – دەپ ەسكە الادى ارعىنعازى اقساقال.
ارعىنعازى اقساقال ەلدى مەكەنگە كوشە اتاۋلارىن بەرۋدە وسى اۋىلدىڭ توڭىن ءجىبىتىپ، توپىراعىن تۇزەگەن اعا بۋىنداردىڭ ەڭبەگى ەسكەرىلسە دەگەن تىلەگى بارىن تىلگە تيەك ەتتى.
الەۋمەتتىڭ الەۋەتى
مۇقانشى اۋىلدىق وكرۋگىنىڭ ەكونوميكالىق-الەۋمەتتىك جاعدايى جىل وتكەن سايىن ارتىپ كەلەدى. كەڭ بايتاق جەر قورى، ەگىن جانە مال شارۋاشىلىعىنىڭ قاتار دامۋى، سۋ ۇنەمدەۋ تەحنولوگيالارىنىڭ وندىرىسكە ەنگىزىلۋى بۇل ءوڭىردىڭ بولاشاعىنا سەنىممەن قاراۋعا تولىق نەگىز قالايدى.
ەگىن شارۋاشىلىعى وكرۋگ ەكونوميكاسىنىڭ ماڭىزدى تىرەكتەرىنىڭ بىرىنە اينالعان. سوڭعى جىلدارى زاماناۋي سۋ ۇنەمدەۋ تەحنولوگيالارىن ەنگىزۋ باعىتىندا ناقتى جۇمىستار قولعا الىنىپ، جەردى ءتيىمدى يگەرۋ ءىسى جاندانا ءتۇستى. اتاپ ايتقاندا، «سمارت اگرو» جاۋاپكەرشىلىگى شەكتەۋلى سەرىكتەستىگى 667 گەكتار القاپتا تامشىلاتىپ سۋارۋ ءتاسىلىن قولدانىپ كەلەدى. ال «BTS Group» جاۋاپكەرشىلىگى شەكتەۋلى سەرىكتەستىگى جاڭبىرلاتىپ سۋارۋ جۇيەسىن ەنگىزىپ، بۇل باعىتتاعى يگى باستامالارعا سەرپىن بەردى.
اتالعان جوبالاردىڭ تيىمدىلىگى قازىردىڭ وزىندە انىق بايقالا باستادى. سۋ ۇنەمدەۋدىڭ وزىق ۇلگىسىنە نەگىزدەلگەن بۇل تاسىلدەر ءونىم كولەمىن ارتتىرۋعا، ەڭبەك ونىمدىلىگىن كۇشەيتۋگە جانە اۋىل شارۋاشىلىعىن جاڭا دەڭگەيگە كوتەرۋگە مۇمكىندىك بەرەدى. ەڭ باستىسى، مۇنداي زاماناۋي جوبالار كوكسۋ اۋدانى بويىنشا العاش رەت مۇقانشى اۋىلدىق وكرۋگىندە جۇزەگە اسىپ وتىر. بۇل، ءبىر جاعىنان، وبلىس پەن اۋدان باسشىلىعىنىڭ اۋىل تىرشىلىگىنە وڭ كوزقاراسىن اڭعارتسا، ەكىنشى جاعىنان، اۋىل اكىمىنىڭ ىسكەرلىگى مەن ەلگە قىزمەت ەتۋدەگى ناقتى ىزدەنىسىن دە كورسەتەدى.
– اۋىلدىڭ بولاشاعى – ەڭبەك پەن ءتيىمدى ۇيىمداستىرۋدا. ءبىز ءۇشىن ەڭ ماڭىزدىسى – ەلدىڭ يگىلىگىنە قىزمەت ەتۋ، تۇرعىنداردىڭ تۇرمىسىن جاقسارتۋ جانە مۇقانشى اۋىلدىق وكرۋگىنىڭ الەۋەتىن ودان ءارى ارتتىرۋ، – دەيدى اۋىل اكىمى.
وسى جايىندا اۋىل اقساقالى ارعىنعازى جۇماحانۇلى تاعىلىمدى وي قوزعادى. ونىڭ ايتۋىنشا، بۇل اۋىلدىڭ تامىرىندا ەڭبەك، تاربيە، بىلىمگە قۇرمەت سەكىلدى اسىل قاسيەتتەر ەجەلدەن بار.
قاريانىڭ جادىندا ەرەكشە ساقتالعان وقيعانىڭ ءبىرى – 1989 جىلى وسى اۋىلدا رەسپۋبليكا بويىنشا العاشقىلاردىڭ ءبىرى بولىپ ناۋرىز مەيرامىنىڭ اتالىپ ءوتۋى. سودان بەرى بۇل تاعىلىمدى مەرەكە ۇزىلگەن ەمەس. جىل سايىن اۋىل بولىپ جۇمىلىپ، ناۋرىز تويىن جوعارى دەڭگەيدە وتكىزۋدى داستۇرگە اينالدىرعان. اۋىلداعى سەگىز كوشەنىڭ تۇرعىندارى كەزەك-كەزەگىمەن مادەنيەت ۇيىندە ناۋرىز كوجە بەرىپ، ەلدىڭ بەرەكەسى مەن بىرلىگىن بەكەمدەي تۇسەدى.
تاۋەلسىزدىكتىڭ العاشقى جىلدارىندا شەتەلدەن ورالعان قانداستاردىڭ الدىمەن وسى اۋىلعا كەلىپ قونىستانۋى دا تەگىن ەمەس. ارعىنعازى شايمەردەنوۆتىڭ پايىمىنشا، بۇعان اۋىلدىڭ ۇلتتىق قۇندىلىقتارعا جاقىندىعى، سالت-داستۇرگە بەرىكتىگى سەبەپ بولعان. سونىڭ ناتيجەسىندە ەل قاتارى تولىسىپ، جوعىمىز تۇگەندەلىپ، اعايىننىڭ اراسى جاقىنداي تۇسكەن. كوپشىلىكتىڭ قولداۋىمەن مەشىت سالىنۋى – سونىڭ ايقىن كورىنىسى.
ۋاقىت وتە كەلە اۋىلدا ىشىمدىكسىز ورتا قالىپتاستىرۋ يدەياسى كوتەرىلىپ، بۇل باستاما دا ەل قولداۋىنا يە بولدى. قازىر اۋىل دۇكەندەرىندە اراق ساتىلمايدى. ونىڭ ورنىنا ەڭبەككە بەت بۇرعان، تۇيە ءوسىرىپ، شۇبات ءوندىرىپ وتىرعان وتباسىلاردىڭ قاتارى ارتقان. بۇل اۋىل ءومىرىنىڭ جاڭا ارناعا تۇسكەنىن اڭعارتادى.
وسى يگى وزگەرىستەردىڭ باسى-قاسىندا مۇحيت مامىردىڭ بولعانىن ارعىنعازى جۇماحانۇلى ايرىقشا اتاپ ءوتتى. ول سول تۇستا اۋداندىق ءماسليحاتتىڭ دەپۋتاتى ەدى. كەيىن اۋىل اكىمى سايلاۋىنا تۇسكەن ساتتە اقساقال سەنىمدى وكىل رەتىندە قولداۋ بىلدىرگەن. سەبەبى، ەل الدىندا ايتقان باعدارلاماسى ناقتى، ماقساتى ايقىن بولعان. اۋىل اكىمى بولعان سوڭ سول يگىلىكتى ىستەردى ارى قاراي جالعاستىردى.
اتا كاسىپ اۋىلدىڭ تىرەگىاتا كاسىپ اۋىلدىڭ تىرەگى
وكرۋگ اۋماعىنداعى جالپى جەر كولەمى 76 665،47 گەكتاردى قۇرايدى. ونىڭ 73 504،47 گەكتارى جايىلىم، 3 161 گەكتارى ەگىستىك جەر. جايىلىمنىڭ ءبىر بولىگى اۋىل تۇرعىندارىنىڭ يگىلىگىنە بەرىلگەن. بۇل، اسىرەسە، ءتورت تۇلىك وسىرۋگە قولايلى جاعداي جاساپ، اۋىل شارۋاشىلىعىن دامىتۋعا كەڭ مۇمكىندىك بەرۋدە. بۇگىندە وكرۋگ بويىنشا 141 شارۋا قوجالىعى تىركەلگەن. سونىڭ 81-ءى ەگىن ەگۋ مەن ونى باپتاۋعا دەن قويسا، 60 شارۋا قوجالىعى مال شارۋاشىلىعىمەن اينالىسادى.
مال شارۋاشىلىعى بويىنشا مۇقانشى اۋىلدىق وكرۋگىنىڭ الەۋەتى جوعارى. اۋىل تۇرعىندارىنىڭ اتاكاسىپتى بەرىك ۇستانىپ، ءتورت تۇلىكتى تابىس پەن بەرەكەنىڭ كوزىنە اينالدىرىپ وتىرعانىنا وسى وڭىردە تۇيە ءوسىرىپ وتىرعان تۇيەشىباي سولتانيانىڭ شاڭىراعىنا بارعاندا انىق كوز جەتكىزدىك.
تۇيەشىباي سولتانيا قىتاي ەلىنەن تاريحي وتانىنا ورالعان قانداس. ارعى بەتتە جۇرگەندە دە تۇيە ءوسىرىپ، شۇبات ءوندىرىپ، وسى كاسىپتىڭ قىر-سىرىن جەتىك مەڭگەرگەن جان. الايدا، بۇل ءىستى باستاردا قيىندىق از بولماعان.
– العاشقى كەزدە اۋىل تۇرعىندارى بالالاردىڭ قاۋىپسىزدىگىن ويلاپ، تۇيە وسىرۋگە الاڭداۋشىلىق ءبىلدىردى. دەگەنمەن اۋىل اكىمدىگىنىڭ ارالاسۋىمەن حالىققا ءتۇسىندىرۋ جۇمىستارى جۇرگىزىلىپ، ءىستىڭ بايىبىنا بارعان جۇرت بىرتىندەپ بۇل باستامانىڭ تيىمدىلىگىنە كوز جەتكىزدى. سونىڭ ناتيجەسىندە تۇيە شارۋاشىلىعى جولعا قويىلىپ، بۇگىندە ول اۋىل تۇرعىندارىنا تابىس اكەلەتىن كاسىپتىڭ بىرىنە اينالدى، – دەيدى ول.
قازىر اۋىلدا تۇيە سۇتىنەن شۇبات دايىندالىپ، ودان تالاي وتباسى ءناسىپ تاۋىپ وتىر. بۇل تەك ءبىر كاسىپتىڭ دامۋى عانا ەمەس، اۋىل ومىرىنە تىڭ سەرپىن اكەلگەن يگى وزگەرىستىڭ كورىنىسى. ەڭ باستىسى، وسىنىڭ ناتيجەسىندە مۇقانشى اۋىلى ىشىمدىكسىز اۋىلعا اينالىپ، ەڭبەكپەن ەڭسە تىكتەۋدىڭ، كاسىپپەن تىرشىلىكتى تۇزەۋدىڭ ناقتى ۇلگىسىن كورسەتتى. مۇنى دا اۋىل اكىمىنىڭ باستاماشىلدىعىنان بولە قاراۋعا بولمايدى.
سپورت پەن رۋح ساباقتاستىعى
ەڭبەك پەن ءتارتىپ ورنىققان ورتادا ەل نامىسىن ەرلەر دە كوبەيتە تۇسەتىنى بەلگىلى. سونىڭ ءبىر ايعاعى رەتىندە مۇقانشى توپىراعىنان شىققان ماۋلەن مامىروۆتى جانە ونىڭ ءىزىن باسىپ كەلە جاتقان جاس سپورتشىلاردى ايتۋعا بولادى. بۇل اۋىلدا تەك شارۋاشىلىق قانا دامىپ وتىرعان جوق، مۇندا ەلدىڭ مەرەيىن ۇستەم ەتەتىن، نامىسىن قورعايتىن جاس بۋىن دا ءوسىپ كەلەدى. وعان اۋىل ازاماتتارىنىڭ «ۇلى دالا جورىعى» جوباسىنداعى جەتىستىگى دالەل بولادى. ايتالىق، 2019 جىلى شىعىس قازاقستان باعىتى بويىنشا وتكەن 140 شاقىرىمدىق حالىقارالىق ۇلى الامان بايگەسىندە مۇقانشىنىڭ قىزجيرەنى باس بايگەنى جەڭىپ الدى. بۇل جارىس گيننەس رەكوردتار كىتابىنا ەنگەن. مۇقانشىلىقتار 2022 جىلى استانا – تۇركىستان باعىتى بويىنشا وتكەن 1200 شاقىرىمدىق، 2023 جىلى وسى باعىتتاعى 1300 شاقىرىمدىق الامانداردا باس بايگە الدى. ال 2024 جىلى استانا – پاۆلودار باعىتى بويىنشا ۇيىمداستىرىلعان 500 شاقىرىمدىق ۇلى الامان بايگەسىندە تاعى دا توپ جارىپ، باس بايگەنى قانجىعاعا بايلادى.
بۇل جەتىستىكتەردى تەك سپورتتاعى جەڭىس دەپ قانا قاراۋعا بولمايدى. ونىڭ استارىندا اۋىلدىڭ تاريحي تامىرى، مادەني بولمىسى مەن رۋحاني قۋاتى جاتىر. وسىنداي جەتىستىكتەردەن مۇقانشى اۋىلىندا اتبەگىلىك ءداستۇر مەن ۇلتتىق رۋحتىڭ قاتار ورىلگەنىن اڭعارۋ قيىن ەمەس. قىسقاسى، جاستايىنان سپورتپەن اينالىسىپ، سول ماماندىقتا وقىپ، سول سالادا ءبىراز جىل ەڭبەك ەتكەن اۋىل اكىمىنىڭ بۇيرەگى بۇرىپ تۇراتىندىعى انىق.
مادەني ءومىردىڭ مايەگى
مۇحيت مامىر اۋىل اكىمى بولعاننان كەيىن تەك مەملەكەتتىك قۇزىرەت شەڭبەرىندە قالىپ قويعان جوق. ەڭ الدىمەن تۇرعىنداردىڭ ناقتى قاجەتتىلىگىنە دەن قويىپ، اۋىلعا نە كەرەك، ەلگە نە قاجەت ەكەنىن ەسكەرىپ جۇمىس ىستەدى. بۇل اۋىلدىڭ بىرلىگىن كۇشەيتىپ، بەرەكەسىن ارتتىردى.
– اۋىلدا مادەني شارالار دا كەڭ كولەمدە وتەدى. مادەنيەت ۇيىندە 120 ورىن بولسا، ءاربىر شارا سايىن كورەرمەنگە لىق تولادى. بۇل حالىقتىڭ رۋحاني ومىرگە دەگەن ىنتاسىنىڭ ايقىن كورىنىسى. بيىل اۋدان بويىنشا مۇقانشى اۋىلدىق مادەنيەت ءۇيى «ۇزدىك مادەنيەت مەكەمەسى» اتاندى. 18 ناۋرىز – ۇلتتىق كيىم كۇنىنە تاعىلىمى مول، مازمۇندى شارا ۇيىمداستىرىلدى. ال ناۋرىز مەرەكەسى بۇل اۋىلدا 1989 جىلدان بەرى ءبىر جىل دا ۇزىلگەن ەمەس. بيىلدىڭ وزىندە ەكى اۋىلدا ەكى كۇن بويى ناۋرىز تويى تويلانىپ، مادەني جانە سپورتتىق شارالار جوعارى دەڭگەيدە ءوتتى. مۇنىڭ ءبارى مۇقانشىداعى مادەني ءومىردىڭ قايناعان ورتاسىن، ەلدىڭ سالت-داستۇرگە دەگەن قۇرمەتىن اڭعارتادى، – دەيدى اۋىلدىق مادەنيەت ءۇيىنىڭ ديرەكتورى فاتيح اقىن.
ءتۇيىن
اۋىل اكىمىنىڭ موينىنداعى جۇك ەل اماناتىنا ادال بولۋدىڭ ۇلكەن جاۋاپكەرشىلىگى. مۇحيت مامىر وسى سەنىم جۇگىن تەرەڭ سەزىنىپ، اۋىلدىڭ ءار ماسەلەسىنە بەيجاي قاراماي، حالىقتىڭ مۇڭ-مۇقتاجىن جۇرەگىمەن قابىلداپ كەلەدى. كۇندەلىكتى تىرشىلىكتەگى تۇيتكىلدەن باستاپ، ەل ەرتەڭىنە قاتىستى ىرگەلى ىستەرگە دەيىن ۇقىپتىلىقپەن قاراپ، جۇرت سەنىمىن اقتاۋعا كۇش سالىپ جۇرگەن ازاماتتىڭ ەڭبەگى اۋىل تىنىسىنان انىق اڭعارىلادى. ونىڭ ىسكەرلىگى مەن جاناشىرلىعى جاۋاپكەرشىلىك پەن سەنىمنىڭ ءوزارا ساباقتاس ۇعىم ەكەنىن كورسەتەدى.
قاجەت انداس
سۋرەتتەردى تۇسىرگەن: جۇماباي مۇسابەكوۆ
مۇقانشى اۋىلى،
كوكسۋ اۋدانى
دەكرەككوز: «Jetisy» گازەتى، №39، سەنبى، 11 ءساۋىر 2026.
