قانىشايىم:
سالدىقپەنەن سالمايمىن بالاعىمدى،
پەرەنسوزبەن ورايمىن پياعىمدى.
ولەڭىمدى ايتايىن سىزگە ارناپ،
ەرمەك قىپ ءجۇر الدە كىم قاراعىمدى.
بەرەر ەدىم سەن ءۇشىن تاماشا ەتىپ،
قوناق بوپ ونىڭ ءبارى قالدى كەتىپ.
قويادى اركىم تەكە ءوز ىلاعىن،
جارىمدى جوقتاپ ءجۇرمىن ولەڭدەتىپ.
ناۋرىزباي:
جاۋىعىپ تەرىس كوشكەن ەل بولاما،
شاباندار تۇلپارمەنەن تەڭ بولاما.
بىرەۋمەن كوڭىل سۇيگەن كەتە بەرسە،
ونداي جار مال بەرگەننەن كەم بولاما.
قانىشايىم:
الاقانمەن بۋىلعان تەڭدەي بولعىر،
قوندىرعان ولاق قاتىن جەڭدەي بولعىر.
ءىشىمدى كۇيىپ تۇرعان كۇيدىرمەشى،
ايىرىلعان قوساعىنان مەندەي بولعىر.
ناۋرىزباي:
جايلاۋى ءبىزدىڭ ەلدىڭ قۇلان وتپەس،
بورىگە يت قارعىسى ءسىرا جەتپەس.
جىگىتكە قىز قارعىسى مايداي جاعار،
دەگەنمەن اناۋ-مىناۋ ەشتەڭە ەمەس.
قانىشايىم:
سەن بولساڭ اقىن جىگىت جاقىن كەلشى،
دەرتىمدى ىشىڭدەگى ءوزىڭ ءبىلشى.
جاقىن كەپ زاتتى بولساڭ تىلەگىڭدى ايت،
قاڭعىرعان بىرەۋ بولساڭ ارى ءجۇرشى.
ناۋرىزباي:
ءجۇرۋشى ەم سەندەي قىزعا كوز سالماستان،
كەتۋشى ەم كەيبىرەۋىن ەسىمە الماي.
ارمانىم مەنىڭ قايتىپ تارقايدى ەكەن،
ءوزىڭدى ارت ارتىنا ءبىر سالماستان.
قانىشايىم:
پىشاققا قىزىل اعاش قىن بولادى،
جاتقان جەر كوكشە قويان ءجۇن بولادى.
سۇراماق اتى-ءجوندى پارىز ەكەن،
جىگىتىم اتى-ءجونىڭ كىم بولادى.
ناۋرىزباي:
سۇراساڭ ارعى اتامدى حان ابىلاي،
باق-داۋلەت ءبىر باسىنا بەرگەن قۇداي.
ءجونىمدى سەن سۇراساڭ مەن ايتايىن،
ءىنىسى كەنە حاننىڭ ناۋرىزباي.
قانىشايىم:
ناۋەكە جەكە اياڭعا سالىپ ءجۇرسىڭ،
بار بولسا ەلدە سۇلۋ الىپ ءجۇرسىڭ.
باتىرعا تۇندە ءجۇرۋ ونەرمە ەكەن،
كەش باتقاندا بۇل جاقتا نەعىپ ءجۇرسىڭ.
ناۋرىزباي:
كەلىپ-ەم ءبىر تالاپپەن بارايىن دەپ،
جىلقىسىن تىلەۋقاباق الايىن دەپ.
وزىڭدەي ءجونى ءتۇزۋ قىزى بولسا،
جار ەتىپ اۋىلىمدا باعايىن دەپ.
قانىشايىم:
مەن ءوزىم ون جەتىگە بيىل كەلدىم،
ونبەستە ولەڭ ايتىپ دۇرىلدەدىم.
مالى مەن قىزىن تەگىن بەرەتۇعىن،
جونىنى بار دەپپە ەدىڭ ءبىزدىڭ ەلدىڭ.
ناۋرىزباي:
مەن ءوزىم ون التىعا بيىل كەلدىم،
جاسىمنان اتقا ءمىنىپ دۇرىلدەدىم.
بايقاسام ءسوزىڭ ءتاۋىر قىز ەكەنسىڭ،
مەن ناۋرىزباي، ەندەشە سەن كىم ەدىڭ.
قانىشايىم:
سۇراساڭ مەنىڭ اتىم قانىشايىم،
ماعلۇم كىشى جۇزگە مەنىڭ جايىم.
بولعاندا ۇلدان ەكەۋ، قىزدان بىرەۋ،
شىن سىرىم وسى مەنىڭ ناۋاتايىم.
ناۋرىزباي:
قانىشاي ارتىق ەكەن سەنىڭ زاتىڭ،
ەرەكشە ەلدەن ەكەن پاراساتىڭ.
سۇراسىپ جايدى ءبىلۋ ءبىر عانيمەت،
تاعى دا ايتىپ بەرشى اكەڭ اتىن.
قانىشايىم:
سۇراساڭ اكەم اتى تىلەۋقاباق،
باق بەرگەن ءبىر باسىنا قۇداي قالاپ.
ءالي، مۇسا دەيتۇعىن ەكى اعام بار،
جايىمىز وسىلايشا ناۋان شىراق.
ناۋرىزباي:
قانىشاي قاراڭعىدا بولدىڭ پايدا،
جىگىتكە كەرەك ءىس قوي اقىل-ايلا.
ولجاسىز سەنى قۇرى تاستامايمىن،
ءدال قازىر شىنىڭدى ايتشى ىلقىڭ قايدا؟
قانىشايىم:
ناۋەكە ءسوز سويلەسىڭ اسىل باتىر،
بۇل ءسوزدى ايتپاسامدا اشىق جاتىر.
سۇراساڭىز مال ءجونىن مەن ايتايىن،
سان-ساناقسىز ارالدا جىلقىم جاتىر.
ناۋرىزباي:
قانىشاي ايتتىڭ جايىن، ۇقتىم ءجونىن،
جىلقىڭنىن ءبىلىپ بولدىم ءتۇپ مەكەنىن.
وتكەلى قايسى جەردە مىنا وزەننىڭ،
باسقاسىن ايتپاساڭدا قۇپ بىلەمىن.
قانىشايىم:
ناۋەكەجىلقىمدى ايداپ كەتە المايسىڭ،
جەرىڭە جەتەم دەگەن جەتە المايسىڭ.
ىشىندە توعىز ارال، جالعىز وتكەل،
جول تاۋىپ قاراڭعىدا وتە المايسىڭ.
ناۋرىزباي:
جەل سوعار قىبىلادان ەكپىندەتىپ،
قاسىڭا قاراڭعىدا كەلدىم جەتىپ.
وزىڭمەن ءجون سۇراسىپ، از سويلەستىم،
بەرسەڭشى جاۋابىڭدى انىق شەشىپ.
قانىشايىم:
جىلقىمىز ەندى يا جوق، ەندى ءيا بار،
كەڭ دۇنيە الىپ كەتسەڭ بولادى تار.
ارتىنان ادەبىڭدى بەرەتۇعىن،
ءالي، مۇسا سەنەتىن ەكى اعام بار.
*************************
ناۋىرىزباي بايقاپتى ءبىلىمدىنى،
الا-المايدى ەكەنسىز بۇگىن مۇنى.
باتىردىڭ دا جۇرەگىن قايتارىپتى،
اقىن قىزدىڭ سەسىنىڭ قيىندىعى.
ايتىستى ەل اۋزىنان جازىپ الىپ، ساقتاعان انداس وماراقىنۇلى.
دەرەككوز: https://kazneb.kz/kk/catalogue/view/1657687
«Q-andas» اقپاراتتىق اگەنتتىگى.











