ۇلار مەن قىرعاۋىل

ۇلار ەتىن جەدىڭ بە،

ۇلى تاۋعا باردىڭ با؟

ۇلى ءۇيسىن ەلىندە،

ءتاڭىرتاۋ دەگەن جەرىندە.

مەكەن ەتكەن سان قيلى –

جەتى اتاسى قۇستىڭ دا.

(ەجەلگى حالىق ولەڭى).

ەرتە، ەرتە، ەرتەدە ءبىر حان بولىپتى. ونىڭ جەتپىس قاتىنى بولسا دا، بىرەۋىنەن شىر ەتكەن ۇرپاق كورمەي زار جىلاپتى:

ءبىر وقىمىستى وعان:

– ۇرپاقتى بولام دەسەڭىز، باسقادان ايەل الساڭىز ۇرپاقتى بولاسىز، – دەپ كەڭەس ايتىپتى.

حان سول كەڭەس بويىنشا ماعرۇپتاعى ءبىر بوتەن ەلدىڭ قىزىن الىپتى. ايتسا، ايتقانداي جىل ۋاعىندا ءبىر قىز بالا كورىپ، اتىن ۇلەر دەپ قويىپتى. ۇلەردەن كەيىن ۇرپاقتى بولا بەرىپتى.

ۇلەر تولىقسىپ، بوي جەتىپتى. سۇلۋلىقتا الدىنا جان سالماپتى. ۇلەر ەرجەتكەندە حاننىڭ قولاستىنداعى ءبىر قۇلىنىڭ قىرداۋىل دەگەن ۇلىنا عاشىق بولىپتى.

– سۇيەككە تاڭبا بولدى. ەكەۋىنىڭ دە كوزىن جويۋ كەرەك، – دەپ جارلىق شاشىپتى.

حاننىڭ قاتار جارلىعىن ەستىگەن قىز بەن جىگىت ءبىر ءتۇنى قاشىپ كەتەدى. حان قالىڭ قولىن قاپتاتىپ ءجۇرىپ، ءبىر جىل ىزدەپ، زورعا تاۋىپ الىپ، قىرداۋىلدى وق وتپەس قالىڭ قامىستى ارالعا وتكىزىپ جىبەرىپ:

قۇس بولىپ ءومىرىڭ ءوتسىن، – دەپ قارعاپتى.

بۇل قورلىققا شىداماعان ۇلەر ۇلىتاۋعا بىراق تارتىپتى.

بۇلاردى قالىڭ قولمەن ىزدەپ تابا الماعان اكەسى قىزىن:

– ادام بالاسى جەتە الماعان تاز تاۋدا قالىپ ماڭگىلىككە قۇس بولىپ ءوت، – دەپ قارعاپتى.

ءسويتىپ ۋاقىت وتە كەلە ۇلەر – ۇلارعا، قىرداۋىل – قىرعاۋىلعا وزگەرىپ، بىرەۋى ويدا، بىرەۋى تاۋدا قۇس بولىپ ماڭگى قالىپتى.

كەيىن ۇلەردى ناعاشىلارى ىزدەپ كەلىپ، ۇلىتاۋدا قۇس بولىپ كەتكەنىن ءبىلىپ، قانشا ىزدەسە دە تابا الماي قايتادى. كەيىن ۇلار قۇس جەر الەمدى شارلاپ ءجۇرىپ، ءتاڭىر تاۋدىڭ باۋرايىنا كەلىپ، ماڭگىلىك مەكەن ەتىپتى.

دەرەككوز: تاريح تالعارىندا [ءماتىن] : (تاريحي زەرتتەۋلەر، ەسسە، ماقالالار) / ا. وماراقىن- تالدىقورعان : [ب. ج.] ، 2022.– 500 دانا . – ISBN 978-601-7865-39-9 (1-ت.)، ISBN 978-601-7865-36-8 1-توم .– 287 ب.، سۋرەتتى .

https://kazneb.kz/kk/catalogue/view/1657755

“Q-Andas” اقپاراتتىق اگەنتتىگى

جالعاسى بار…