Sol kezde torǵauyttyń hanzadasy Mansúkjaptyń áieli Ujuńbińdi ilandyru ońaiǵa túspepti. Biraq torǵauyttyń jau júrek batyry, atamnyń tós soǵystyryp serttesken dosy Badymanyń kómegimen qazaq-torǵauyt jer shekarasy bekitilip, 3 metr aq mataǵa qazaqsha, qytaisha, mońǵolsha toqtam jazylyp, eki el arasyndaǵy dauǵa núkte qoiylady (Búl qújat qaida júr eken deshi?!). Keiin qazaq ieligine ótken jerdiń bir bóligi «Úsh aimaq uaqyttyq ókimeti joralar májilisiniń» №267 qaulysy boiynsha torǵauyttarǵa qaitaralyp berildi. Jer dauyna orai Qazaq – torǵauyt arasynda talai ret kezdesu ótip, olardan elshiler toby kelip, qazaq jaqtan olarǵa baryp, eldestirudiń joly qarastyrylady. Osy tústa el ishinde: «Qazaq-torǵauyt elshileri Múratbek aqalaqshynyń úiinde keńsip, Omaraqyn záńginiń úiinde qonaq bolady» degen qanatty sóz taraǵan. Sol Omaraqyn záńgi meniń atam edi. Óz dáuiriniń egeilerimen etene jaqyn ótken kisi. Birde záńginiń úiine aqyn Tańjaryq Joldyúly bastaǵan bir top qonaq tústenedi. Abyr-sabyr ústinde Tákeń dastarqandaǵy altyn jalatylǵan qasyqtyń bireuin qaltasyna salyp alady.
Múny baiqap qalǵan kútushi jigitterdiń biri Omekeńe aityp, tartyp almaqshy bolypty. Sonda Omaraqyn záńni
– Timeńder, onyń sharapaty meniń úrpaqtaryma tietin bolady, – dep toqtatypty.
Qonaqtar attanyp, biraz jerge barǵannan keiin Tákeń qaita qaiyrylyp kelip, atamnyń qolyn qysyp, qúshaqtap:
– Men dúnie qúǵan adam emespin. Altyn qasyǵyńa ańsarym auyp ketti. Ol mende qalsyn. Esesine myna zatty saǵan bereiin, – dep qaltasynan jazylyp bituge tayaǵan qaryndashtyń túqylyn úsynady:
– Búl meniń abaqtyda alty jyl otyrǵanda ústaǵan qaryndashym edi. Sonda barlyq dúnieni osymen jazdym. Endi saǵan bereiin. Meniń aqyndyǵym seniń úrpaǵyna qalady, – dep qaiyrylyp júre beripti.
https://kazneb.kz/kk/catalogue/view/1657755
Q-Andas aqparat











