ۇلكەندەر بالالاردى قوناقجاي ەتىپ تاربيەلەۋ ءۇشىن وسىنداي ولەڭدەر جاتتاتىپ: «ونى ءجيى ايتسا، ۇيدەن قوناق ۇزىلمەيدى» دەپ قىزىقتىرىپ وتىرعان. ءار اۋىلدىڭ بالالارى ونى تۇرلەندىرىپ ايتىپ، بىرىمەن-ءبىرى جارىسقا تۇسەتىن بولعان. ۇلكەندەر جيىن-تويلاردا بالالاردى وسى ولەڭدەر ارقىلى جارىستىرىپ وتىرادى. بۇل ولاردىڭ جان دۇنيەسىن تازالاپ، كوپشىل ەتىپ تاربيەلەۋگە كوپ سەپتىگى تيەدى.
كىسى-كىسى كىسەكەت،
ءبىزدىڭ ۇيگە تۇسە كەت.
ايران-شالاپ ىشە كەت،
شالبارىڭا تىشا كەت.
جۇلدىز ساناۋ ويىنى
بالالارعا اسپان الەمىن مەڭگەرۋ ءۇشىن ايلى تۇندە دالا وتىرىپ، ۇلكەندەر ءاربىر جۇلدىزدى كورسەتىپ، سوعان ساي ولەڭ قۇراستىرىپ، بالالارعا جاتتاتادى. ولەڭدى جاتتاپ العان بالالار وسىدان بىلاي ءوز بەتتەرىمەن جۇلدىزداردى باعدارلاپ، وسى ولەڭدى ايتىپ، اسپان الەمى جونىندەگى العاشقى تۇسىنىگىن قالىپتاستىرادى. مۇنداي ولەڭدەردىڭ سان ءتۇرى بار. ءبىز سونىڭ ءبىر-ەكەۋىن كەلتىرمەكپىز.
جۇلدىز اتتارى
اسپاندا جەتى جۇلدىز تۇر قاراقشى،
ەگەسىڭ كەڭەسۋگە قۇپ جاراستى.
ۇرلاساق ءبىر دالادان مال ۇرلايمىز،
ءوزىن-ءوزى ۇرلاعان قىز قاراقشى.
ۇركەر ايدىڭ ۇلى، شولپان قىزى،
قاۋىسپەنەن قاينادى ءمىردىڭ ءجۇزى.
جامالىڭا قاراسام جان جەتپەيدى،
سەكىڭدىسىڭ سەنداعى جەر ءجۇلدىزى.
بىرەۋى كوپ ءجۇلدىزدىڭ ۇركەر جۇلدىز،
سوڭىنان كوپ جۇلدىزدى تىركەر جۇلدىز.
ۇركەرلىڭ جالعىز قىزىن ۇرلاپ العان،
قاراقشى انا تۇرعان جەتى جۇلدىز.
«ءۇش ارقار» ايداي تۋىپ، كۇندەي باتار،
تۋعاندا شابان سارى تاڭ سوندا اتار.
جۇلدىزدار تاراعان سوڭ شولپان تۋىپ،
كۇن نۇرى جەردىڭ ءجۇزىن ماناۋراتار.
جىل اتتارى
مۇش – دەگەنىڭ ءمانىسى تىشقان بولار،
جىگىتكە تاكاپپارلىق دۇشپان بولار.
كوڭىلگە شايتان كىرىپ سەمىرتەدى،
بىرەۋى ىشتەن، بىرەۋى تىستان بولار.
باحار – دەگەننىڭ ءمانىسى سيىر بولار،
جىل قايىرۋدى بىمەگەنگە قيىن بولار.
ادىلدىكپەن پاتشاڭىز باسقارعاندا،
كۇندە توي، كۇندە قىزىق جيىن بولار.
فالىڭ – دەگەنىڭ ءمانىسى بارىس بولار،
جاقىن جەر كورمەگەنگە الىس بولار.
حالىقتىڭ بىرىندە بار، بىرىندە جوق،
جاس ساناپ جىل قايىرۋ قالىس بولار.
«قاركۇش» دەگەننىڭ ءمانىسى قويان دەيدى،
جاسىڭدا ۇلگى الىپ ويان دەيدى.
جىل قايىرىپ، جاس ساناۋ بۇل ءبىر ونەر،
بۇرىنعى اتا جولدى قويام با ەندى.
ءماحىڭ – دەگەننىڭ ءمانىسى بالىق بولار،
ۇلى دەسە بالىقتى قانىق بولار.
بۇل بالىقتى ۇلى دەپ تالاسادى،
بالىقتىڭ ۇلكەندىگى قانىق بولار.
ءمار – دەگەننىڭ ءمانىسى جىلان ەكەن،
بارىندا اياعى جوق سىلاڭ ەكەن.
بۇرىنعى كەيىنگى وتكەن اتا جولى،
جىل قايىرىپ، جاس ساناپ تۇرادى ەكەن.
ءاسىپ – دەگەنىڭ ءمانىسى بولار جىلقى،
جىلقىدان قۇتىلمايدى قاشقان تۇلكى.
ات ءمىنىپ، قىمىز ءىشىپ كوك جايلاۋدا،
سالادى ساۋىق-سايران ءانشى-جىرشى.
كۇشپاندى – دەگەنىمىز قوي بولادى،
تەرىسى ءبىر ىشىككە بوي بولادى.
جۇنىنەن توقىلادى اسىل بۇلدار،
قويدىڭ دا قاسيەتى زور بولادى.
ھامدۋنا – دەگەنىمىز مەشىن ەدى،
ەجەلگى مايمىل دەگەن وسى دەيدى.
ماريحى – دەگەنىمىز بولار تاۋىق،
ونىڭ دا ناعىز اتىن قويعان تاۋىپ.
ول شىركىن ۇزاق تاڭعا كوزىن ىلمەي،
نامازعا وياتادى اۋىق-اۋىق.
ساك – دەگەننىڭ ءمانىسى بولادى يت،
تۇرا جۇرگەن ابزال عوي ءناپسى تيىپ.
بارىس تىلدەن اۋداردىم قازاقشاعا،
بار بولعان ءبىلىمىمدى ويعا ءتۇيىپ.
قوك – دەگەننىڭ ءمانىسى بولار دوڭىز،
عىلىم-ءبىلىم، اقىل-وي بولادى ەگىز.
اسىل سوزدەر ىنجۋدەي تىزبەكتەلسە،
بولادى باعاسى دا ۇشان-تەڭىز.
https://kazneb.kz/kk/catalogue/view/1605955
جالعاسى بار…











