Biyl qazaqtyń sóz ónerinde ózindik orny bar belgili aitysker aqyn Ábiken Sarybaevtyń tuǵanyna 100 jyl. El jadynda óreli oiymen, ótkir tilimen, halyqtyq ónerge adaldyǵymen saqtalǵan aqynnyń esimi búginde tuǵan óńiriniń ruhani keńistiginde erekshe qúrmetpen atalady. Onyń ónegeli ómiri men óner joly úrpaqqa sóz qadirin, eldik ruhty, últtyq namysty úǵyndyratyn taǵylymdy mektepke ainaldy.
Ábiken Sarybaevtyń esimi audandyq mádeniet úiine berilui de tegin emes. Eń aldymen, eldiń ónerge kórsetken qúrmeti, halyq jadynda qalǵan túlǵanyń ruhyna taǵzym, últtyq mádenietke jasalǵan iltipat. Óitkeni mádeniet úii kontsert ótetin oryn ǵana emes, eldiń ruhani tynysy toǵysatyn, óner men tárbieniń, dástúr men sabaqtastyqtyń altyn arqauy úzilmeitin qasietti orta. Sol shańyraqta aitylǵan árbir án, qoiylǵan árbir kórinis, úiymdastyrylǵan árbir taǵylymdy shara Ábikendei óner ieleriniń amanatyn jalǵap túrǵandai áser beredi.
Búginde Ábiken Sarybaev atyndaǵy audandyq mádeniet úii el ishindegi ónerpazdardy biriktirip, últtyq qúndylyqtardy dáriptep, aǵa buyn men jas úrpaq arasyndaǵy ruhani bailanysty nyǵaityp otyrǵan mańyzdy mádeni ortalyqqa ainaldy. Osy qara shańyraqtyń janynan qúrylǵan «SHejire» óner, tálim tárbie otauy da igi dástúrdiń zańdy jalǵasy. Onyń bolmysy sahnalyq ónermen ǵana shektelmeidi. «SHejire» ótken men búgindi jalǵap, analar ónegesin, ájeler danalyǵyn, últtyq óner men salt dástúrdi keiingi úrpaqqa jetkizip kele jatqan taǵylym mektebi retinde qalyptasty.
Qoǵamnyń ruhani ómiri eń aldymen eńbek ortasynyń ishki birligimen, ortaq maqsatqa júmyla biluimen, eldik iske degen jauapkershiligimen ólshenedi. Eńbek ortasy degenimiz bir mekemede qyzmet atqaratyn adamdar toby ǵana emes, ortaq múratty, ortaq qúndylyqty, ortaq jauapkershilikti arqalaǵan tiri áleumettik keńistik. Ásirese mádeniet pen óner salasyndaǵy shyǵarmashylyq toptardyń orny bólek. Óitkeni olar halyqtyń tarihi jadyn saqtaidy, últtyń ónerin jańǵyrtady, úrpaq sanasyna tálim men tárbieniń dánin sebedi.
SHyǵarmashylyq ortanyń tarihy 2015 jylǵy 1 nauryzdan bastalady. Alǵashqyda alty ájeden qúralǵan shaǵyn óner toby audandyq mádeni sharalarǵa qatysyp, últtyq án men salt dástúrdi nasihattauǵa kiristi. Osy bastama auyldyq mádeni keńistikte jańa serpin tudyrdy. Ájeler sahnaǵa án aitu úshin ǵana emes, últtyq bolmysty kórsetu, qazaqy tárbieni tanytu, jastarǵa úlgi bolu maqsatymen shyqty. Keiin bastama keńeiip, «SHejire» óner, tálim tárbie otauy retinde júieli baǵyt aldy.
Óner ordasynyń qalyptasuynda úiymdastyrushy azamattardyń, mádeniet salasy mamandarynyń eńbegi erekshe. Alǵashqy kezeńde ájeler tobynyń qúryluyna Gúlmira Ótegenova úiytqy bolsa, úiirme jetekshiligin Sáule Qasymhanqyzy atqardy. Keiin júmysty Lázzat Qúsaiynova jalǵastyryp, shyǵarmashylyq tynysyn keńeitti. Búginde Lázzat Qúsaiynova mádeniet salasyndaǵy tájiribesimen, úiymdastyrushylyq qabiletimen, árbir músheniń ónerin ashuǵa degen yqylasymen «SHejireniń» damuyna baǵyt berip keledi. Al top jetekshisi Raushan Núrǵalymova ónerpazdardyń ishki birligin saqtap, daiyndyq júmystarynyń júieli júruine úiytqy bolyp otyrǵan tájiribeli jan.
«SHejireniń» basty ereksheligi óner men tárbieni qatar órbituinde. Múndaǵy analar halyq ánderin oryndap, últtyq kiim úlgilerin tanystyryp, qolóner búiymdaryn kórsetip qana qoimaidy. Olar shejire aitu, estelik bólisu, taǵylymdyq kezdesuler ótkizu, jastarǵa últtyq ádep pen salt dástúrdiń mánin túsindiru júmystaryn da túraqty júrgizedi.
Múndaǵy analar ónerdi ómirlik ónegemen úshtastyryp, sahnadaǵy shyǵarmashylyq qyzmetimen qatar otbasynyń úiytqysy, ruhaniyattyń shyraqshysy retinde de elge úlgi bolyp keledi. Árbir isinen analyq meiirim, ájelik danalyq, últtyq tárbiege degen adaldyq aiqyn kórinedi. Sondyqtan «SHejire» músheleriniń eńbegi mádeni sharalarǵa qatysumen shektelmei, otbasy qúndylyǵyn, úrpaq tárbiesin, eldik sanany nyǵaitatyn mańyzdy ruhani qyzmetke ainalyp otyr.
Múndai ortada sahna mádenieti men ómir mektebi qatar qalyptasady. Árbir án, árbir kórinis, árbir últtyq búiym kórermenge jai ǵana óner tuyndysy retinde emes, eldik sanany oyatatyn ruhani belgi retinde jetedi. Óitkeni osy óner shańyraǵyndaǵy árbir ana men áje ómir kórgen, eńbekpen shyńdalǵan, otbasy tárbiesin, eldik dástúrdi, últtyq ónegeni boiyna sińirgen túlǵalar.
Ónerpaz analardyń ómir joly da atalǵan ortaǵa erekshe mazmún beredi. Raushan Núrǵalymova, Raushan Óskenbekova, Altynshash Orazova, Botakóz Rahimova, Qamihan Qalqabekqyzy, Kúnarai Kúzembaeva, SHolpan SHynybaeva, Bibinúr Andaqúlova, Gúlnar Qasymova jáne ózge de ónerpaz analar «SHejireniń» abyroiyn kóterip júrgen jandar. Árqaisysynyń artynda eńbekpen órilgen ǵúmyr, otbasylyq tárbie, analyq meiirim, ájelik ónege, qoǵamdyq belsendilik jatyr. Sondyqtan «SHejire» músheleri sahnaǵa shyqqanda, kórermen ónerpazdardy ǵana emes, ómirdiń ózinen sabaq alǵan, últ tárbiesin boiyna sińirgen túlǵalardy kóredi.
«SHejireniń» mańyzdylyǵy da osynda. Búgingi tańda jahandanu yqpaly kúsheiip, jastardyń tanymy men talǵamy túrli baǵytqa búrylyp jatqan kezde, últtyq ónerdi tiri orta arqyly kórsetu asa qajet. Kitaptan oqylǵan dástúr men sahnada kóringen dástúrdiń áseri eki bólek. Ájelerdiń óz qolymen tikken últtyq kiimi, óz qolymen jasaǵan búiymy, óz dausymen aitqan áni, óz júreginen shyqqan batasy jas úrpaqqa áldeqaida tereń áser etedi. Óitkeni múnda jasandylyq joq, ómir tájiribesinen tuǵan shynaiylyq bar.
«SHejire» qúrylǵan kúnnen bastap audandyq, oblystyq, respublikalyq deńgeidegi mádeni ruhani sharalarǵa belsene qatysyp keledi. 2018 jyly Panfilov audany Qońyróleń auylynda ótken «Auylym altyn besigim» is sharasynda Alǵys hatpen marapattaluy óner oshaǵy eńbeginiń alǵashqy eleuli baǵalarynyń biri boldy. 2019 jyldan 2022 jylǵa deiin Taldyqorǵan qalasyndaǵy «Tańjaryq» baǵdarlamasyna birneshe ret qatysyp, qolóner búiymdaryn tanystyryp, kórermenge últtyq ónerdiń mánin jetkizdi. 2021 jyly «Bolmys» baǵdarlamasynyń «Qarttarym asyl qazynam» túsirilimine qatysuy da shyǵarmashylyq ortanyń qoǵamdyq mádeni bedelin arttyra tústi.
«SHejireniń» qyzmeti sahnalyq sharalarmen ǵana shektelmeidi. 2020 jyldan 2022 jylǵa deiin Ramazan aiynda audandyq qaiyrymdylyq qorlaryna túraqty kómek kórsetip, izgilik pen janashyrlyqtyń úlgisin tanytty. 2022 jyly Kerbúlaq audany Saryózek auylyndaǵy medresege qoldau kórsetip, qaiyrymdylyq sharalarǵa atsalysty. Qańtar oqiǵasy kezinde blokposttaǵy azamattardy ystyq tamaqpen qamtamasyz etui ónerpaz analardyń el basyna túsken syn sátte de shet qalmaityn azamattyq bolmysyn kórsetti. Osy derekter «SHejireniń» óner kórsetetin orta ǵana emes, qoǵamǵa qyzmet etetin ruhani alań ekenin dáleldeidi.
SHyǵarmashylyq jetistikteri de az emes. 2023 jyly úiirme múshesi, qolóner sheberi Botakóz Rahimova oblystyq «Úkili seruen» últtyq kiim baiqauynyń irikteu kezeńinde joǵary baǵalandy. 2024 jyly ónerpaz analar KTK telearnasynyń «Kel shyrqaiyq» baǵdarlamasyna qatysyp, Bas júldeni jeńip aldy. Sol jyly «Dara ene, úzdik kelin» baiqauynda Gúlnar Qasymova men kelini Bas júldege ie boldy. Atalǵan jeńister analar men kelinder sabaqtastyǵynyń, últtyq tárbieniń naqty nátijesi retinde qabyldandy.
2025 jyl da «SHejire» úshin mazmúndy kezeń boldy. Ónerpazdar Jetisu telearnasynyń «Armysyń, áz Nauryz» baǵdarlamasyna qatysyp, últtyq ónerdi keńinen nasihattady. Sol jyly ótken «Dana ene, dara kelin» oblystyq baiqauynda arnaiy júlde ielendi. Qyzyljar shaiqasynyń 327 jyldyǵyna arnalǵan «FELT BOOK 2025» kitap jármeńkesine qatysyp, tarihi tanymdyq sharaǵa ónerimen úles qosty. 2025 jylǵy 2 qazanda Qarttar kúnine orai «SHejire» úiirmesiniń 10 jyldyq esep beru kontserti joǵary deńgeide úiymdastyrylyp, kórermenniń ystyq yqylasyna bólendi.
2026 jyly 18 nauryz, Últtyq kiim kúni ayasynda Jetisu oblysynyń «Kórkemóner» galereyasy men «Jetisu» ólketanushylar ortalyǵy qoǵamdyq birlestigi úiymdastyrǵan «Últtyq kiim, últ qúndylyǵy» kórme festivaliniń joǵary deńgeide ótuine atsalysuy da óner shańyraǵynyń baǵyt baǵdaryn aiqyn kórsetti. Atalǵan sharalarda «SHejire» músheleri últtyq kiim úlgilerin, qolóner búiymdaryn, tarihi tanymdyq mazmúndaǵy kórinisterdi úsynyp, óner arqyly halyq jadyn jańǵyrtty.
Ónerpaz analardyń sahnaǵa degen jauapkershiligi de bólek aituǵa laiyq. Ájelerdiń ár kontsertke tyńǵylyqty daiyndalyp, últtyq kiimderin óz qarajattaryna ázirlep, jańa obrazben shyǵuy olardyń ónerge degen qúrmetin kórsetedi. Qarapaiym kóringenimen, úlken mádeniettiń belgisi. Sahnaǵa adaldyq, kórermenge qúrmet, últtyq kiimge úqyptylyq, árbir sharaǵa daiyndyqpen kelu, osynyń bári eńbek ortasynyń ishki tártibi men jauapkershiligin tanytady.
Búginde «SHejire» músheleri «Jetisu» ólketanushylar ortalyǵy úiymdastyratyn túrli mádeni ruhani sharalarǵa belsene qatysyp keledi. Múndai áriptestik óńir tarihyn, últtyq kiim mádenietin, qolónerdi, analar ónegesin, úrpaq sabaqtastyǵyn nasihattauǵa jol ashyp otyr. Osyndai bailanystar arqyly atalǵan óner oshaǵynyń qyzmeti bir audan kólemimen shektelmei, oblystyq deńgeidegi ruhani júmystarmen sabaqtasyp keledi.
Ónerli analar ortasynyń júrip ótken jolyna qarasaq, basty jetistigi alǵan marapattarymen ǵana ólshenbeidi. Eń úlken tabys halyq jadynda úmyt bola bastaǵan salt dástúrlerdi qaita jańǵyrtuy, qolóner men auyz ádebieti úlgilerin tiriltui, jastardyń últtyq qúndylyqqa degen qyzyǵushylyǵyn arttyruy. Múndai eńbek kózge birden kórinbeui múmkin, biraq qoǵamǵa áseri tereń. Óitkeni últtyń ruhani tamyry dál osyndai qarapaiym, biraq tabandy eńbekter arqyly bekidi.
Búgingi «SHejire» óner, tálim tárbie otauy eńbek ortasynyń qandai boluy kerektigin kórsetetin jarqyn mysal. Múnda tártip bar, birlik bar, jauapkershilik bar, eń bastysy, ortaq ruhani maqsat bar. Ónerpazdar sahnaǵa shyqqanda án aitady, kórme úiymdastyrǵanda qolónerdi tanytady, jastarmen kezdeskende ónege aitady, eldik sharalarda últtyq bolmystyń biigin kórsetedi.
Sondyqtan atalǵan óner oshaǵynyń tarihy bir óner tobynyń shejiresi ǵana emes. Analardyń el ruhaniyatyna qosqan úlesiniń kórinisi. Eńbek ortasynyń qoǵamdy tárbieleudegi kúshin dáleldeitin ónegeli jol. Ótkendi úmytpai, búgindi baǵalap, bolashaqqa amanat arqalaǵan analar mektebi.
Osyndai óner oshaqtary barda últtyq ónerdiń oty óshpeidi, dástúrdiń tamyry úzilmeidi, úrpaqtar arasyndaǵy ruhani bailanys álsiremeidi. «SHejire» sony isimen dáleldep kele jatqan taǵylymdy orta. Onyń árbir múshesi, árbir kontserti, árbir kórmesi, árbir qaiyrymdy isi óńir mádenietiniń damuyna qosylǵan súbeli úles bolyp qala bermek.
Qajet Andas,
Q-Andas aqparattyq agenttigi
