Ǵylymi-tanymdyq kezdesudiń negizgi maqsaty – Alash qozǵalysynyń aldyńǵy buyn ókilderiniń biri Barlybek Syrttanúlynyń ómiri men qoǵamdyq qyzmetin keńinen tanytu, onyń qúqyqtyq memleket turaly ideyalarynyń tarihi mańyzyn saralau jáne búl múranyń búgingi táuelsiz Qazaqstannyń memlekettik damuymen ruhani sabaqtastyǵyn kórsetu. Sonymen qatar, sharanyń basty kózdegen nátijesi – Alash múrasyn ǵylymi túrǵyda nasihattap, jas úrpaqtyń tarihi sanasyn qalyptastyruǵa úles qosu.
Jiynǵa tarihshylar, ǵalymdar, ústazdar, muzei qyzmetkerleri, sondai-aq student jastar qatysyp, últ tarihyndaǵy mańyzdy túlǵalardyń biri sanalatyn Barlybek Syrttanúlynyń memleketshildik ideyalary men qoǵamdyq qyzmeti jan-jaqty talqylandy.
Посмотреть эту публикацию в Instagram
SHaranyń moderatory, PhD dokturanty Erkin Stamsholov jiyndy ashyp, Alash qozǵalysynyń tarihi mańyzyna toqtaldy.
– HH ǵasyrdyń basy qazaq halqy úshin kúrdeli ári taǵdyrly kezeń boldy. El taǵdyry tarazyǵa túsken tústa Alash ziyalylary últtyq memleket qúru ideyasynyń tuyn kóterdi. Solardyń qatarynda Barlybek Syrttanúly qazaq qoǵamynda qúqyqtyq oidyń qalyptasuyna eleuli úles qosqan qairatker retinde tarihta qaldy. Onyń memleketshildik ideyalary men qúqyqtyq kózqarastary búgingi táuelsiz Qazaqstannyń damuymen sabaqtas, – dedi ol.

Dóńgelek ústelde alǵashqy bayandama jasaǵan tarih ǵylymdarynyń kandidaty, Ál-Farabi atyndaǵy Qazaq últtyq universitetiniń Qazaqstan tarihy kafedrasynyń assistent-professory Leila Hasanaeva óz bayandamasynda Barlybek Syrttanúlynyń últtyq qúqyqtyq memleket turaly tújyrymdamasyna toqtaldy.
– Barlybek Syrttanúly – qazaq qoǵamynda konstitutsiyalyq oidyń qalyptasuyna yqpal etken túlǵalardyń biri. Ol zań ústemdigine negizdelgen memleket qúrudy armandady. Búl ideyalar búgingi Qazaqstannyń qúqyqtyq memleket qúru jolyndaǵy ústanymdarymen úndesip jatyr, – dedi ǵalym.
Kelesi kezekte QR Ortalyq memlekettik arhivi Áleumettik zertteuler ortalyǵy jetekshisiniń mindetin atqarushy, PhD doktorant Ramazan Ábildos «Alash zańgerleriniń ómiri men qyzmeti Omby oblysynyń tarihi arhivi qújattary negizinde» atty bayandamasynda arhiv derekteriniń mańyzyn atap ótti.
– Omby oblystyq arhivterinde saqtalǵan qújattar Alash qairatkerleriniń sayasi-qúqyqtyq kózqarastaryn aiqyn kórsetedi. Búl materialdar arqyly biz olardyń qazaq qoǵamyn jańǵyrtuǵa baǵyttalǵan naqty qadamdaryn, qúqyqtyq memleket qúru jónindegi ideyalaryn tereńirek túsine alamyz, – dedi zertteushi.

Jetisu universitetiniń tarih jáne áleumettik-gumanitarlyq pánder kafedrasynyń oqytushy-dáriskeri Huanǵan Onerbek óz sózinde Alash qairatkeriniń tarihi túlǵasyn ǵylymi túrǵyda zertteudiń mańyzyna toqtaldy.
– Barlybek Syrttanúly qazaqtyń alǵashqy konstitutsiyalyq oi-pikiriniń qalyptasuyna yqpal etken qairatkerlerdiń biri. Onyń memleketshildik ideyalary últtyq tarihymyzdaǵy mańyzdy kezeńderdiń biri – Alash qozǵalysynyń sayasi-qúqyqtyq baǵdaryn aiqyn kórsetedi, – dedi ol.
Jiyn barysynda bilim salasynyń ókilderi de óz pikirlerin bildirdi. №25 mektep direktory Rahat Ibraimova tarihi túlǵalardyń múrasyn jas úrpaqqa tanytudyń mańyzyna toqtaldy.
– Múndai ǵylymi-tanymdyq kezdesuler oqushylar men jastardyń tarihi sanasyn qalyptastyruǵa úlken yqpal etedi. Alash qairatkerleriniń ómir joly – eldik ruh pen otansúigishtikke tárbieleitin taǵylymdy mektep, – dep túiindedi sózin.
Dóńgelek ústelde muzei qyzmetkeri Qalqaman Abdrahmanúly «Alash múrasyn muzei keńistiginde nasihattau máseleleri» taqyrybynda bayandama jasap, tarihi túlǵalardyń múrasyn muzei ekspozitsiyalary men ǵylymi-aǵartushylyq jobalar arqyly keńinen tanytudyń mańyzyn atap ótse, ólketanushy Jemisbek Tolymbekov barlybektanuda eskeruge tiisti mańyzdy túiinderge toqtaldy.
SHara barysynda Barlybek Syrttanúlynyń úrpaqtary da sóz alyp, tarihi túlǵanyń ómir joly men qyzmeti turaly estelikterimen bólisti. Búl pikirler jiynnyń mazmúnyn tolyqtyryp, Alash qairatkerleriniń ruhani múrasyn tereńirek tanuǵa múmkindik berdi.
Sońynda Barlybek Syrttanúlynyń úrpaǵy Bauyrjan Ahmetov tarihi túlǵaǵa arnalǵan arnauyn oryndap, shara qatysushylary estelik suretke tústi.

Taǵylymdy kezdesu Alash múrasyn jańǵyrtu, tarihi túlǵalardyń eńbegin keńinen nasihattau jáne últtyq memleketshildik ideyalaryn qazirgi qoǵammen sabaqtastyra qarastyrudyń mańyzyn taǵy bir márte aiqyndady. Barlybek Syrttanúlynyń táuelsizdik, ádilet jáne qúqyq ústemdigi turaly oilary uaqyt ótken saiyn ózektiligin joǵaltpai, últ ruhaniyatynyń berik temirqazyǵy bolyp qala bermek.
Qajet Andas
Q–Andas aqparat agenttigi











