عىلىمي-تانىمدىق كەزدەسۋدىڭ نەگىزگى ماقساتى – الاش قوزعالىسىنىڭ الدىڭعى بۋىن وكىلدەرىنىڭ ءبىرى بارلىبەك سىرتتانۇلىنىڭ ءومىرى مەن قوعامدىق قىزمەتىن كەڭىنەن تانىتۋ، ونىڭ قۇقىقتىق مەملەكەت تۋرالى يدەيالارىنىڭ تاريحي ماڭىزىن سارالاۋ جانە بۇل مۇرانىڭ بۇگىنگى تاۋەلسىز قازاقستاننىڭ مەملەكەتتىك دامۋىمەن رۋحاني ساباقتاستىعىن كورسەتۋ. سونىمەن قاتار، شارانىڭ باستى كوزدەگەن ناتيجەسى – الاش مۇراسىن عىلىمي تۇرعىدا ناسيحاتتاپ، جاس ۇرپاقتىڭ تاريحي ساناسىن قالىپتاستىرۋعا ۇلەس قوسۋ.
جيىنعا تاريحشىلار، عالىمدار، ۇستازدار، مۋزەي قىزمەتكەرلەرى، سونداي-اق ستۋدەنت جاستار قاتىسىپ، ۇلت تاريحىنداعى ماڭىزدى تۇلعالاردىڭ ءبىرى سانالاتىن بارلىبەك سىرتتانۇلىنىڭ مەملەكەتشىلدىك يدەيالارى مەن قوعامدىق قىزمەتى جان-جاقتى تالقىلاندى.
Посмотреть эту публикацию в Instagram
شارانىڭ مودەراتورى، PhD دوكتۋرانتى ەركىن ستامشولوۆ جيىندى اشىپ، الاش قوزعالىسىنىڭ تاريحي ماڭىزىنا توقتالدى.
– حح عاسىردىڭ باسى قازاق حالقى ءۇشىن كۇردەلى ءارى تاعدىرلى كەزەڭ بولدى. ەل تاعدىرى تارازىعا تۇسكەن تۇستا الاش زيالىلارى ۇلتتىق مەملەكەت قۇرۋ يدەياسىنىڭ تۋىن كوتەردى. سولاردىڭ قاتارىندا بارلىبەك سىرتتانۇلى قازاق قوعامىندا قۇقىقتىق ويدىڭ قالىپتاسۋىنا ەلەۋلى ۇلەس قوسقان قايراتكەر رەتىندە تاريحتا قالدى. ونىڭ مەملەكەتشىلدىك يدەيالارى مەن قۇقىقتىق كوزقاراستارى بۇگىنگى تاۋەلسىز قازاقستاننىڭ دامۋىمەن ساباقتاس، – دەدى ول.

دوڭگەلەك ۇستەلدە العاشقى بايانداما جاساعان تاريح عىلىمدارىنىڭ كانديداتى، ءال-فارابي اتىنداعى قازاق ۇلتتىق ۋنيۆەرسيتەتىنىڭ قازاقستان تاريحى كافەدراسىنىڭ اسسيستەنت-پروفەسسورى لەيلا حاساناەۆا ءوز بايانداماسىندا بارلىبەك سىرتتانۇلىنىڭ ۇلتتىق قۇقىقتىق مەملەكەت تۋرالى تۇجىرىمداماسىنا توقتالدى.
– بارلىبەك سىرتتانۇلى – قازاق قوعامىندا كونستيتۋتسيالىق ويدىڭ قالىپتاسۋىنا ىقپال ەتكەن تۇلعالاردىڭ ءبىرى. ول زاڭ ۇستەمدىگىنە نەگىزدەلگەن مەملەكەت قۇرۋدى ارماندادى. بۇل يدەيالار بۇگىنگى قازاقستاننىڭ قۇقىقتىق مەملەكەت قۇرۋ جولىنداعى ۇستانىمدارىمەن ۇندەسىپ جاتىر، – دەدى عالىم.
كەلەسى كەزەكتە قر ورتالىق مەملەكەتتىك ءارحيۆى الەۋمەتتىك زەرتتەۋلەر ورتالىعى جەتەكشىسىنىڭ مىندەتىن اتقارۋشى، PhD دوكتورانت رامازان ءابىلدوس «الاش زاڭگەرلەرىنىڭ ءومىرى مەن قىزمەتى ومبى وبلىسىنىڭ تاريحي ءارحيۆى قۇجاتتارى نەگىزىندە» اتتى بايانداماسىندا ارحيۆ دەرەكتەرىنىڭ ماڭىزىن اتاپ ءوتتى.
– ومبى وبلىستىق ارحيۆتەرىندە ساقتالعان قۇجاتتار الاش قايراتكەرلەرىنىڭ ساياسي-قۇقىقتىق كوزقاراستارىن ايقىن كورسەتەدى. بۇل ماتەريالدار ارقىلى ءبىز ولاردىڭ قازاق قوعامىن جاڭعىرتۋعا باعىتتالعان ناقتى قادامدارىن، قۇقىقتىق مەملەكەت قۇرۋ جونىندەگى يدەيالارىن تەرەڭىرەك تۇسىنە الامىز، – دەدى زەرتتەۋشى.

جەتىسۋ ۋنيۆەرسيتەتىنىڭ تاريح جانە الەۋمەتتىك-گۋمانيتارلىق پاندەر كافەدراسىنىڭ وقىتۋشى-دارىسكەرى حۋانعان ونەربەك ءوز سوزىندە الاش قايراتكەرىنىڭ تاريحي تۇلعاسىن عىلىمي تۇرعىدا زەرتتەۋدىڭ ماڭىزىنا توقتالدى.
– بارلىبەك سىرتتانۇلى قازاقتىڭ العاشقى كونستيتۋتسيالىق وي-پىكىرىنىڭ قالىپتاسۋىنا ىقپال ەتكەن قايراتكەرلەردىڭ ءبىرى. ونىڭ مەملەكەتشىلدىك يدەيالارى ۇلتتىق تاريحىمىزداعى ماڭىزدى كەزەڭدەردىڭ ءبىرى – الاش قوزعالىسىنىڭ ساياسي-قۇقىقتىق باعدارىن ايقىن كورسەتەدى، – دەدى ول.
جيىن بارىسىندا ءبىلىم سالاسىنىڭ وكىلدەرى دە ءوز پىكىرلەرىن ءبىلدىردى. №25 مەكتەپ ديرەكتورى راحات يبرايموۆا تاريحي تۇلعالاردىڭ مۇراسىن جاس ۇرپاققا تانىتۋدىڭ ماڭىزىنا توقتالدى.
– مۇنداي عىلىمي-تانىمدىق كەزدەسۋلەر وقۋشىلار مەن جاستاردىڭ تاريحي ساناسىن قالىپتاستىرۋعا ۇلكەن ىقپال ەتەدى. الاش قايراتكەرلەرىنىڭ ءومىر جولى – ەلدىك رۋح پەن وتانسۇيگىشتىككە تاربيەلەيتىن تاعىلىمدى مەكتەپ، – دەپ تۇيىندەدى ءسوزىن.
دوڭگەلەك ۇستەلدە مۋزەي قىزمەتكەرى قالقامان ابدراحمانۇلى «الاش مۇراسىن مۋزەي كەڭىستىگىندە ناسيحاتتاۋ ماسەلەلەرى» تاقىرىبىندا بايانداما جاساپ، تاريحي تۇلعالاردىڭ مۇراسىن مۋزەي ەكسپوزيتسيالارى مەن عىلىمي-اعارتۋشىلىق جوبالار ارقىلى كەڭىنەن تانىتۋدىڭ ماڭىزىن اتاپ وتسە، ولكەتانۋشى جەمىسبەك تولىمبەكوۆ بارلىبەكتانۋدا ەسكەرۋگە ءتيىستى ماڭىزدى تۇيىندەرگە توقتالدى.
شارا بارىسىندا بارلىبەك سىرتتانۇلىنىڭ ۇرپاقتارى دا ءسوز الىپ، تاريحي تۇلعانىڭ ءومىر جولى مەن قىزمەتى تۋرالى ەستەلىكتەرىمەن ءبولىستى. بۇل پىكىرلەر جيىننىڭ مازمۇنىن تولىقتىرىپ، الاش قايراتكەرلەرىنىڭ رۋحاني مۇراسىن تەرەڭىرەك تانۋعا مۇمكىندىك بەردى.

سوڭىندا بارلىبەك سىرتتانۇلىنىڭ ۇرپاعى باۋىرجان احمەتوۆ تاريحي تۇلعاعا ارنالعان ارناۋىن ورىنداپ، شارا قاتىسۋشىلارى ەستەلىك سۋرەتكە ءتۇستى.
تاعىلىمدى كەزدەسۋ الاش مۇراسىن جاڭعىرتۋ، تاريحي تۇلعالاردىڭ ەڭبەگىن كەڭىنەن ناسيحاتتاۋ جانە ۇلتتىق مەملەكەتشىلدىك يدەيالارىن قازىرگى قوعاممەن ساباقتاستىرا قاراستىرۋدىڭ ماڭىزىن تاعى ءبىر مارتە ايقىندادى. بارلىبەك سىرتتانۇلىنىڭ تاۋەلسىزدىك، ادىلەت جانە قۇقىق ۇستەمدىگى تۋرالى ويلارى ۋاقىت وتكەن سايىن وزەكتىلىگىن جوعالتپاي، ۇلت رۋحانياتىنىڭ بەرىك تەمىرقازىعى بولىپ قالا بەرمەك.
قاجەت انداس
Q-Andas اقپارات اگەنتتىگى











