Jetisuda erekshe qajettilikteri bar sportshylar arasynda ústel tennisinen oblys chempionaty ayaqtaldy
Jetisu oblysynda tirek-qimyl qozǵalys apparaty jáne estu múshesi zaqymdalǵan eresekter, sondai-aq tirek-qimyl qozǵalys apparaty zaqymdalǵan 2004 jyly tuǵan jáne odan kishi jas sportshylar arasynda ústel tennisinen oblys chempionaty óz máresine jetti.
Búl jarystyń basty maqsaty – erekshe qajettilikteri bar sportshylar arasynda ústel tennisin damytu, olardyń sheberligin shyńdau, salauatty ómir saltyn nasihattau jáne qoǵamdyq belsendiligin arttyru. Doda barysynda qatysushylar óz múmkindikterin aiqyn kórsetip, tabandylyq pen tózimdiliktiń, jiger men qaisarlyqtyń jarqyn úlgisin tanytty.
CHempionat qorytyndysy boiynsha komandalyq esepte Taldyqorǵan qalasy I, Kóksu audany II, Tekeli qalasy III oryndy ielendi.
Aita keterligi, osy jarysta Q-andas.kz saitynyń redaktory Aqjol Menlibai Taldyqorǵan qalasynyń namysyn qorǵap, joǵary deńgeide óner kórsetti. Ol jeke saiysta júldeli II oryndy jeńip alyp, Taldyqorǵan qalasynyń toptyq básekede aldyńǵy orynnan kórinuine ózindik súbeli úlesin qosty. Búl – tek jeke jetistik emes, sonymen qatar, ortaq jeńiske qosylǵan mańyzdy úles.
Múndai jarystar erekshe qajettilikteri bar azamattardyń sport arqyly shyńdalyp qana qoimai, qoǵam ómirine belsene aralasuyna, óz kúshine degen senimin nyǵaituyna jol ashady. Sport – jigerdi janityn, múmkindikti tanytatyn úlken alań ekeni búl joly da anyq ańǵaryldy.
Qajet Andas,
«Q-andas» aqparat agenttigi
Foto: https://www.instagram.com/p/DVneTKBDA57/?igsh=MWczd28wemQxZjBlNg==
