اس-ماس، ات-پات، جىگىت-مىگىت

قىزايدىڭ قارايت باتىرى ءبىر جولى موڭعولداردىڭ ءبىر تويىنا قاتىسىپ قالادى.

توي ۇستىندەگى ءسان-سالتاناتىنا ماقتانعان موڭعول حانى قارايىت باتىرعا:

– قىزايدا اس-ماس، جىگىت-مىگىت، ەت-مەت دەگەن سوزدەر بار ەكەن. سونىڭ ءمانىسى قالاي، – دەپ سۇرايدى.

سۇراعىڭىزعا تويدان كەيىن جاۋاپ بەرەيىن، – دەپتى قارايىت باتىر.

توي-دۋماندى ءوتىپ، تويدا قىزاي جاقتىڭ اتى بايگەدەن كەلىپ، بالۋانى جىعىپ جۇلدەلى بولادى. تويدىڭ ويىن-تاماشاسى ءبىتىپ، جۇرت تارقاپ جاتقاندا قارايىت باتىر موڭعول حاننىڭ الدىنا كەلىپ:

– ماناعى سۇراعىڭىزعا ەندى جاۋاپ بەرەيىن: قىزايلار توي جاساعاندا قوي سويىپ قۇيرىق، جىلقى سويىپ قازى-قارتا تارتادى. سۋسىنعا قىمىز قۇيادى. مۇنى «اس» دەيدى. ال مىناداي تاس تاباققا سالىپ تارتقان ءشوپ-شالاڭ مەن سۋسىنعا بەرگەن شايدى «ماس» دەيدى. بايگەدەن وزىپ كەلگەن سايگۇلىكتى «ات»، جەتە الماعانىن «مات» دەيدى. قارسىلاسىن الىپ ۇرعان بالۋاندى «جىگىت»، جىعىلعاندى «مىگىت» دەيدى، – دەپ جاۋاپ بەرىپتى.

ايىبىن تۇسىنگەن موڭعول حانى سوزدەن جىعىلىپ، قارايىت باتىرعا شابان جاۋىپ، ات مىنگىزىپ اتتاندىرىپتى.

دەرەككوز: تاريح تالعارىندا [ءماتىن] : (تاريحي زەرتتەۋلەر، ەسسە، ماقالالار) / ا. وماراقىن- تالدىقورعان : [ب. ج.] ، 2022.– 500 دانا . – ISBN 978-601-7865-39-9 (1-ت.)، ISBN 978-601-7865-36-8 1-توم .– 287 ب.، سۋرەتتى .

https://kazneb.kz/kk/catalogue/view/1657755

“Q-Andas” اقپاراتتىق اگەنتتىگى

جالعاسى بار…