دۇنيە ويلاعانعا بەكەر ەكەن،
ءبىر كۇنى بارىمىزدەن وتەدى ەكەن.
سۇيلەيمەن پايعامباردىڭ زامانىندا،
ءبىر تاۋىق جامان تامدى قالعان مەكەن.
جانىندا ول تاۋىقتىڭ بولماس سەرىك،
ول تاۋىق جۇرگەن ەمەس باسقاعا ەرىپ.
ءبىر كۇنى تۇلكى مىرزا جورتىپ ءجۇرىپ،
تاۋىقتى جامان تامنان كەتتى كورىپ.
بۇل تۇلكى ءبىر كەزدە ابدەن اشىعادى،
كوپ جورتىپ تاماق تاپپاي اشىنادى.
ەش نارسە تابىلماسىن بىلگەننەن سوڭ،
سويقاندى ءبىر وي ويلاپ قاسىنادى.
«ءبىر بارىپ جامان تامعا كەلمەيمىن بە،
ەش نارسە قورەگىم جوق كومەيىمدە.
اشىعىپ ايدالادا جۇرگەنىمشە،
تاۋىقتى جامان تامنان جەمەيمىن بە؟»
مۇنى ويلاپ تۇلكى كەپتى تامعا جەتىپ،
تاۋىق تۇر كورگەننەن سوڭ ەسى كەتىپ.
ۇستىنە جامان تامنىڭ ۇشىپ شىقتى ول،
تۇلكى كەپ سالەم بەردى قۇرمەت ەتتى.
تاۋىقتىڭ ايتقان:
كوپ ەدى تۇلكى سەنىڭ اقىل-ايلاڭ،
بىزگە دە جاقسى بولساڭ تيەر پايداڭ.
كەنەتتەن وسى ورىنعا قايدان كەلدىڭ،
ەستيتىن حابار بولسا ايتشى ماعان.
تۇلكىنىڭ ايتقانى:
شىعارتىپ جۇرەكتەگى زاردىڭ ءبارىن،
جيىلعان قالىڭ توپقا مەن دە باردىم.
سۇلەيمەن اۋىلىندا سەزد بولىپ،
سەزگە شاقىرىپتى جاننىڭ ءبارىن.
پاتشا ايتتى ەلىڭە باسىڭدى قوس،
قاس بولىپ ومىرلەرىڭ وتپەسىن تەك.
قارشىعا مەن قىرعاۋىل، قوي مەن قاسقىر،
تورتەۋى قۇشاقتاسىپ بولدى شىن دوس.
بۇل سياز ويلانعانعا بولارلىق تاڭ،
شىنى وسى جوق قوي مۇندا باسقا بۇلتاڭ.
تاۋىعىم تامنان ءتۇسىپ بەرى تامان كەل،
وسىنى ايتايىن دەپ كەلدىم شاپشاڭ.
تاۋىق تۇلكىنىڭ الداپ ءتۇسىرىپ، جەپ قوياتىنىن سەزەدى دە:
قارايمىن الدى-ارتىما موينىم سوزىپ،
بۇل كۇندە قاتارىڭنان ءجۇرسىڭ وزىپ.
قاسىڭدا، تۇلكى مىرزا، جولداس بار ما؟
ءبىر نارسە كەلە جاتىر شاڭى توزىپ.
تۇلكىنىڭ ايتقانى:
وسى عوي ءومىر دەگەن دۇنيە بوق،
تاۋىعىم، سەن تۇرعاندا كوڭىلىم توق.
بايقاشى كەلە جاتقان قانداي نارسە،
مەن ءوزىم جالعىز جۇرەم جولداسىم جوق.
تاۋىقتىڭ ايتقانى:
جىڭىشكە ءتۇسى سارى، يتتەن بيىك،
قۇيرىعى ۇزىن كەلەدى جەرگە ءتيىپ.
سالپى اۋىز، سالپاق قۇلاق كورىنەدى،
بۇكتەلىپ جاراپ قاپتى بەلىن ءيىپ.
قارعىسا ءتورت-بەس سارجان جەرگە كەتەر،
الدى شاڭ، كەۋدەسى ونىڭ جەرگە جەتەر.
جاقىنداپ وسى كۇندە قالدى انە،
اسىقپا، تۇلكى مىرزا، قازىر جەتەر.
تۇلكىنىڭ ايتقانى:
ياپىر-اي بۇل ايتقانىڭ نەمەنە ەكەن،
ىزىممەن مەنى قۋىپ كەلە مە ەكەن.
قارعىسا ارقان بويى جەرگە جەتسە،
بالكىم ول ماعان تاجال تازى ما ەكەن.
تاۋىقتىڭ ايتقانى:
ايلاكەر تۇلكى بولار سەنىڭ اتىڭ،
شىقپاعان ومىرىڭدە جامان اتىڭ.
ول ءوزى تازى بولسا نە قىلادى،
سيازعا بارعان شىعار ودان جاقىن.
تۇلكىنىڭ ايتقانى:
وتەدى قازا كەلسە باستان جالعان،
سەزگە بارماعاندار ەتكەن ارمان.
سۇلەيمەن نەشە رەت شاقىرسا دا،
ول انتۇرعان سيازعا بارماي قويعان.
بارادى بارعان سايىن ءوڭى قاشىپ،
بۇل ءسوزدى ارەڭ ايتتى اسىپ-ساسىپ.
«تاۋىعىم تازى بولسا ايتپاشى»، – دەپ،
قۋ تۇلكى جونەلىپتى تۇرا قاشىپ.
تاۋىقتىڭ شالقىپتى كەپ كوڭىلى تاسىپ،
كەتىپتى تۇلكى قاشىپ تاۋدان اسىپ.
تۇلكىنىڭ الداۋىنان امال تاۋىپ،
قۇلىعى بۇل تاۋىقتىڭ كەتىپتى اسىپ.
جىگىتتەر ساقتانىپ ءجۇر العا باسىپ،
جۇرمەيىك قاتەلەسىپ جازا باسىپ.
اركىم-اق سىيلاسقاننىڭ قۇلى ەمەس پە،
شىن سىردى كورسەتكەن ءجون بىراق اشىپ.
جوعارىداعى ايتىستى قياسبەك بەرىكبايۇلىنان جازىپ الىپ، ساقتاعان انداس وماراقىنۇلى
دەرەككوز: دودا: (ايتىستار مەن تاريحي-ەتنوگرافيالىق جىرلارى) / ا. وماراقىن ؛ [قۇراستىرعان: ءا. ماجاي [ج. ب.] .- تالدىقورعان : [ب. ج.]. https://kazneb.kz/kk/catalogue/view/1657687
“Q-Andas” اقپاراتتىق اگەنتتىگى











