Павлодар қаласында өткен пара үстел теннисінен жастар арасындағы Қазақстан Республикасының чемпионатында облыс спортшылары жоғары нәтиже көрсетіп, өңір абыройын асқақтатты. Елдің әр өңірінен жиналған жас спортшылар додасында жетісулықтар жекелей, жұптық және абсолюттік санаттарда жүлделі орын иеленіп, жалпыкомандалық есепте де үздіктер қатарынан көрінді.
Бұл бәсекеде өңір намысын қорғаған жас спортшылар жоғары шеберлік танытып, бірнеше санат бойынша жеңіс тұғырынан көрінді. Мұндай табыс Жетісу жерінде параспорттың, соның ішінде пара үстел теннисінің жүйелі түрде дамып келе жатқанын аңғартты.
Чемпионат барысында Жүніс Алдияр ерекше қарқынымен көзге түсті. Ол жекелей сында қарсыластарынан басым түсіп, бірінші орынды иеленсе, абсолюттік сында да топ жарып, екі бірдей алтын жүлдені қанжығасына байлады. Ысқақ Дария да жоғары деңгейдегі дайындығын дәлелдеп, жекелей сында чемпион атанып, абсолюттік сында қола медаль олжалады. Дәулет Ақат жекелей сында жеңімпаз атанса, Қожабек Адия екінші орынды иеленді. Айдосұлы Арман үздік үштікті түйіндеп, қола жүлдеге қол жеткізді.
Жұптық және аралас санаттарда да Жетісу спортшылары табысты өнер көрсетті. MD8 санатында Жүніс Алдияр мен Ысқақ Дария жеңімпаз атанып, алтын жүлдені иеленді. XD10 санатында да осы жұп үздік нәтиже көрсетіп, бірінші орынға көтерілді. Сонымен қатар, Қожабек Адия өз санатында алтын жүлде алса, Жарқын Ағарсын үшінші орыннан көрінді. Ал XD14 санатында Меңлібай Ақжол мен Қожабек Адия қола жүлдеге ие болды.
Осы жарыста «Жетісу» өлкетанушылар орталығының қызметкері Меңлібай Ақжолдың да мерейі үстем болды. Ел чемпионатында жүлделі орын иеленуі оның спорттағы талпынысы мен табандылығын ғана емес, өзі қызмет ететін ұжымның да абырой-беделін арттыра түскенін көрсетті. Бұл жетістік арқылы Меңлібай Ақжол «Жетісу» өлкетанушылар орталығының мерейін өсіріп, ұжым қоржынына қуаныш пен мақтаныш сыйлады.
Жалпыкомандалық есептегі жоғары нәтиже Жетісу құрамасының әлеуеті мықты екенін тағы бір мәрте дәлелдеді. Бұл жеңіс спортшылардың тынымсыз еңбегі, бапкерлердің білікті даярлығы және өңірдегі спорт саласына көрсетіліп отырған қолдаудың нақты жемісі. Жас спортшылардың ел чемпионатындағы бұл табысы алдағы ірі жарыстарда да үлкен үміт күттіретіні анық.
Қажет Андас,
Q-Andas ақпарат агенттігі
