Екінші некесінен –Қожабаек жалғыз. Үшінші некесі – Жап анамыздан Малтабар, Шәкіл екі ұл болып, кенжесі Шәкіл еді. Бәйбішенің балалары әрі көп, әрі іргелі болғандықтан, аз ата Малтабар, Шәкілді менсінбей, Солтанкелдінің қара шаңырағы бәйбішенің кенжесі Тұрдықұлға тігіп береді.
Малтабар батыр бұл кезде жоқ, кейін ауылға келсе Шәкіл отырған ақ орданы көшіріп әкетіпті. Бұл жолсыздыққа ашынған Малтекең бес қаруының бір айбалтасын алып, бір келелі іске бел буады да, Солтанкелді мырзаның қара шаңырағы кенже ұлы Шәкілде болуға тйісті екенін айтады. Ағалары бұған мақұл болмайды. Өйткені, Малтабар, Шәкіл аз болғандықтан, олардың басынғысы келген ғой. Тілін алдыра алмай мақұлдығын, ризашылдығын бермеген соң, қатуланып, қайратқа келген Малтакең айбалтасын көтеріп, үлкен үйдің маңдайшалығы мен табалдырығын дәл ортасынан екіге бөліп, жармын Тұрдығұлға тастап, жарымын алып, үйді көшіріп әкеліп Шәкілге тігіп берген екен. Ағалары араласуға батына алмай, шарасыз жолға жығылып қала беріпті. Бұл әрине, Малтекеңнің турашылдығы, ата жолға жүйріктігі, батыл, батырлығының айғағы еді. Малтабар батыр жалғыз інісі Шәкілді бетінен қақпай, мырза етіп, аялап өсіреді. Ол бір жолы інісінен:
- Сенің көңілің неге соғады? Не іске қызғасың? – деп сұрағанда інісі:
– Саятшылықты ұнатамын, құсбегі болғым келеді, – дейді. Малтакең ел-жерді аралап жүріп, Қаракерей ішіндегі бір ауылдан томағалап қондырып, отырғызып қойған үш бүркітті көріп, інісінен:
– Осының қайсысын таңдайсың? – деп сұрайды. Қыранға қызығып, бүркітті бақылап жүретін інісі ортада қондырулы отырған Сары бауыр, биік қабақ, қанды көз, мұзбалақты таңдайды. Малтакең 14 жылқысы бар, бір қысырақтың үйірін матап беріп, құсты інісіне алып береді. Шәкіл бабамыз бұл құсты ерекше баптап, мұзбалақ қыранына аю, қасқыр, бұғы-марал, таутеке, түлкіден тартып, төрт аяқтыны түгел алдырып, 9 жыл қайырып салған екен.
https://kazneb.kz/kk/catalogue/view/1657755
Q-Andas ақпарат
