سۋرەتشىنىڭ ونەرگە دەگەن سۇيىسپەنشىلىگى بالا كەزدەن قالىپتاستى. مەكتەپ قابىرعاسىندا-اق بەينەلەۋ ونەرىنە ەرەكشە قابىلەتىمەن كوزگە تۇسكەن مۇراتحان كەيىن بۇل جولدى ومىرلىك ماماندىققا اينالدىرىپ، كاسىبي سۋرەتشى رەتىندە قالىپتاستى. ونىڭ بويىنداعى شىعارماشىلىق قابىلەت وتباسىنان دارىعان دەسەك تە بولادى. اناسى راحات اپاي – ەلگە بەلگىلى قولونەر شەبەرى بولعان. شي توقۋ، كيىز باسۋ، سىرماق پەن تەكەمەت جاساۋ، قۇراق قۇراۋ سياقتى ۇلتتىق قولونەر تۇرلەرىن شەبەر مەڭگەرگەن اناسىنىڭ ونەرى جاس مۇراتحاننىڭ كوركەمدىك تالعامىنىڭ قالىپتاسۋىنا زور ىقپال ەتتى.
كەيىننەن ول بەينەلەۋ ونەرىنىڭ ءتۇرلى باعىتىن مەڭگەرىپ، سۋرەت، گرافيكا، كەسكىندەمە، باتيك جانە اعاش ويۋ ونەرىندە وزىندىك قولتاڭباسىن قالىپتاستىردى. اسىرەسە سۋرەتشىنىڭ بەدەرلى اعاش ويۋ تەحنيكاسىندا ورىندالعان شىعارمالارى ەرەكشە باعالانادى. اعاش ويۋ – ۇلكەن توزىمدىلىك پەن شەبەرلىكتى قاجەت ەتەتىن كۇردەلى ونەر. مۇراتحان ابدىلداەۆ بۇل سالادا ۇلتتىق ناقىشتى تەرەڭ ءتۇسىنىپ، ونى زاماناۋي كوركەمدىك تاسىلدەرمەن ۇيلەستىرە ءبىلدى.
شەبەردىڭ تۋىندىلارىنا قاراعان ادام ەڭ الدىمەن ۇلتتىق رۋح پەن تاريحي جادىنىڭ ءۇنىن سەزىنەدى. ونىڭ شىعارمالارىندا قازاق حالقىنىڭ ۇلى تۇلعالارى، باتىرلارى مەن ونەر قايراتكەرلەرى كوركەم بەينەلەنەدى. مىسالى، ۇلى اقىن اباي قۇنانبايۇلى، قازاق بەينەلەۋ ونەرىنىڭ نەگىزىن قالاۋشىلاردىڭ ءبىرى ءابىلحان قاستەەۆ، كۇي ونەرىنىڭ بۇلبۇلى دينا نۇرپەيىسوۆا، ايگىلى سۋرەتشى ايشا عالىمباەۆا، اقىن فاريزا وڭعارسىنوۆا سياقتى تۇلعالاردىڭ بەينەسى شەبەردىڭ شىعارمالارىندا ۇلتتىق بوياۋمەن، ەرەكشە كوركەمدىك شەشىممەن بەرىلگەن.
مۇراتحان ابدىلداەۆتىڭ تۋىندىلارىندا قازاقتىڭ ءداستۇرلى ويۋ-ورنەكتەرى باستى كوركەمدىك ەلەمەنتتەردىڭ ءبىرى بولىپ تابىلادى. سۋرەتشى ويۋدىڭ ءاربىر بولشەگى ارقىلى كومپوزيتسيانىڭ مازمۇنىن اشىپ، كوركەم تۋىندىنىڭ فيلوسوفيالىق استارىن تەرەڭدەتە تۇسەدى. كونە تاڭبالار، تابيعي ماتەريالدار، ۇلتتىق سيمۆولدار ونىڭ شىعارمالارىنا ەرەكشە ءمان مەن ماعىنا بەرەدى.
سۋرەتشىنىڭ كوپتەگەن جۇمىسىندا قازاق مادەنيەتىنىڭ سيمۆولىنا اينالعان جىلقى بەينەسى دە ءجيى كەزدەسەدى. «ەر قاناتى – ات» دەگەن حالىق دانالىعى سۋرەتشىنىڭ شىعارمالارىندا كوركەم بەينەگە اينالىپ، ەركىندىك پەن ەرلىك رۋحىن پاش ەتەدى.
مۇراتحان ابدىلداەۆتىڭ شىعارمالارى قازاقستاننىڭ كوپتەگەن قالاسىندا وتكەن كورمەلەردە كورسەتىلىپ، ونەرسۇيەر قاۋىمنىڭ جوعارى باعاسىنا يە بولدى. ونىڭ ەڭبەكتەرى ۇلتتىق ونەردىڭ مازمۇنىن جاڭعىرتىپ، كوركەمدىك تۇرعىدان جاڭا تىنىس بەرگەن تۋىندىلار رەتىندە باعالانىپ كەلەدى.
سۋرەتشى شىعارماشىلىقپەن قاتار ۇستازدىق قىزمەتتى دە ابىرويمەن اتقارىپ كەلەدى. ءىلياس جانسۇگىروۆ اتىنداعى جەتىسۋ ۋنيۆەرسيتەتىندە ۇزاق جىلدار بويى جاس سۋرەتشىلەرگە ءبىلىم بەرىپ، ونەردىڭ قىر-سىرىن ۇيرەتىپ كەلەدى. بۇگىندە ءوزىنىڭ ونەر ستۋدياسىندا دا شاكىرت تاربيەلەپ، جاس تالانتتاردىڭ شىعارماشىلىق جولىنا باعىت-باعدار بەرۋدە. توككەن تەرىنىڭ ارقاسىندا قازاقستان سۋرەتشىلەر وداعىنىڭ مۇشەسى، قازاقستان رەسپۋبليكاسى كوركەم اكادەمياسىنىڭ كوررەسپوندەنت مۇشەسى، ەۋرازيالىق ديزاينەرلەر وداعىنىڭ مۇشەسى، ءىلياس جانسۇگىروۆ اتىنداعى جەتىسۋ ۋنيۆەرسيتەتىنىڭ اكادەميالىق دوتسەنتى، پەداگوگيكا عىلىمدارىنىڭ ماگيسترى سياقتى مىندەتتەردى اتقارۋدا.
ونەر يەسىنىڭ شىعارماشىلىعى – قازاق حالقىنىڭ مادەني مۇراسىن جاڭعىرتىپ، ۇلتتىق رۋحتى دارىپتەۋگە ارنالعان ەڭبەك. ونىڭ تۋىندىلارى تەك كوركەمدىك قۇندىلىق قانا ەمەس، سونىمەن بىرگە حالىقتىڭ تاريحى مەن دۇنيەتانىمىن بەينەلەيتىن رۋحاني مۇرا بولىپ تابىلادى. الپىس جىلدىق مەرەيتوي بەلەسىنە جەتكەن سۋرەتشىنىڭ شىعارماشىلىق جولى – ەڭبەك پەن ىزدەنىستىڭ، تالانت پەن تاباندىلىقتىڭ ايقىن ۇلگىسى. مۇراتحان ابدىلداەۆ الداعى ۋاقىتتا دا ۇلتتىق ونەردىڭ ءورىسىن كەڭەيتىپ، جاڭا تۋىندىلارىمەن قازاق بەينەلەۋ ونەرىن بايىتا بەرەتىنى ءسوزسىز.
قاجەت انداس،
«Q-Andas» اقپارات اگەنتتىگى
