ادەبي شارا جاستارعا قىزمەت كورسەتۋ ورتالىعىنىڭ جيىنجايىندا ءوتىپ، وعان وبلىستىڭ مادەنيەت جانە ونەر قايراتكەرلەرى، جاس اقىندار، ولكەتانۋشىلار مەن وقىرماندار قاۋىمى قاتىستى.
جيىندى «جەتىسۋ» ولكەتانۋشىلار ورتالىعى» قوعامدىق بىرلەستىگىنىڭ توراعاسى قاجەت انداس اشىپ، ۇيىمنىڭ اتقارعان جۇمىستارىمەن تانىستىردى. ونىڭ ايتۋىنشا، ورتالىق 2023 جىلى قۇرىلعاننان بەرى ايماق تاريحىن زەرتتەۋ مەن رۋحاني مۇرانى ناسيحاتتاۋ باعىتىندا اۋقىمدى ىستەر اتقارىپ كەلەدى. سونىڭ ىشىندە «100 وبا – قىزبەيىتى» ەسكەرتكىشى، «جەتىسۋ ورنەگى» حالىقارالىق كورمەسى، «قىزاي ورنەك» ۇلتتىق كورمەسى، «ەرلىكتىڭ داڭقى وشپەيدى» اسكەري-پاتريوتتىق كونفەرەنتسياسى، سونداي-اق «امانبوكتەر جارتاس سۋرەتتەرى»، «جاركەنت – كيەلى مەكەن» ەكسپەديتسيالارى ەرەكشە اتالدى.
سونىمەن قاتار ورتالىق مۇشەلەرى مەملەكەت باسشىسىنىڭ تاپسىرماسىمەن جۇزەگە اسىرىلىپ جاتقان ساياسي قۋعىن-سۇرگىن قۇرباندارىن تولىق اقتاۋ جونىندەگى كوميسسيانىڭ جۇمىسىنا دا بەلسەنە قاتىسۋدا. ولار جەتىسۋ وبلىسى بويىنشا دايىندالعان 47 توم ارحيۆتىك جانە 60 توم «حالىق جادى» ماتەريالدارىن قۇراستىرۋعا اتسالىسقان. تۇساۋى كەسىلگەن «مىڭبۇلاق» جيناعى – تۋعان جەرگە دەگەن ساعىنىش پەن سۇيىسپەنشىلىكتىڭ ءمولدىر كورىنىسى. الماتىداعى «بالاۋسا» باسپاسىنان جارىق كورگەن كىتاپ 21 اقىننىڭ تاڭداۋلى ولەڭدەرىن بىرىكتىرگەن. ءار جىر شۋماعىنان ەلگە دەگەن ماحاببات، تۋعان توپىراقتىڭ ءيىسى سەزىلەدى.
جيناقتىڭ العى ءسوزىن بەلگىلى اقىن، ادەبيەتتانۋشى مىرزاگالي توقتاۋباي جازعان. ول ءوز ماقالاسىندا «بۇل جيناق – اتامەكەنگە ورالعان اقىنداردىڭ جۇرەك ءسوزى، تۋعان جەرمەن قايتا تابىسۋدىڭ كوركەم ايعاعى» دەپ باعا بەرەدى.
كىتاپتاعى تۋىندىلار ءومىر، تۋعان جەر، تابيعات پەن رۋحاني تازالىق تاقىرىپتارىن قامتيدى. «مىڭبۇلاق» – ولەڭمەن ورىلگەن ەلگە تاعزىم، جاس قالام يەلەرىنىڭ شابىت بۇلاعى دەسەك، ارتىق ەمەس.
تۇساۋكەسەردە شىعارماشىلىق توپتىڭ دا پىكىرى تىڭدالدى:
ادىلەت احمەت، جاۋاپتى رەداكتور:
– «مىڭبۇلاق» – ولەڭسۇيەر قاۋىمنىڭ جۇرەگىنە جىلۋ سىيلايتىن ەرەكشە جيناق. ءاربىر ولەڭنەن تۋعان جەردىڭ ءيىسى، بالالىق ساعىنىش پەن رۋحاني تازالىق سەزىلەدى. بۇل كىتاپ – ەلگە، جەرگە دەگەن شىنايى ماحابباتتىڭ ايعاعى. قالامى جۇيرىك، ويى تەرەڭ جاس اقىنداردىڭ ءۇنى وسى جيناق ارقىلى كوپشىلىككە جەتىپ، قازاق پوەزياسىنىڭ جاڭا تىنىسىن تانىتتى دەپ سەنەمىن.
قىرباق نۇرعالي، رەداكتور:
بۇل جيناقتاعى ءار ولەڭ – جۇرەكتىڭ سىرى، ەلدىك پەن ەرلىككە، تۋعان توپىراققا دەگەن قۇرمەتتىڭ كورىنىسى. «مىڭبۇلاق» – تەك ادەبي ەڭبەك ەمەس، رۋحاني كوپىر. ول الىستاعى مەن جاقىنداعى، اعا بۋىن مەن جاس بۋىندى، اقىن مەن وقىرماندى تابىستىرادى. كىتاپتى قۇراستىرۋشىلاردىڭ تالعامى مەن ەڭبەگى ەرەكشە سەزىلەدى.
امان قالياسقارۇلى، قۇراستىرۋشى:
«مىڭبۇلاق» – اتامەكەننىڭ ۇنىمەن ورىلگەن جۇرەكتەر توعىسى. بۇل جيناققا ەنگەن اقىنداردىڭ بارلىعى دا تۋعان جەرگە، ەلگە دەگەن پەرزەنتتىك سۇيىسپەنشىلىگىن جىرمەن ورنەكتەگەن. ءبىز وسى كىتاپ ارقىلى وقىرماندى ساعىنىش پەن شابىتقا، پوەزيانىڭ ءمولدىر الەمىنە جەتەلەگىمىز كەلدى. ءار اقىننىڭ ءۇنى – ءبىر بۇلاق، ال سول بۇلاقتاردىڭ توعىسى – «مىڭبۇلاق».
گۇلناز ماقانقىزى، قۇراستىرۋشى:
– بۇل جيناقتا نازىكتىك پەن تازالىق، تۋعان جەرگە دەگەن ىڭكار سەزىم توعىسقان. «مىڭبۇلاق» – ايەل اقىنداردىڭ ءۇنى دە، ەرلەردىڭ رۋحى دا ەستىلەتىن ورتاق ساحنا. ءار جولدا جىلىلىق، ءار شۋماقتا شىنايىلىق بار. وقىرمان بۇل جيناقتان ءوز اۋىلىن، ءوز كوكتەمىن، ءوز بالالىعىن تابادى دەپ سەنەمىن.
ءىس-شارا بارىسىندا “جەتىسۋ” ولكەتانۋشىلار ورتالىعى” قوعامدىق بىرلەستىگىنىڭ ولكەتانۋشىلارى باسپادان شىعارعان 47 كىتاپتىڭ جانە Q-Andas اقپاراتتىق اگەنتتىگىنىڭ qandas.kz سايتىنىڭ تانىستىرىلىمى ءوتتى. ونى بىرلەستىكتىڭ قىزمەتكەرى انار تۇردىمۇحامەت اتقاردى. بۇل پلاتفورما جەتى وزەننىڭ بويىن جايلاعان ولكەنىڭ، تاراتىپ ايتساق، قازاقستاننىڭ اباي، جەتىسۋ، الماتى، جامبىل وبلىستارى مەن الماتى قالاسى، قىتاي حالىق رەسپۋبليكاسىنىڭ ىلە قازاق اۆتونوميالى وبلىسىنىڭ ىلە، التاي، تارباعاتاي ايماقتارىنىڭ، قىرعىزستاننىڭ شۋ، تالاس، نارىن وبلىستارىنىڭ جاڭالىقتارى مەن مادەني-تانىمدىق ماقالالاردى تاراتۋعا باعىتتالعان.
سونداي-اق، جىر جيناعى «كىتاپ سىيلا!» اكتسياسى اياسىندا وبلىستىق جانە قالالىق كىتاپحانالارعا تەگىن تارتۋ ەتىلدى. ادەبي شارا سوڭى مۋزىكالىق قويىلىممەن جانە قاتىسۋشىلاردى ماراپاتتاۋ راسىمىمەن اياقتالدى.
«مىڭبۇلاق» – تەك اقىندار جيناعى عانا ەمەس، ول – تۋعان جەر مەن رۋحاني قۇندىلىقتاردى دارىپتەگەن ۇلكەن مادەني باستاما. جەتىسۋ جەرىندە باستاۋ العان بۇل جوبا پوەزيا مەن ولكەتانۋدىڭ توعىسىندا تۋعان جاڭا سەرپىن رەتىندە باعالاندى.
ماقالاسىن جازعان لياززات مۇحامەدجان،
سۋرەتتەرىن ءتۇسىرىپ، بەينەباياندار جاساعان: اينۇر ورازباي، نارگيز يبرايموۆا.
Q-Andas اقپاراتتىق اگەنتتىگى
