Ádebi shara Jastarǵa qyzmet kórsetu ortalyǵynyń jiynjaiynda ótip, oǵan oblystyń mádeniet jáne óner qairatkerleri, jas aqyndar, ólketanushylar men oqyrmandar qauymy qatysty.
Jiyndy «Jetisu» ólketanushylar ortalyǵy» qoǵamdyq birlestiginiń tóraǵasy Qajet Andas ashyp, úiymnyń atqarǵan júmystarymen tanystyrdy. Onyń aituynsha, ortalyq 2023 jyly qúrylǵannan beri aimaq tarihyn zertteu men ruhani múrany nasihattau baǵytynda auqymdy ister atqaryp keledi. Sonyń ishinde «100 oba – Qyzbeiiti» eskertkishi, «Jetisu órnegi» halyqaralyq kórmesi, «Qyzai órnek» últtyq kórmesi, «Erliktiń dańqy óshpeidi» áskeri-patriottyq konferentsiyasy, sondai-aq «Amanbókter jartas suretteri», «Jarkent – kieli meken» ekspeditsiyalary erekshe ataldy.
Sonymen qatar ortalyq músheleri Memleket basshysynyń tapsyrmasymen júzege asyrylyp jatqan Sayasi quǵyn-súrgin qúrbandaryn tolyq aqtau jónindegi komissiyanyń júmysyna da belsene qatysuda. Olar Jetisu oblysy boiynsha daiyndalǵan 47 tom arhivtik jáne 60 tom «Halyq jady» materialdaryn qúrastyruǵa atsalysqan. Túsauy kesilgen «Myńbúlaq» jinaǵy – tuǵan jerge degen saǵynysh pen súiispenshiliktiń móldir kórinisi. Almatydaǵy «Balausa» baspasynan jaryq kórgen kitap 21 aqynnyń tańdauly óleńderin biriktirgen. Ár jyr shumaǵynan elge degen mahabbat, tuǵan topyraqtyń iisi seziledi.
Jinaqtyń alǵy sózin belgili aqyn, ádebiettanushy Myrzagali Toqtaubai jazǵan. Ol óz maqalasynda «Búl jinaq – atamekenge oralǵan aqyndardyń júrek sózi, tuǵan jermen qaita tabysudyń kórkem aiǵaǵy» dep baǵa beredi.
Kitaptaǵy tuyndylar ómir, tuǵan jer, tabiǵat pen ruhani tazalyq taqyryptaryn qamtidy. «Myńbúlaq» – óleńmen órilgen elge taǵzym, jas qalam ieleriniń shabyt búlaǵy desek, artyq emes.
Túsaukeserde shyǵarmashylyq toptyń da pikiri tyńdaldy:
Ádilet Ahmet, jauapty redaktor:
– «Myńbúlaq» – óleńsúier qauymnyń júregine jylu syilaityn erekshe jinaq. Árbir óleńnen tuǵan jerdiń iisi, balalyq saǵynysh pen ruhani tazalyq seziledi. Búl kitap – elge, jerge degen shynaiy mahabbattyń aiǵaǵy. Qalamy júirik, oiy tereń jas aqyndardyń úni osy jinaq arqyly kópshilikke jetip, qazaq poeziyasynyń jańa tynysyn tanytty dep senemin.
Qyrbaq Núrǵali, redaktor:
Búl jinaqtaǵy ár óleń – júrektiń syry, eldik pen erlikke, tuǵan topyraqqa degen qúrmettiń kórinisi. «Myńbúlaq» – tek ádebi eńbek emes, ruhani kópir. Ol alystaǵy men jaqyndaǵy, aǵa buyn men jas buyndy, aqyn men oqyrmandy tabystyrady. Kitapty qúrastyrushylardyń talǵamy men eńbegi erekshe seziledi.
Aman Qaliyasqarúly, qúrastyrushy:
«Myńbúlaq» – atamekenniń únimen órilgen júrekter toǵysy. Búl jinaqqa engen aqyndardyń barlyǵy da tuǵan jerge, elge degen perzenttik súiispenshiligin jyrmen órnektegen. Biz osy kitap arqyly oqyrmandy saǵynysh pen shabytqa, poeziyanyń móldir álemine jetelegimiz keldi. Ár aqynnyń úni – bir búlaq, al sol búlaqtardyń toǵysy – «Myńbúlaq».
Gúlnaz Maqanqyzy, qúrastyrushy:
– Búl jinaqta náziktik pen tazalyq, tuǵan jerge degen ińkár sezim toǵysqan. «Myńbúlaq» – áiel aqyndardyń úni de, erlerdiń ruhy da estiletin ortaq sahna. Ár jolda jylylyq, ár shumaqta shynaiylyq bar. Oqyrman búl jinaqtan óz auylyn, óz kóktemin, óz balalyǵyn tabady dep senemin.
Is-shara barysynda “Jetisu” ólketanushylar ortalyǵy” qoǵamdyq birlestiginiń ólketanushylary baspadan shyǵarǵan 47 kitaptyń jáne Q-Andas aqparattyq agenttiginiń qandas.kz saitynyń tanystyrylymy ótti. Ony birlestiktiń qyzmetkeri Anar Túrdymúhamet atqardy. Búl platforma jeti ózenniń boiyn jailaǵan ólkeniń, taratyp aitsaq, Qazaqstannyń Abai, Jetisu, Almaty, Jambyl oblystary men Almaty qalasy, Qytai Halyq Respublikasynyń Ile qazaq avtonomiyaly oblysynyń Ile, Altai, Tarbaǵatai aimaqtarynyń, Qyrǵyzstannyń SHu, Talas, Naryn oblystarynyń jańalyqtary men mádeni-tanymdyq maqalalardy taratuǵa baǵyttalǵan.
Sondai-aq, jyr jinaǵy «Kitap syila!» aktsiyasy ayasynda oblystyq jáne qalalyq kitaphanalarǵa tegin tartu etildi. Ádebi shara sońy muzykalyq qoiylymmen jáne qatysushylardy marapattau rásimimen ayaqtaldy.
«Myńbúlaq» – tek aqyndar jinaǵy ǵana emes, ol – tuǵan jer men ruhani qúndylyqtardy dáriptegen úlken mádeni bastama. Jetisu jerinde bastau alǵan búl joba poeziya men ólketanudyń toǵysynda tuǵan jańa serpin retinde baǵalandy.
Maqalasyn jazǵan Lyazzat Múhamedjan,
Suretterin túsirip, beinebayandar jasaǵan: Ainúr Orazbai, Nargiz Ibraimova.
Q-Andas aqparattyq agenttigi
