Atajúrtqa sonau 2008 jyly birjolata qonys audarǵan Erkin alǵashynda Taldyqorǵan qalasynyń irgesindegi «Ashybúlaq» sayajaiynda qonystanady. Arǵy bette «eńbek etseń erinbei, toyady qarnyń tilenbei» degen qaǵidamen shyńdalǵan jas jigit 30 sotyq aulasyna Qytaidan ala kelgen alma, órik, kókterektiń kóshetin egip, jersindiredi.
– 10 jasymnan bastap aǵash egip, ony kútip-baptauǵa qúmarttym. Elge oralǵan soń da osy kásipti qolǵa alǵym keldi. 2010 jyly elimizde «Jasyl Qazaqstan» baǵdarlamasy qolǵa alyndy. Sol tústaǵy oblys ákimine hat jazyp, ózimniń orman ósirip, qorshaǵan ortany kórkeitu armanymdy jetkizdim. Búl ótinishim qabyldanyp: «Oblysqa qarasty qaisy audannan laiyqty jer kórseń, sol jerdi ózgertuge qoldau kórsetiledi» degen jauap aldym. Sonymen Taldyqorǵan qalasy, Eskeldi, Qaratal, Kóksu audandarynyń auyldaryn aralap júrip, tańdauym Kóksu audanynyń Músabek auylyna tústi. Osy auyldyń tizginin ústap júrgen azamattar 22 gektar jer telimin berip, armanymdy úshtady. Sonymen alǵashynda alma aǵashyn egip kórip edik, ónbedi. Óitkeni, Músabek auylynyń jeri qúmdauyttau, jeli úzilmeitindikten jemis aǵashyn ósiru qiyndau eken. Sodan keiin, Qytai kóktereginiń kóshetin ákelip, ege bastadym. Armanymyz aldaǵan joq. Búgingi jaǵdaiyn kórip túrsyzdar, – deidi Erkin bas-ayaǵy 1 shaqyrymǵa sozylyp jatqan 10 qatar bolyp tizilip ósken kókterekti núsqap.
Erkinniń bastamasyn «Aǵaiynnyń aty ozǵansha, auyldastyń taiy ozsyn» deitin Músabek auylynyń ákimdik qyzmetkerleri men auyl aqsaqaldary, túrǵyndar men mektep újymy birden qoldap, aǵash kóshetin otyrǵyzu kezinde, ony suǵaryp, kútip-baptaǵan tústa kóp kómek kórsetedi.
– Auylymyz jeldiń ótine ornalasqan, onyń ústine, topyraǵy qúmdauyt bolǵandyqtan baqsha ónimderi, jemis-jidek óspeidi. Erkin eń alǵash auylǵa alma aǵashyn egip edi, jer jaǵdaiyna bailanysty jersinbedi. Sodan keiin auyldy ainaldyra kókterek egip, onyń qalqasyna alma, órik aǵashtaryn egip ósirdi. Qazir olar jemis berip túr. Kókterekter biiktep ósip, jel men qúmdy tosqandyqtan azynaǵan jel toqtap, auyldy qúm baspaityn boldy. Auyldastar aulasyna baqsha ónimderin egip, nápaqa tabatyn boldy. Sóitip, Erkinniń kókteregi búkil auyldyń beinesin ózgertip jiberdi, – deidi Músabek auylynyń túrǵyny Ziyagúl Dosanqyzy.
«Erkinniń kókteregi» degen sózdi búginde Músabek auylynyń túrǵyndary maqtana aitady. Kókterektiń kósegesin kógertken Erkin qosymsha qara aǵashtyń túqymyn da seuip, 1-2 jyldyq kóshetin Astana, Almaty, Túrkistan qalalary men Qaraǵandy, Ońtústik Qazaqstan oblystaryna saudalap, nápaqa tabady.
– Bizdiń elde eńbektengen adamǵa barlyq jaǵdai jasalǵan jáne kásiptenuge múmkindik mol. Meniń tórt túligim de, biznesim de, kásibim de osy aǵashtar. Aldaǵy uaqytta múnyń sanyn da, aumaǵyn da keńeitip, kókterekpen birge jemis aǵashyn ósirip, qorshaǵan ortaǵa qosar úlesimdi eselei beremin, – deidi azamat.
Erkinniń búl armanyn júzege asyruǵa auyl, audan ákimdigi de qolynan kelgenshe kómektesuge daiyn. «Kóp túkirse kól tolady» degendei, búl eńbektiń nátijesin erteńgi úrpaq kóredi.
Qajet ANDAS
