سالتاناتتى جيىن باستالعاندا اۋدان اكىمى الماس ابدينوۆ بارلىق اۋىل تۇرعىندارىن تاۋەلسىزدىك كۇنىمەن قۇتتىقتاپ، جاڭا مادەنيەت ءۇيىنىڭ اشىلۋى اۋداننىڭ الەۋمەتتىك‑مادەني دامۋىنداعى ماڭىزدى قادام ەكەنىن اتاپ ءوتتى. بلوكتى‑ءمودۋلدى ۇلگىدە تۇرعىزىلعان زاماناۋي مادەنيەت ءۇيى قىسقا مەرزىمدە سالىنىپ، ەل يگىلىگىنە ۇسىنىلدى. مەكەمە اۋىل جاستارى مەن بۇلدىرشىندەرىنىڭ شىعارماشىلىق قابىلەتىن دامىتۋعا، تۇرعىنداردىڭ مادەني دەمالىسىن ساپالى ۇيىمداستىرۋعا زور مۇمكىندىك بەرەدى. مۇندا كونتسەرتتەر، ۇيىرمەلەر مەن ۇلتتىق ءداستۇردى دارىپتەيتىن ءىس‑شارالار وتكىزۋگە بارلىق جاعداي جاسالعان.
مادەنيەت ءۇيىنىڭ اشىلۋ ءراسىمى قازاقى داستۇرمەن باستالدى. ەرەكشە بەزەندىرىلگەن الاڭعا بيلبوردتار، شارلار، كىلەم‑توسەنىشتەر توسەلىپ، شاشۋ ۇستاعان اجەلەر مەن لەنتا قيۋعا دايىن قىزدار شىقتى. فانفار ۇنىنەن كەيىن ءسوز العان اۋدان اكىمى جاڭا نىساندى قولعا الۋدا ۇلەس قوسقان بارلىق ازاماتتارعا جانە مەردىگەر كومپانياعا العىسىن جەتكىزىپ، بۇل ەڭبەكتىڭ تاۋەلسىزدىكتى نىعايتۋعا قىزمەت ەتەتىنىن ايتتى.
اۋداندىق قوعامدىق كەڭەس توراعاسى ەرىك جۋانىشباەۆ اۋىل تۇرعىندارى اتىنان جىلى لەبىزىن ارناپ، اۋىلدىڭ وركەندەۋىنە تىلەكتەستىك ءبىلدىردى. ەڭبەك ارداگەرى امانگەلدى احمەتجانوۆ اق باتاسىن بەرىپ، جاڭا نىساننىڭ يگىلىكتى ىستەرگە تولى بولۋىن تىلەدى. سالتاناتتى ءراسىمنىڭ ماڭىزدى ساتىندە مادەنيەت ءۇيىنىڭ لەنتاسى قيىلىپ، شاشۋ شاشىلدى. قوناقتار عيمارات ءىشىن ارالاپ، كورەرمەن زالى مەن ۇيىرمە بولمەلەرىمەن تانىستى.
150 ورىنعا ارنالعان كورەرمەن زالى بار ءبىر قاباتتى مادەنيەت ءۇيى 367،5 شارشى مەتر اۋماقتى الىپ جاتىر. جوبانىڭ جالپى قۇنى 209 ملن 216 مىڭ تەڭگەنى قۇرايدى. قۇرىلىستى “ەلەكترو‑ليدەر” جشس مەردىگەر كومپانياسى جۇرگىزىپ، اۆتورلىق قاداعالاۋدى “G6‑Project” جشس، تەحنيكالىق باقىلاۋدى “AAT Engineering ءححى” جۇزەگە اسىرعان. عيماراتتى سالۋعا تاپسىرىس بەرۋشى الاكول اۋدانىنىڭ قۇرىلىس، ساۋلەت جانە قالا قۇرىلىسى ءبولىمى. كوركەمدىك قوندىرعىلارى مەن دىبىس تەحنيكاسى زاماناۋي تالاپتارعا ساي جابدىقتالعان.
اشىلۋ راسىمىنەن كەيىن اۋىل ونەرپازدارى مەن اۋداندىق مادەنيەت ءۇيىنىڭ ارتىستەرى قاتىسقان مەرەكەلىك كونتسەرت ءوتتى. قازاقستان اۋىلدىق مادەنيەت ءۇيىنىڭ ديرەكتورى اقىلجان اديكوۆ “مەن قازاقپىن” ءانىن شىرقاپ، كوپشىلىكتىڭ قوشەمەتىنە بولەندى. مۋزىكالىق جەتەكشى كۇنىم قاليەۆا “جاستار” ءانىن ورىندادى. اۋىل اجەلەر ءانسامبلى “اۋىلدىڭ ادامدارى-اي” انىمەن ساحنانى ارلەدى.
اۋداندىق زەينەپ قويشىباەۆا اتىنداعى مادەنيەت ءۇيىنىڭ ونەرپازدارى دا ونەر كورسەتتى. كۇلىمحان كاكىمسەيتوۆا “اق كوڭىل قازاعىم-اي” ءانىن، وتباسىلىق دۋەت جاندوس پەن اقبوتا ءشامشى قالداياقوۆتىڭ اندەرىنەن پوپۋرري ۇسىندى. “مادەنيەت” ەتنو توبى حالىق اندەرىنەن پوپۋرري ورىندادى. كىشىكباەۆ ديدار “الاكولىم” ءانىن شىرقاسا، اۋداندىق مادەنيەت ءۇيىنىڭ ءانشىسى نازيا يساەۆا “اۋىلىم” انىمەن مەرەكە شىرايىن اشا ءتۇستى. كونتسەرت سوڭىندا قاتىسۋشىلار ورتاق انمەن فينال جاسادى.
قازاقستان اۋىلى – بەرەكەسى مەن بىرلىگى جاراسقان، ونەر مەن مادەنيەتتىڭ ورداسى بولعان كيەلى مەكەن. بۇل اۋىلدان الەمگە ايگىلى جەزتاڭداي ءانشى زەينەپ قويشىباەۆا، جەتىسۋ وبلىسى فيلارمونياسىنىڭ ءداستۇرلى ءانشىسى، مادەنيەت سالاسىنىڭ قايراتكەرى سايا ەسەنگەلدينوۆا جانە باسقا دا كوپتەگەن ءانشى‑كۇيشر، اقىن مەن ءسوز زەرگەرلەرى شىققان. اۋدان اكىمى اتاپ وتكەندەي، جاڭا مادەنيەت ءۇيى اۋىلدىڭ ءوسىپ‑وركەندەۋىنە، مادەنيەت پەن رۋحانياتتىڭ جاندانۋىنا قىزمەت ەتەدى.
جاڭا نىساننىڭ اشىلۋى ەلدى مەكەننىڭ الەۋمەتتىك‑مادەني ومىرىندەگى ايتۋلى وقيعا. كوپتەن كۇتكەن مادەنيەت ءۇيى اۋىل جاستارى مەن بۇلدىرشىندەر ءۇشىن شىعارماشىلىقتىڭ قاينار كوزى بولىپ، تۇرعىنداردىڭ بوس ۋاقىتىن مازمۇندى وتكىزۋگە مۇمكىندىك بەرمەك. اۋىل ونەرپازدارى ۇيىمداستىرعان ءتۇرلى مادەني شارا مەن ۇيىرمەلەر جەرگىلىكتى جۇرتشىلىقتىڭ رۋحاني ءومىرىن بايىتا تۇسەتىنىنە سەنىم مول.
قاجەت انداس،
«Q-andas» اقپاراتتىق اگەنتتىگى
الاكول اۋدانى
