ۇلتتىق ارحيۆ قورىن تولىقتىرۋ جانە ساقتاۋ – تەك تەحنيكالىق جۇمىس ەمەس، بۇل ۇلت جادىسىن جۇيەلەۋ، ۋاقىتپەن جارىسقان جاۋاپتى مىندەت. ءبولىمنىڭ نەگىزگى قىزمەتى – ۇيىمدار مەن كاسىپورىندار قىزمەتى بارىسىندا قالىپتاسقان، زاڭنامالىق تارتىپپەن ۇلتتىق قۇندىلىق دەپ تانىلعان تاريحي، عىلىمي، الەۋمەتتىك جانە مادەني ماڭىزى بار قۇجاتتاردى تۇراقتى مەملەكەتتىك ساقتاۋعا قابىلداۋ. ءاربىر قۇجات ەسەپكە الىنىپ، ونىڭ قۇرامى مەن مازمۇنىنداعى وزگەرىستەر تىركەلىپ وتىرادى. اسىرەسە اسا قۇندى قۇجاتتارعا ەرەكشە باقىلاۋ جۇرگىزىلەدى.
ارحيۆ سالاسىندا قۇجاتتىڭ فيزيكالىق جاي-كۇيى باستى نازاردا. ماماندار قۇجاتتاردى زالالسىزداندىرۋ، دارىلەۋ، الدىن الا وڭدەۋ، ىستەردى تۇپتەۋ، ءوشىپ بارا جاتقان ماتىندەردى قالپىنا كەلتىرۋ، مۇقابالاۋ، پاراقتاردى نومىرلەۋ، شاڭ-توزاڭنان تازارتۋ، تىگۋ جانە توپوگرافيالاۋ جۇمىستارىن جۇيەلى تۇردە جۇرگىزەدى.
سونىمەن قاتار ارحيۆ قويمالارىندا تەمپەراتۋرالىق-ىلعالدىلىق رەجيمى قاتاڭ ساقتالىپ، ءورت قاۋىپسىزدىگى تالاپتارى قامتاماسىز ەتىلەدى. بۇل – عاسىرلار بويى ساقتالۋى ءتيىس مۇرالاردىڭ قاۋىپسىزدىگى ءۇشىن ماڭىزدى شارت.
ارحيۆ تەك ساقتاۋ ورنى ەمەس، ول – عىلىمي زەرتتەۋ مەن تانىم كەڭىستىگى. وقۋ زالىنا كەلگەن زەرتتەۋشىلەرگە، ءبولىم قىزمەتكەرلەرىنە، مەكەمەلەر مەن كاسىپورىندارعا قۇجاتتاردى ۋاقىتشا پايدالانۋعا بەرۋ راسىمدەلىپ، ولاردىڭ ساقتالۋى مەن قايتارىلۋى قاتاڭ باقىلاۋدا ۇستالادى.
ءبولىم ءوز جۇمىسىن جوسپارلى نەگىزدە ۇيىمداستىرىپ، اتقارىلعان ءىس-شارالار بويىنشا ەسەپ بەرەدى. بۇل جۇيەلىلىك – ارحيۆ قىزمەتىنىڭ ساپاسىن قامتاماسىز ەتەتىن باستى قاعيدا.
«تسيفرلىق قازاقستان» مەملەكەتتىك باعدارلاماسى اياسىندا قۇجاتتاردى سكانەرلەۋ، ەلەكتروندىق فورماتقا كوشىرۋ جانە ەلەكتروندى ارحيۆ جۇيەسىنە ەنگىزۋ جۇمىستارى جۇرگىزىلۋدە. بۇل – ءبىر جاعىنان قۇجاتتاردىڭ ساقتالۋىن قامتاماسىز ەتسە، ەكىنشى جاعىنان ولاردى قاشىقتان قولجەتىمدى ەتۋگە مۇمكىندىك بەرەدى.
تسيفرلاندىرۋ – ارحيۆ ءىسىن زاماناۋي دەڭگەيگە كوتەرىپ، تاريحي مۇرانى كەلەشەك ۇرپاققا جاڭا فورماتتا ۇسىنۋدىڭ ءتيىمدى جولى.
ۇلتتىق ارحيۆ قورى – ەلدىڭ رۋحاني تىرەگى. ونى تولىقتىرۋ، ساقتاۋ جانە ۇقىپتى پايدالانۋ – وتكەنگە قۇرمەت، بولاشاققا امانات.
جەتىسۋ وبلىسىنىڭ مەملەكەتتىك ءارحيۆى وسى جاۋاپتى مىندەتتى ابىرويمەن اتقارىپ كەلەدى.
ك. احمەتوۆا،
جەتىسۋ وبلىسىنىڭ مەملەكەتتىك
ءارحيۆىنىڭ ءبولىم باسشىسى.
